,
28 თებერვალს დონალდ ტრამპი პირველად გამოჩნდა საჯაროდ ფლორიდის შტატის ქალაქ ორლანდოში გამართულ პარტიულ კონფერენციაზე, რომელსაც ესწრებოდა ასობით გულმხურვალე და მტკიცე რესპუბლიკელი ქვეყნის ყველა კუთხიდან.
კონფერენციის მონაწილეებს მიმართა ყოფილმა პრეზიდენტმა, რომლისთვისაც ეს პირველი სიტყვით გამოსვლა იყო საპრეზიდენტო უფლებამოსილების გადაბარების შემდეგ.
„მე დღეს ვდგავარ თქვენს წინაშე, რათა გაუწყოთ, რომ ის უჩვეულო მოგზაურობა, რომელიც ერთად დავიწყეთ 4 წლის წინ, გრძელდება“. ექს-პრეზიდენტმა აღუთქვა მომხრეებს, რომ „მათთან ერთად, მათ მხარდამხარ“ გააგრძელებს ბრძოლას ამერიკის უკეთესი მომავლისათვის.
მან დაადანაშაულა დემოკრატიული პარტია და, როგორც თვითონ უწოდებს, „ფეიკ მედიასაშუალებები“ რესპუბლიკელების წინააღმდეგ ბრძოლის გაჩაღებაში. სახელმწიფოს ექს-მეთაურმა მწვავედ გააკრიტიკა მოქმედი პრეზიდენტი: „მისი მმართველობის პირველი თვე იყო ყველაზე კატასტროფული თანამედროვე ამერიკის ისტორიაში, რადგან მან საქმით აჩვენა, რომ იგი გამოდის სამუშაო ადგილების წინააღმდეგ, ოჯახის წინააღმდეგ, სახელმწიფო საზღვრების წინააღმდეგ, ენერგეტიკის წინააღმდეგ, მეცნიერებისა და ქალების წინააღმდეგ“.
პოლიტიკური სლოგანი „ამერიკა პირველ ადგილზე“, მან ჩაანაცვლა სლოგანით „ამერიკა ბოლო ადგილზე“. ტრამპმა კრიტიკულად შეაფასა ამერიკის საგარეო პოლიტიკის ახალი კურსი, რომელიც ითვალისწინებს ქვეყნის სრულფასოვან ჩართულობას საერთაშორისო პრობლემების მოგვარების საქმეში და განაცხადა, რომ ქვეყანამ თავს ამის უფლება არ უნდა მისცეს.
მან დემოკრატები „ჩინეთის მარიონეტებად“ მოიხსენია. ექს-პრეზიდენტმა ასევე განაცხადა, რომ ჯო ბაიდენის მმართველობისას ამერიკამ უკვე დაკარგა ენერგეტიკული ზესახელმწიფოს სტატუსი, რომელსაც მისი პრეზიდენტობისას მიაღწია. ის, რომ ამერიკა იქცა ენერგეტიკულ სუპერსახელმწიფოდ და დომინირებდა საუდის არაბეთთან და რუსეთთან მიმართებითაც კი, იყო მისი დამსახურება.
„“ჩვენ ახლა უკვე რუსეთსა და ახლო აღმოსავლეთზე დამოკიდებულნი გავხდებით“-იწინასწარმეტყველა ტრამპმა.
„რადიკალი დემოკრატების მმართველობამ ის მოიტანა, რომ საწვავი მესამედით გაძვირდა-განაცხადა მან, მიუხედავად იმისა, რომ აშშ-ის ადმინისტრაცია არ ადგენს საწვავის ფასს.
მან გამორიცხა ახალი პარტიის შექმნის შესაძლებლობა: „ჩვენ არ დავიწყებთ ახალი პარტიის შექმნას...ჩვენ გვაქვს რესპუბლიკური პარტია“, რომელიც, მისი აზრით, მომავალ არჩევნებზე წარსდგება „ისეთი ერთიანი, როგორც არასდროს“.
ტრამპმა მწვავედ გააკრიტიკა ახალი ადმინისტრაციის საემიგრაციო პოლიტიკა. მისი აზრით ახალი ხელისუფლების პოლიტიკა გზას უხსნის კრიმინალური წარსულის მქონე ემიგრანტებს ამერიკაში დასამკვიდრებლად. ტრამპმა ასევე გააკრიტიკა ამერიკის დაბრუნება მსოფლიო სავაჭრო ორგანიზაციაში.
ბრალი დასდო ბაიდენის ადმინისტრაციას ირანისათვის სანქციების მოხსნაში, რაც სიმართლეს არ შეესაბამება და განაცხადა, რომ სამართლიანი არჩევნების შემთხვევაში, მისი პრეზიდენტობის მეორე ვადის პირველსავე კვირას იგი მიაღწევდა შეთანხმებას თეირანთან.
სიტყვით გამოსვლისას ტრამპმა კიდევ ერთხელ დაადასტურა თავისი მზადყოფნა 2024 წლის საპრეზიდენტო არჩევნებში მონაწილეობის მისაღებად და გამოთქვა თამამი ვარაუდი, რომ დემოკრატები აუცილებლად წააგებენ ამ არჩევნებს, ხოლო ის კიდევ ერთელ და უკვე მესამედ გაიმარჯვებს. მან ყურადღება გაამახვილა საარჩევნო რეფორმის აუცილებლობაზე: „ეს არჩევნები იყო ფალსიფიცირებული. უმაღლესმა სასამართლომ და სხვა სასამართლოებმა არაფერი არ მოიმოქმედეს ამის წინააღმდეგ... ჩვენ გვჭირდება საარჩევნო რეფორმა... მსგავსი აღარ უნდა განმეორდეს“.
საარჩევნო რეფორმის გასატარებელ გადაუდებელ ღონისძიებებად მან დაასახელა კენჭისყრის დღის დადგენა, არჩევნების შედეგების რეგისტრაციის ნორმისა და ამომრჩეველთა პირადობის დადგენის სტანდარტების გამკაცრება.
