,
გერმანიის გაზეთ „ზიუდდოიჩე ცაიტუნგში“ (Süddeutsche Zeitung - იბეჭდება მიუნჰენში) გამოქვეყნებულია სტატია-რეცენზია სათაურით „მზერა აღმოსავლეთისაკენ: ქართული და ქურთული ფილმების დღეები მიუნჰენში“ (ავტორი - იოზეფ გრიუბლი).
კვალს აღმოსავლეთისაკენ მივყავართ, ყოველ შემთხვევაში, ეკრანზე ასე ჩანს: მიუნჰენში ქართული და ქურთული კინოს დღეები იწყება, რომლებიც ოთხი დღის განმავლობაში გაგრძელდება - 13 ივნისიდან 16 ივნისის ჩათვლით. ვერ ვიტყვით, რომ ორგანიზატორთა მიერ მოწყობილი პარალელური პროგრამა კარგი იდეაა, რადგან ფილმების ჩვენება დროში ხშირად ერთმანეთს ემთხვევა, ამიტომ, მაყურებლებს, ბუნებრივია, მოუწევთ არჩევანის გაკეთება - რომელ აქტუალურ მხატვრულ, დოკუმენტურ, საბავშვო თუ მოკლემეტრაჟიან ფილმებს უყურონ - ქართულს თუ ქურთულს?
კინოს მუზეუმის დარბაზში ქართული ფილმების დემონსტრაცია იწყება დოკუმენტური ფილმით „ღიმილიანი საქართველო“, რომელშიც ნაჩვენებია უკბილო ადამიანების ბედი, რომლებიც ხელისუფლების მხრიდან ცრუ დაპირების მსხვერპლნი გახდნენ: 2012 წელს საქართველოს იმდროინდელმა პრეზიდენტმა მიხეილ სააკაშვილმა მოსახლეობას, წინასაარჩევნო კამპანიის ჩარჩოებში, კბილის პროთეზების უფასოდ დამზადება აღუთქვა. მოხდა ისე, რომ ადამიანებს კბილები დააძრეს, პრეზიდენტის პარტიამ კი არჩევნები წააგო და ადამიანები უკბილოდ დარჩნენ. ათი წლის შემდეგაც კი ბევრს საკვების მიღება ნორმალურად არ შეუძლია. ამ ფილმის გარდა, ნაჩვენები იქნება კიდევ ორი ქართული კინოსურათი - პირველი „სასტუმრო მეტალურგი“ დოკუმენტურია და მოგვითხრობს აფხაზეთიდან დევნილი ქალების შესახებ, რომლებმაც წყალტუბოს ერთ-ერთ სასტუმროში 3 ათწლეულზე მეტი იცხოვრეს. მეორე - მხატვრული ფილმი „შავი შაშვი მაყვალი“ - ასახავს მარტოხელა, გაუთხოვარი შუახნის ქალის ცხოვრებას, რომელსაც სიყვარული გვიან, 50 წლის ასაკში ეწვია.
რაც შეეხება ქურთულ ფილმებს, ისინი უფრო მრავალფეროვნად არიან წარმოდგენილი და, შესაბამისად, მაყურებელს მათი ფართოდ გაცნობის მეტი შესაძლებლობა ექნება. ფილმების ჩვენება იხსნება რეჟისორ სინ მუჰამედის დრამით „გარდამავალი ბედნიერება“, რომელშიც მოხუც კაცს თავისი სნეული მეუღლე საავადმყოფოში მოტოციკლეტით დაჰყავს. რეჟისორ აიშე პოლატის მიერ გადაღებული თრილერ „მკვდარი ზონის“ მოქმედება თურქეთის ჩრდილო-აღმოსავლეთ რეგიონში მიმდინარეობს (ფილმმა ამას წინათ გერმანული კინოპრემია მიიღო). სოლინ იუსეფის ფილმში „გახდი გამარჯვებული“ გადმოცემულია სირიელი ქურთი ლტოლვილი ქალიშვილის ბედი გერმანიაში.
ქართული ფილმები ჩვენება: სანქტ-იაკობს პლაცზე მდებარე კინოს მუზეუმში 13-16 ივნისს (ხუთშაბათიდან კვირის ჩათვლით), 13 საათზე; ქურთული ფილმების ჩვენება: ჰანსპრესიგერშტრასეზე მდებარე კინოდარბაზში, 13-16 ივნისს (ხუთშაბათიდან კვირის ჩათვლით), 13 საათზე.
„მიუხედავად იმისა, რომ ყოფილ პრეზიდენტ დონალდ ტრამპთან გამართული ტელედებატები ჯო ბაიდენისათვის წარუმატებელი აღმოჩნდა, მისი როგორც საპრეზიდენტო კანდიდატის შეცვლა რთული იქნება“, - ნათქვამია აშშ-ის გაზეთ „ვაშინგტონ პოსტში“ (The Washington Post) გამოქვეყნებულ სტატიაში სათაურით „ათი ვარიანტი იმისათვის, თუ დემოკრატებს ნამდვილად სურთ ჯო ბაიდენის სხვა კანდიდატით ჩანაცვლება“ (ავტორი - აარონ ბლეიკი). პუბლიკაციაში განხილულია ის ათი პოლიტიკოსი, რომელთაგან ერთ-ერთი შესაძლოა დემოკრატების საპრეზიდენტო კანდიდატი გახდეს, ტელედებატების დროს ფაქტიურად დამარცხებული ჯო ბაიდენის ნაცვლად.
გთავაზობთ სტატიას შემოკლებული სახით:
აშშ-ის დემოკრატიულმა პარტიამ 2024 წლის წინასაარჩევნო კამპანიაში დიდი დრო დახარჯა იმაში, რომ სირაქლემასავით „თავი ქვიშაში ჰქონდა ჩაყოფილი“ - თითქოსდა ჯო ბაიდენის მდგომარეობის გამო, ასაკთან დაკავშირებით, არც არაფერი ესმოდა და არც არაფერს ხედავდა. იმის ნაცვლად, რომ პრობლემა როგორმე მოეგვარებინა, პარტიის გავლენიანი პირები გაიძახოდნენ, რომ პრეზიდენტი თავს ნორმალურად გრძნობს, არაფერი არ აწუხებს და პრესაში რაც იწერება, გადაჭარბებული და გაბერილი ამბებიაო.
მაგრამ როცა ჯო ბაიდენი და დონალდ ტრამპი ერთმანეთს ტელედებატებში შეხვდნენ, როცა პრეზიდენტის დაბნეული და გაუგებარი გამოსვლის შემდეგ კრიტიკოსებმა ნეგატიური შეფასებები გააკეთეს, დემოკრატებმა უცებ ამოჰყვეს თავი ქვიშიდან, გამოფხიზლდნენ და ჯო ბაიდენს გადადგომისაკენ მოუწოდეს - ასე აცხადებენ ისინიც კი, ვინც მას ბოლო დრომდე ლოიალურად უყურებდა.
ასეთი ელვისებური რეაქცია ბევრ რამეზე მეტყველებს. პარტია თავს არიდებდა მსგავს ტელეგამოსვლებს, მაგრამ დგება მომენტი, როცა ტელედებატები აბსოლუტურად აუცილებელი ხდება. დემოკრატები მძიმე სიტუაციაში არიან ჩავარდნილნი: ისინი აცნობიერებენ, რომ თუ ჯო ბაიდენი კიდევ ასე გამოვა ამერიკელების წინაშე, „მისი საქმე წასულია“. თვით პარტიის წევრები და მხარდამჭერები პირდაპირ და ირიბად აცხადებენ, რომ სამომავლოდ პრეზიდენტი მის წინაშე მდგარ ამოცანებს ვერ გაუმკლავდება.
ჯო ბაიდენის როგორც პრეზიდენტობის კანდიდატის გადადგომისათვის, ალბათ, მისივე თანხმობაც არის საჭირო - სწორედ ის აგროვებს ყველა დელეგატს დემოკრატიული პარტიის ეროვნული ყრილობისათვის, აგვისტოში, როცა მისი კანდიდატურა ოფიციალურად უნდა დამტკიცდეს. მაგრამ ამ შემთხვევაშიც კი კანდიდატის შეცვლა დიდ სირთულეებთან იქნება დაკავშირებული. კაცმა რომ თქვას, არავინ იცის, ალტერნატიული კანდიდატი რით იქნება ჯო ბაიდენზე უკეთესი.
თუ დემოკრატიული პარტია ამ გზით გადაწყვეტს სვლას, ჩვენ, რასაკვირველია, გავიგებთ. ამიტომ მოდით, ზოგიერთი სავარაუდო კანდიდატის ირგვლივ ვიმსჯელოთ, მათი პლუსებისა და მინუსების გათვალისწინებით.
ძნელი წარმოსადგენია, რომ 60 წლის კამალა ჰარისი უარს იტყვის თავისი ბოსის ჩანაცვლებაზე, თუ, რა თქმა უნდა, ნებაყოფლობით არ გადადგება მასთან ერთად (ჯო ბაიდენს კამალა ჰარისი სამომავლოდ ისევ ვიცე-პრეზიდენტობის კანდიდატად ჰყავს განზრახული). ბოლოს და ბოლოს, კამალა ჰარისი მოქმედი ვიცე-პრეზიდენტია, პირველი ქალი ვიცე-პრეზიდენტი ქვეყნის ისტორიაში და თანაც შავკანიანი. კამალა ჰარისის როგორც პრეზიდენტობის კანდიდატის უარყოფა დემოკრატიული პარტიისათვის სარისკო იქნება - დემოკრატებს ხომ ბევრი შავკანიანი მხარდამჭერი ჰყავთ, ისინი პარტიის ელექტორალური ბაზის საფუძველს წარმოადგენენ.
პრობლემა იმაშია, რომ კამალა ჰარისი ზოგადად არაპოპულარულია - ისევე როგორც ჯო ბაიდენი. ამას წინათ მომუტისა(ნიუ-ჯერსი) და სუფოლკის (მასაჩუსეტსი) უნივერსიტეტების მიერ ჩატარებულმა გამოკითხვებმა აჩვენეს, რომ იგი საშუალოდ მხოლოდ 18%-იანი პოპულარობით სარგებლობს. დემოკრატები ეჭვობენ, რომ კამალა ჰარისი ჯო ბაიდენზე უკეთესი იქნება..
რესპუბლიკელებმა, თავის მხრივ, ღიად განაცხადეს, რომ ჯო ბაიდენის კამალა ჰარისით ჩანაცვლება მათთვის ხელსაყრელია. დონალდ ტრამპის შტაბმა ინფორმაციაც კი გაავრცელა, რომ რაღაც მომენტში ჩანაცვლება საჭირო გახდებაო. ტრამპისტებს აწყობთ, რომ სუსტი და აარაპოპულარული მეტოქე ჰყავდეთ.
უახლოეს დღეებში 52 წლის გრეტხენის სახელი ხშირად იქნება მასმედიაში. მიჩიგანის შტატის გუბერნატორი ნდობას იწვევს და ქაღალდზე თითქმის იდეალურად გამოიყურება. მართალია, იგი სტრატეგიულად მნიშვნელოვანი „მოყოყმანე“ შტატის გუბერნატორს წარმოადგენს, მაგრამ, შეიძლება გასაკვირიც იყოს, რომ მისი რეიტინგი 54-61%-ს აღწევს. გრეტხენ უიტმორს, სხვა თავის დემოკრატ კოლეგებთან შედარებით, ფედერალური დონის გამოცდილება აქვს.
ალბათ, ყურადღება უნდა მიექცეს იმ ფაქტს, რომ 42 წლის პიტ ბუტიჯიჩმა 2020 წელს, როცა დემოკრატიული პარტიის ერთ-ერთი საპრეზიდენტო კანდიდატი იყო, აიოვასა და ნიუ-ჰემპშირის შტატებში თითქმის პირველი ადგილი აიღო. იგი კარგად ფლობს ორატორულ ხელოვნებას. და თუ დემოკრატები ჯო ბაიდენის ჩანაცვლებას შეეცდებიან, პიტ ბუტიჯიჩის კანდიდატურა მათთვის ხელსაყრელია. მაგრამ... იგი ის კაცი არ არის, რომელიც დემოკრატების მრავალრიცხოვანი ამომრჩევლისათვის - შავკანიანი ელექტორატისათვის იქნება მისაღები. გარდა ამისა, შესაძლოა ნეგატიური როლი შეასრულოს იმ ფაქტმა, რომ იგი ღიად აცხადებს თავის არატრადიციულ სექსუალურ ორიენტაციას. საეჭვოა, რომ ამერიკელებმა პრეზიდენტად ასეთი პოლიტიკოსი აირჩიონ.
51 წლის ჯოშუა დემოკრატიული პარტიის ერთ-ერთ ამომავალ ვარსკვლავს წარმოადგენს. იგი ძალიან პოპულარულია დემოკრატებისათვის სტრატეგიულად მნიშვნელოვან შტატში. ახლახან ჩატარებული გამოკითხვების მიხედვით, ჯოშუა შაპირო დონალდ ტრამპის მომხრეებშიც კი გარკვეული სიმპათიებით სარგებლობს. მაგრამ გუბერნატორს დემოკრატები 2028 წლის საპრეზიდენტო არჩევნებისათვის „ინახავენ“, თანაც იგი მხოლოდ წელიწადნახევრის წინ დაინიშნა ამ პოსტზე.
იგი ყოფილი კონგრესმენია. მას ნამდვილად სურს საკუთარი თავი ქვეყნის პრეზიდენტად იხილოს. მართალია, იგი პოპულარულია, მაგრამ... 49 წლის ჯარედ პოლისი პირველი გუბერნატორია, რომელიც ღიად აცხადებს თავის არატრადიციული ორიენტაციას.
იგი ადრე სან-ფრანცისკოს მერი იყო და ამ მნიშვნელოვან თანამდებობაზე წარმატებით მუშაობდა, რისთვისაც თანაპარტიელებში დადებითი ავტორიტეტის და რეპუტაცია აქვს. მაგრამ ძალიან ძნელია წარმოიდგინო ის, რომ დემოკრატიულმა პარტიამ კანდიდატად 56 წლის გევინ ნიუსომი დაამტკიცოს. იმიტომ, რომ მთლიანად კალიფორნიაში კრიმინოგენური სიტუაცია ძალიან მძიმეა. შესაბამისად, მისი სახელი ხელსაყრელი იქნება რესპუბლიკელებისათვის, კრიტიკის თვალსაზრისით.
55 წლის შავკანიანმა ბაპტისტმა მღვდელმა და პოლიტიკოსმა ორჯერ ზედიზედ მოიგო კონგრესის არჩევნები. ანუ მისი შანსები ბევრად უფრო მეტია, ვიდრე სხვა შავკანიანი კანდიდატებისა, რომლებთაც ადრე კონგრესმენობის სურვილი ჰქონდათ. აქედან გამომდინარე, იგი სასარგებლო პიროვნება აღმოჩნდებოდა დემოკრატებისათვის.
60 წლის ქალბატონი დემოკრატებისათვის ფანტასტიკური ვარიანტი იქნებოდა, მაგრამ ნაკლებად სავარაუდოა, რომ იგი კანდიდატის სტატუსს დათანხმდეს. მიშელ ობამა ყველაზე პოპულარულ ყოფილ პირველ ლედად ითვლება ამერიკაში, ბიორდ ჯონსონის - პრეზიდენტ ლინდონ ჯონსონის ცოლის შემდეგ. მიშელი ყოველთვის მოსწონდა ამერიკელთა უმრავლესობას, რასაც ვერ ვიტყვით ბევრი პირველი ლედის მიმართ.
მაგრამ მას, რომელსაც არავითარი სახელმწიფო თანამდებობა არ უკავია, ჯერ ერთი, რომ საერთოდ არ განუცხადებია პრეზიდენტად ბალოტირების სურვილი და რომც განაცხადოს, ახლა საპრეზიდენტო კამპანიის ფაქტიურად ნოლიდან დაწყება, ისევე როგორც სხვებისთვის, მიშელ ობამასთვისაც რთული იქნება. გარდა ამისა, როგორც გაირკვა, აშშ-ის 49-ე პირველ ლედის საკმაოდ დაძაბული ურთიერთობა ჰქონია ჯო ბაიდენის საარჩევნო შტაბთან. მოკლედ, მიშელ ობამას ვარიანტზე ფიქრი მხოლოდ უკიდურეს შემთხვევისთვის შეიძლება.
მისი კანდიდატურის წამოყენება ყველაზე ლოგიკური იქნებოდა იმ შემთხვევისათვის, თუ დემოკრატები ბაიდენის თვისებების მქონე პიროვნების (ფაქტიურად - „ტყუპისცალის“) ძებნას დაიწყებენ, ასაკის გამოკლებით. 64 წლის ქალბატონი პრაგმატულია და ზოგადად სიმპათიებს იწვევს, მაგრამ ქვეყნის მასშტაბით თითქმის არ იცნობენ. ემი კლობუშარის გაშვება დონალდ ტრამპის წინააღმდეგ? არა, იგი აბსოლუტური მარცხისთვის იქნება განწირული.
არცერთ სხვა ჩამოთვლილთაგანს ბოლო თვეებში შანსები არ გაზრდია, როგორც ეს 46 წლის გუბერნატორს გაეზარდა. ენდი ბაშირის წარმატება დაკავშირებულია იმასთან, რომ იგი გუბერნატორად 2023 წლიდან მეორედ აირჩიეს და თანაც ისეთ შტატში, რომელიც ხმას ტრადიციულად რესპუბლიკელებს აძლევს. თუ გავითვალისწინებთ იმ გარემოებას, რომ ხშირად გუბერნატორები ისე საქმიანობენ, რომ მათი პოზიციები მათივე პარტიის პოლიტიკის საწინააღმდეგოა ხოლმე, მაშინ, შეიძლება ითქვას, რომ ენდი ბაშირი ორივე პარტიას აწყობს.
წყარო: https://www.washingtonpost.com/politics/2024/06/28/democrat-options-replace-biden/
--------------
შენიშვნა: ბრიტანული სამაუწყებლო კომპანიის „ბი-ბი-სი“-ს რუსულენოვანი სამსახურის (BBC russian) ცნობით, აშშ-ის პრეზიდენტმა ჯო ბაიდენტმა დაარწმუნა დემოკრატიული პარტიის დონორები, რომ მას შეუძლია რესპუბლიკელი მეტოქის დონალდ ტრამპის დამარცხება ნოემბრის საპრეზიდენტო არჩევნების დროს და ეს მიუხედავად იმისა, რომ ჯო ბაიდენის კანდიდატურის ირგვლივ ეჭვები ძლიერდება - ტელედებატებით ნათელი გახდა, რომ იგი წარუმატებლად გამოვიდა.
ჯო ბაიდენმა 30 ივნისს ნიუ-იორკში ერთ-ერთ ღონისძიებაში მონაწილეობის დროს აღიარა, რომ ტელედებატები მისთვის სასიამოვნო არ იყო, მაგრამ იქვე დაამატა: „არც დონალდ ტრამპისთვის იყო უკეთესი“. „გპირდებით, რომ ჩვენ ამ არცევნებს მოვიგებთ:, - განაცხადა პრეზიდენტმა (წყარო: https://www.bbc.com/russian/articles/cn07mmyyg8no).
