,
მე ყოველთვის ძალიან კარგი ურთიერთობა მქონდა ვლადიმირ პუტინთან, მაგრამ მას რაღაც დაემართა - ის სრულიად შეიშალა! უაზროდ კლავს უამრავ ადამიანს და საუბარი არ არის მხოლოდ ჯარისკაცებზე, - ასე გამოეხმაურა აშშ-ის პრეზიდენტი დონალდ ტრამპი რუსეთის მიერ უკრაინის ქალაქებზე განხორციელებულ მორიგ იერიშს. შესაბამისი განცხადება ტრამპმა სოციალურ ქსელში გამოაქვეყნა.
„უკრაინის ქალაქებზე სრულიად უსაფუძვლოდ ხორციელდება რაკეტებითა და დრონებით იერიშები. მე ყოველთვის ვამბობდი, რომ მას უნდა მთელი უკრაინა და არა მხოლოდ მისი ნაწილი და შესაძლოა ეს მართლდება კიდეც, მაგრამ თუ ამას გააკეთებს - ეს რუსეთის დაცემას გამოიწვევს!
ასევე, პრეზიდენტი ზელენსკი ცუდ სამსახურს უწევს თავის ქვეყანას იმით, როგორც ლაპარაკობს. ყოველი სიტყვა, რაც მისი პირიდან ამოდის, პრობლემებს ქმნის. ეს არ მომწონს და სჯობს, რომ შეწყდეს. ეს ომი არასოდეს დაიწყებოდა, მე რომ პრეზიდენტი ვყოფილიყავი. ეს ზელენსკის, პუტინისა და ბაიდენის ომია და არა ტრამპის - მე მხოლოდ ვცდილობ ჩავაქრო დიდი და საშინელი ხანძრები, რომლებიც დაწყებულია სრული არაკომპეტენტურობით და სიძულვილით“, - წერს ტრამპი.
უკრაინის პრეზიდენტი ვოლოდიმირ ზელენსკი ევროპის პოლიტიკური გაერთიანების სამიტზე დასასწრებად სომხეთის დედაქალაქ ერევანში ჩავიდა, - ინფორმაციას უკრაინული მედია პრეზიდენტის პრესსპიკერზე სერგეი ნიკიფოროვზე დაყრდნობით ავრცელებს.
ნიკიფოროვის განცხადებით, იგეგმება უკრაინის პრეზიდენტის შეხვედრა ნორვეგიის, ფინეთის, გაერთიანებული სამეფოს და ჩეხეთის პრემიერ-მინისტრებთან.
პრეზიდენტის პრესსპიკერის თქმით, სამიტი ორდღიანია და შესაბამისად, ორმხრივი და მრავალმხრივი შეხვედრები ღონისძიების მეორე დღესაც გაგრძელდება.
