დონალდ ტრამპის მიერ ხელმოწერილი აშშ-ის 2021 წლის ბიუჯეტი საქართველოსთვის დახმარების სახით 132 025 000 დოლარის გამოყოფას ითვალისწინებს.
„წინამდებარე კანონის ფარგლებში გამოყოფილი სახსრებიდან 132 025 000 დოლარი გაიცემა საქართველოს დასახმარებლად იმ პირობით, რომ ამ კანონის ამოქმედებიდან არაუგვიანეს 90 დღისა, სახელმწიფო მდივანი ასიგნების კომიტეტებს ანგარიშს წარუდგენს საქართველოში კანონის უზენაესობისა და ანგარიშვალდებული ინსტიტუტების შესახებ“, - ნათქვამია აშშ-ის 2021 წლის ფისკალური წლის ბიუჯეტში.
კანონში ასევე აღნიშნულია, რომ აშშ-ის 2021 წლის ბიუჯეტით გათვალისწინებული სახსრები არ შეიძლება იყოს ხელმისაწვდომი იმ ქვეყნის ცენტრალური მთავრობის დასახმარებლად, რომელმაც რუსეთის მიერ ოკუპირებული საქართველოს რეგიონების, აფხაზეთისა და ცხინვალის რეგიონის/სამხრეთ ოსეთის დამოუკიდებლობა აღიარა ან მათთან დიპლომატიური ურთიერთობა დაამყარა.
„ამ კანონით გათვალისწინებული არცერთი თანხა არ შეიძლება ხელმისაწვდომი იყოს რუსეთის ფედერაციის მიერ ოკუპირებული საქართველოს ტერიტორიების, აფხაზეთისა და ცხინვალის რეგიონის / სამხრეთ ოსეთის ოკუპაციის მხარდასაჭერად“, - ნათქვამია კანონში.
გარდა ამისა, აშშ-ის ხაზინის დეპარტამენტის მდივანი საერთაშორისო საფინანსო ინსტიტუტების ამერიკელ აღმასრულებელ დირექტორებს დაავალებს, წინააღმდეგობა გაუწიონ აღნიშნული დაწესებულებების ნებისმიერ პროგრამას, რომელიც საქართველოს სუვერენიტეტსა და ტერიტორიულ მთლიანობას არღვევს.