,
პროტესტი მშენებლობის წინააღმდეგ - ჭყონდიდელის ქუჩის მოსახლეობა დახმარებას ითხოვს. ადგილობრივები 11-სართულიანი კორპუსის მშენებლობას ეწინააღმდეგებიან.
ხალხი ამტკიცებს, რომ კომპანია "ბინექსი" მრავალსართულიან საცხოვრებელ კომპლექს სანებართვო პირობების დარღვევით აშენებს.
მიუხედავად მერიის მიერ გაცემული ნებართვისა, ადგილობრივები ამბობენ, რომ კომპანიას სამხარაულის ბიუროს დასკვნა არ წარუდგენია და კორპუსის მშენებლობა კერძო დასკვნის საფუძველზე ხდება.
მოქალაქეებმა დღეს მშენებელი კომპანიის წარმომადგენლებს საექსპერტო დასკვნები და გეოლოგიური კვლევები მოსთხოვეს, თუმცა კომპანიამ მოცემული დოკუმენტები ვერ წარადგინა.
"ხელმოწერილი სამშენებლო დოკუმენტი უნდა გედოთ სამუშაოების დაწყებამდე. ვალდებული ხართ, რადგან ბრძანებაში გიწერიათ. სამშენებლო მიწის ნაკვეთის საინჟინრო გეოლოგიური კვლევა სად გაქვთ? არ გაქვთ. მიწის ნაკვეთის მშენებლობის ნებართვის გაცემის წესი და სანებართვო პირობები. მშენებლობის ორგანიზაციის პროექტი ახალ გამოაკარით პატრული რომ მოვიდა. რომელი გიდევთ აქედან. სამშენებლო მოედანზე ვდგავართ", - ამბობს ადგილობრივი.
ხმაურის შემდეგ ადგილზე მუნიციპალური ინსპექცია მივიდა, რომელმაც გადაწყვიტა, რომ მშენებლობა დროებით, ორშაბათამდე შეაჩერონ იმ პირობით, რომ 17 ივნისს "ბინექსის" წარმომადგენლები მერიაში მივლენ და გეოლოგიურ დასკვნა წარადგენენ.
მოსახლეობა "პირველებთან" აცხადებს, რომ ასაშენებელი კორპუსები მეტროს სავენტილაციო შახტის მიმდებარედ არის განლაგებული, ამიტომ ამ ტერიტორიაზე მშენებლობა დაუშვებელია.
ამასთანავე, ადგილობრივები უკმაყოფილებას გამოთქვამენ "ბინექსის" მიერ აშენებულ კორპუსებთან დაკავშირებით და ამბობენ, რომ კომპანიის მიერ აგებულ საცხოვრებლებს ბზარები გააჩნია.
