,
დედაქალაქის მერი კახა კალაძე უნივერსიტეტის ქუჩაზე „თეგეტა ჰოლდინგის“ მულტიფუნქციური საავტომობილო კომპლექსის გახსნას დაესწრო.
კახა კალაძემ ღონისძიებაზე დამსწრე საზოგადოებას სიტყვით მიმართა და პირველ რიგში, ევროკავშირის წევრობის კანდიდატის სტატუსის მიღება მიულოცა.
„ყველა, ვისაც უხარია ქვეყნის განვითარება და წინსვლა, ბედნიერი და გახარებულია. კიდევ ერთხელ ყველას, სრულიად საქართველოს ვულოცავ და უნდა გავაგრძელოთ ეს გზა ევროპისკენ, სხვანაირად წარმოუდგენელი და შეუძლებელია. ეს პროექტიც მეტყველებს იმაზე, რომ საქართველო არის ევროპა, თბილისი არის ევროპული ქალაქი. მე, როგორც დედაქალაქის მერს, როგორც ამ ქალაქში მცხოვრებ რიგით ადამიანს ნამდვილად მეამაყება, რომ ასეთი პროექტები ხორციელდება“, - განაცხადა კახა კალაძემ.
თბილისის მერმა მადლობა გადაუხადა „თეგეტა ჰოლდინგის“ დამფუძნებელს, თემურ კოხოძეს და ქვეყნის განვითარებაში ბიზნეს სექტორის როლზე ისაუბრა.
"შეიძლება ითქვას, რომ საქართველოში ერთ-ერთი საუკეთესო სერვის-ცენტრი არის. ყველაფერია გათვალისწინებული, მათ შორის სწრაფი დამტენები ელექტრომობილებისთვის, რაც ძალიან მიხარია. ჩვენ, თბილისის მერია, მუნიციპალიტეტი ვცდილობთ ხელი შევუწყოთ ამ მიმართულების პოპულარიზაციას, რათა მეტი ელექტრომობილი შემოვიდეს დედაქალაქში. გარდა ამისა, მნიშვნელოვანია, რომ 100-ზე მეტი სამუშაო ადგილი შეიქმნა ამ პროექტის ფარგლებში. ზოგადად, ბიზნესისა და მთავრობის ურთიერთობა არის მნიშვნელოვანი, რადგან ბიზნესი ხელს უწყობს ქვეყნის ეკონომიკურ განვითარებას და დოვლათის შექმნას. მინდა იცოდნენ ბიზნეს სექტორის წარმომადგენლებმა, რომ საქართველოს ხელისუფლების, თბილისის მერიის მხრიდან ყოველთვის იქნება მხარდაჭერა და თანადგომა იმისთვის, რომ მოხდეს ეკონომიკური განვითარება, წინსვლა, იმისთვის, რომ მეტი ადამიანი დაასაქმოთ და მეტი დოვლათი შექმნათ ქვეყანაში“, - განაცხადა კახა კალაძემ.
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
