დანიის მთავრობამ და წამყვანმა პოლიტიკურმა პარტიებმა 27 იანვარს გამოაცხადეს, რომ მიაღწიეს შეთანხმება არქტიკასა და ჩრდილო ატლანტის ოკეანეში თავდაცვის ხარჯების 14.6 მილიარდი დანიური კრონით ($2 მილიარდზე მეტი) გაზრდაზე.

ამის შესახებ დანიის თავდაცვის სამინისტრომ განაცხადა.

დანიის მთავრობასა და პარლამენტს შორის პოლიტიკური შეთანხმება ითვალისწინებს 2 მილიარდ დოლარზე მეტის გამოყოფას სამხედრო წარმომადგენლობის გასაძლიერებლად, პირველ რიგში, არქტიკაში.

შეთანხმების ფარგლებში სამი საზღვაო ხომალდის, ორი დამატებითი შორ მანძილზე მოქმედი თვითმფრინავის და თანამგზავრების განთავსება დაფინანსდება რეგიონში სადაზვერვო ინფორმაციის შესაგროვებლად.

დანიის მთავრობა აღნიშნავს, რომ ახალი ფინანსური რესურსის გამოყოფა ფარერის კუნძულების და გრენლანდიის ხელისუფლებასთან შეთანხმებულია.

"დანიის სადაზვერვო სამსახურის თანახმად, არქტიკაში და ჩრდილო ატლანტიკაში საფრთხის დონე გაუარესდა, ამიტომ, ჩვენ მნიშვნელოვნად უნდა გავაძლიეროთ ჩვენი თავდაცვითი წარმომადგენლობა ამ რეგიონებში," - განაცხადა დანიის თავდაცვის მინისტრმა ტროელს ლუნდ პულსენმა.

ტრამპი ახლახან დაუბრუნდა სტრატეგიულად მნიშვნელოვანი და ბუნებრივი რესურსებით მდიდარი არქტიკული კუნძულის შეძენის იდეას. მან ეს იდეა თავისი პირველი ვადის დროსაც ჰქონდა და კუნძულზე ამერიკის კონტროლის დამყარებას გლობალური უსაფრთხოებისთვის "აბსოლუტური აუცილებლობა" უწოდა.

ცოტა ხნის წინ მედიამ გაავრცელა ინფორმაცია ტრამპისა და დანიის პრემიერ-მინისტრ მეტე ფრედერიკსენის დაძაბული სატელეფონო საუბრის შესახებ.

Financial Times-ის ცნობით, 45 წუთიანი საუბარი გასულ კვირას, ტრამპის ინაუგურაციამდე შედგა, მაშინ თეთრ სახლს ამაზე კომენტარი არ გაუკეთებია. საუბრის შემდეგ ფრედერიკსენმა ხაზგასმით აღნიშნა, რომ კუნძული, რომელიც დანიის ავტონომიური ტერიტორიაა, არ იყიდება და აღნიშნა, რომ შეერთებულ შტატებს "დიდი ინტერესი" აქვს ამ ტერიტორიის მიმართ.

ხუთმა ამჟამინდელმა და ყოფილმა მაღალჩინოსანმა, რომლებიც ინფორმირებული არიან საუბრის შესახებ, განაცხადეს, რომ საუბარი ძალიან ცუდად წარიმართა. მათ აღნიშნეს, რომ ტრამპი აგრესიული და კონფრონტაციული იყო დანიის პრემიერ-მინისტრის განცხადების შემდეგ, რომ კუნძული არ იყიდება, სამხედრო ბაზებისა და ბუნებრვი რესურსების განვითარებაზე მეტი თანამშრომლობის შეთავაზების მიუხედავად.