,
აშშ-ის პრეზიდენტი დონალდ ტრამპი ყოფილი სახელმწიფო მდივნის, კოლინ პაუელის განცხადებას ეხმაურება და აცხადებს, რომ ის ჯიუტი ადამიანია.
„კოლინ პაუელი ის ჯიუტი ადამიანია, რომელსაც ეკისრება პასუხისმგებლობა ახლო აღმოსავლეთის დამანგრეველ ომში ქვეყნის ჩათრევაში. მან დღეს განაცხადა, რომ კიდევ ერთ ჯიუტს, „მძინარე ჯო“ ბაიდენს უჭერს მხარს. ეს ის კოლინ პაუელი არ არის, რომელიც აცხადებდა, რომ ერაყში „მასობრივი განადგურების იარაღი“ იყო? ასე არ მოხდა, მაგრამ ჩვენ ჩავერთეთ ომში“ , - წერს ტრამპი „ტვიტერზე“.
ცნობისთვის, მანამდე აშშ-ის ყოფილმა სახელმწიფო მდივანმა და აშშ-ის შეიარაღებული ძალების გენშტაბის ყოფილმა უფროსმა კოლინ პაუელმა განაცხადა, რომ დონალდ ტრამპი არაეფექტური პრეზიდენტია. მისივე თქმით, ტრამპი გამუდმებით იტყუება და ამის გამო, მისი აზრით, ის ხელმეორედ არ უნდა აირჩიონ პრეზიდენტად. პაუელის მოსაზრებით, პრეზიდენტმა აშშ-ის კონსტიტუციას გადაუხვია.
„მე ვფიქრობ, რომ ის არ არის ეფექტური პრეზიდენტი. ის გამუდმებით იტყუება. მან ტყუილების თქმა ჯერ კიდევ ინაუგურაციის დღიდან დაიწყო, როცა იქ მყოფი ხალხის რაოდენობაზე დაიწყეს კამათი. ხალხი მისი საყვარელი საქმიანობის - ტყუილების შესახებ წიგნებს წერს. ვფიქრობ, რომ ეს ჩვენს ინტერესებში არ არის“, - განუცხადა კოლინ პაუელმა CNN-ს.
