,
აშშ-ის პრეზიდენტმა, დონალდ ტრამპმა განაცხადა, რომ საპრეზიდენტო არჩევნების ბედი უზენაეს სასამართლოში შეიძლება გადაწყდეს.
„ვფიქრობ, არჩევნების ბედი უზენაეს სასამართლოში შეიძლება გადაწყდეს. ძალიან მნიშვნელოვანია, რომ სასამართლოს შემადგენლობაში ცხრა მოსამართლე იყოს“, - განაცხადა აშშ-ის პრეზიდენტმა ჟურნალისტებთან საუბრისას.
დონალდ ტრამპმა ასევე განაცხადა, რომ უზენაესი სასამართლოს ახალი მოსამართლის დანიშვნისთვის ბევრი დრო აქვს.
„ვფიქრობ, რომ ეს თაღლითობა, რომელსაც „დემოკრატები“ ახორციელებენ, უზენაესი სასამართლოს განხილვის საგანი შეიძლება გახდეს და თუ მოსამართლეების პოზიცია თანაბრად გაიყოფა, ოთხი-ოთხზე, ეს კარგი არ იქნება. მნიშვნელოვანია, რომ ცხრა მოსამართლე იყოს“, - აღნიშნა მან.
18 სექტემბერს აშშ-ის უზენაესი სასამართლოს მოსამართლე, რუთ გინზბურგი 87 წლისა გარდაიცვალა. დონალდ ტრამპმა განაცხადა, რომ უახლოეს პერიოდში სენატს უზენაესი სასამართლოს მოსამართლის პოსტზე ახალ კანდიდატურას წარუდგენს. „დემოკრატები“ ეწინააღმდეგებიან დონალდ ტრამპის ამ ნაბიჯს და აცხადებენ, რომ მოსამართლის დანიშვნა საპრეზიდენტო არჩევნებამდე არ უნდა მოხდეს.
წყარო:https://edition.cnn.com/
