ამერიკულმა ტელეარხმა „ფოქს ნიუსმა“ (Fox news) 20 ივნისს პროგრამაში „სპეციალური რეპორტაჟი“ (წამყვანი - ბრეტ ბაიერი) ექსკლუზიური ინტერვიუ ჩამოართვა აშშ-ის ექს-პრეზიდენტ დონალდ ტრამპს, რომლის შემოკლებული ტექსტური ვერსია გამოქვეყნებულია ტელეკომპანიის ვებ-გვერდზე სათაურით „ტრამპის მტკიცებით, „როცა პრეზიდენტი ვიყავი, ვლადიმერ პუტინს ვუთხარი, რომ უკრაინაზე თავდასხმა ძვირი დაუჯდებოდა“.

გთავაზობთ ამონარიდებს ინტერვიუდან:

- მოდით, რუსეთზე ვისაუბროთ. როგორც თქვენ თქვით, ამერიკის პრეზიდენტი რომ იყოთ, რუსეთ-უკრაინის კონფლიქტს 24 საათში დაასრულებით...

- დიახ, მართალია.

- თქვენს ოპონენტებს თქვენივე რესპუბლიკური პარტიიდან ამის არ სჯერათ. აი, რა თქვა ნიუ-ჯერსის შტატის ყოფილმა გუბერნატორმა ქრის ქრისტიმ: „ეჭვი მაქვს, რომ დონალდ ტრამპი უკრაინას პუტინის რუსეთს ჩააბარებს და ომს ასე შეწყვეტს“.   

- კარგი. მზად ხართ მომისმინოთ? დავიწყებ ქრის ქრისტით, რომელსაც მე ზალიან კარგად ვიცნობ. იგი გუბერნატორის პოსტიდან ჯორჯ ვაშინგტონის ხიდთან დაკავშირებული სკანდალის შემდეგ გადადგა. ეს საქმე ძალიან არეულ-დარეული იყო (შტატის ადმინისტრაციამ ხიდზე მოძრაობა არასწორად აკრძალა და ამით სატრანსპორტო კოლაფსი გამოიწვია). ქრის ქრისტის რეიტინგი მხოლოდ 9% იყო და უფრო ნაკლებიც. არადა, მას პრეზიდენტობაც სურდა. ჩემგან განსხვავებით, ის ვერ იქნებოდა ისეთი ბიჭი, რომელიც ომის შეჩერებას შეძლებდა.

მე ძალიან კარგი ურთიერთობა მქონდა ვოლოდიმირ ზელენსკისთან. მან მე მხარი დამიჭირა, როცა [დემოკრატებმა], ჩემი იმპიჩმენტის მიზნით, დამაბრალეს, თითქოსდა მე ჰანტერ ბაიდენთან დაკავშირებით, უკრაინის პრეზიდენტზე ზეწოლა მოვახდინე და დავემუქრე. ზელენსკიმ თქვა, რომ ბაიდენის საქმის გამო მას არავინ არ ემუქრებოდა.

კარგი ურთიერთობა მქონდა ვლადიმერ პუტინთანაც. მართალია, მასთან საკმაო ხანია პირადად არ მილაპარაკია, მაგრამ ჩვენ ერთმანეთთან ყოველთვის კარგი და მჭიდრო დამოკიდებულება გვქონდა.

- თქვენი აზრით, სწორად მოიქცა და მართალი იყო ვლადიმერ პუტინი, რომ მან თავისი ჯარი უკრაინაში გაგზავნა?

- აი, მე რომ პრეზიდენტი ვყოფილიყავი, ის უკრაინაში ჯარს არ შეიყვანდა. ვლადიმერ პუტინმა ეს გადაწყვეტილება მაშინ მიიღო, როცა მე აშშ-ის ხელისუფლებაში აღარ ვიყავი. მე ადრეც ვფიქრობდი, რომ მას შეეძლო ასეთი ნაბიჯი გადაედგა და ამიტომ, როცა მასთან საუბარი მქონდა, ვუთხარი: „თქვენ თუ ამას გააკეთებთ, ძალიან ძვირი დაგიჯდებათ. ეს კატასტროფა იქნება, ამას ნუ გააკეთებთ“. ასევე ვთქვი, რომ თუ არ დამიჯერებდა, მეც საპასუხოდ რაღაცას გავაკეთებდი. მან არ დამიჯერა. ისევ გავუმეორე, რომ „გავაკეთებ, ვლადიმერ, გავაკეთებ“. იმ მომენტში რუსეთის პრეზიდენტი ჩემს ნათქვამში მხოლოდ 10%-ით თუ იყო დარწმუნებული, თუმცა, როგორც დრომ გვაჩვენა, სანამ მე პრეზიდენტი ვიყავი, მას არაფერი მსგავსი არ გაუკეთებია. ყველაფერი მაშინ მოხდა, როცა მე თეთრი სახლიდან წავედი.

- თქვენ გჯერათ, რომ უკრაინა რუსეთისაგან ცალკე არსებული ქვეყანაა?

- რა თქმა უნდა. უკრაინა დამოუკიდებელი ქვეყანაა, მაგრამ იყო დრო, როცა ასეთს არ წარმოადგენდა. ვლადიმერ პუტინს სწორედ რუსული უკრაინა უფრო მოსწონდა.

- უნდა შეინარჩუნოს თუ არა პუტინმა ყირიმი? როგორ ფიქრობთ, თქვენ სწორად გადაწყვეტდით ყირიმის პრობლემას? შეგიძლიათ გარიგების დადება ამ საკითხში?

- მე ამჟამად ამგვარ გარიგებაზე არ ვფიქრობ, მაგრამ გეუბნებით, რომ 24 საათში... იცით, მე როგორ გავმდირდი? ძალიან კარგი გარიგებები დავდე და ბევრს მივაღწიე. მე მოლაპარაკების დასწყებისას რუსეთს ისეთ გარიგებას შევთავაზებდი, რომ ომს 24 საათში დავასრულებდი.

რასაკვირველია, მე რაღაც-რაღაცეებს ვოლოდიმირ ზელენსკისაც ვეტყოდი, მაგრამ უფრო მეტად ვლადიმერ პუტინს. გავიყვანდი მას ცალკე ოთახში და დარწმუნებას გავაგრძელებდი. სწრაფად შევუთანხმდებოდი. შედეგი კი იცით როგორი იქნებოდა? სიკვდილი და ნგრევა შეჩერდებოდა. ახლა კი უკრაინის აღგვა მიმდინარეობს პირისაგან მიწისა.

წყარო: https://www.foxnews.com/politics/trump-claims-conversation-putin-delayed-russian-invasion-ukraine