„ჩვენ უკვე გვაქვს რკინიგზა აღმოსავლეთიდან დასავლეთისკენ. ჩვენთვის გაიხსნა ახალქალაქი-ყარსის რკინიგზა, ასევე, გაიხსნა რკინიგზა აზერბაიჯანის გავლით და მალე გაიხსნება TRIPP-იც (ტრამპის მარშრუტი). ამასთან, ჩვენს ქვეყანაზე გაივლის გაზსადენი და ამ ტრანზიტის სანაცვლოდ გაზს მივიღებთ,“ - განაცხადა ფაშინიანმა წინასაარჩევნო მიტინგზე.

მას სატრანზიტო გაზსადენის შესახებ დამატებითი დეტალები არ გაუმჟღავნებია, თუმცა აღნიშნა, რომ სომხეთი ალტერნატიულ ენერგეტიკას განავითარებს.

ფაშინიანმა ამომრჩევლებს შეახსენა, რომ ქვეყანას მიღებული აქვს კანონი ევროკავშირში გაწევრიანების პროცესის დასაწყებად.

„სანამ სომხეთს შეუძლია, ერთდროულად ევრაზიული ეკონომიკური კავშირის წევრიც იყოს და თან, ევროპული სტანდარტების მისაღწევად რეფორმები გაატაროს, ჩვენ ამ გზას გავაგრძელებთ. როცა არჩევანის დრო მოვა, ჩვენ ჩვენს არჩევანს გავაკეთებთ... ჩვენ უნდა გვქონდეს ალტერნატივა, რომ არავინ თქვას სომხეთზე, თითქოს, ის ვერსად ვერ წავა, რადგან არავის სჭირდება,“ - ამბობს ფაშინიანი.

პრემერის პროგნოზით, სომხეთი მსოფლიოს გზაჯვარედინად იქცევა, რადგან ეს ქვეყანა „ჩრდილოეთს, სამხრეთს, აღმოსავლეთსა და დასავლეთს სჭირდება და ყველა მათგანმა საუკეთესო წინადადება უნდა შესთავაზოს სომეხ ხალხს, რომელიც თავის არჩევანს გააკეთებს.“

„ჩვენ აღარ ვართ კონფლიქტის ჩიხი; ჩვენ მსოფლიოს გზაჯვარედინი ვართ,“ - ამბობს ფაშინიანი.

ცნობისთვის: რუსეთის ენერგეტიკის მინისტრი, სერგეი ცივილევი ერევანს წერილობით დაემუქრა, რომ თუ სომხეთი ევროკავშირთან დაახლოებას გააგრძელებს, მოსკოვი ცალმხრივად შეაჩერებს ან შეწყვეტს ბუნებრივი აირისა და ნავთობპროდუქტების მიწოდებასთან დაკავშირებულ ხელშეკრულებებს. კერძოდ, 2013 წლის შეთანხმებით, რუსეთმა სომხეთში ნავთობპროდუქტებზე, გაზსა და ბრილიანტებზე საექსპორტო გადასახადები უვადოდ გააუქმა. დოკუმენტი იყო ნაბიჯი ქვეყნის ევრაზიულ ეკონომიკურ კავშირში გაწევრიანებისკენ და ამჟამად სომხეთი რუსულ გაზზე, თითქმის, მთლიანად არის დამოკიდებული. 2025 წელს „გაზპრომმა“ ქვეყანას, დაახლოებით, 2.7 მლრდ კუბური მეტრი გაზი მიაწოდა. თავად პუტინი ამბობს, რომ ერევნისთვის ამჟამინდელი შეღავათიანი ფასი ათას კუბურ მეტრზე 177 დოლარს შეადგენს, ხოლო 25 მაისს მისმა პრესმდივანმა, დიმიტრი პესკოვმა ერევანი გააფრთხილა, რომ თუ სომხეთი ევრაზიული ეკონომიკური კავშირიდან გავა, გაზის ფასი საბაზრო გახდება.

ასევე, სომხეთი უბაჟოდ რუსეთიდან ყოველწლიურად, დაახლოებით, 0.9-1 მლნ ტონა ნავთობპროდუქტების იმპორტს ეწევა. თუმცა ბოლო წლებში რესპუბლიკა მიწოდების დივერსიფიკაციას ახდენს, კერძოდ, AI-95-ის ბენზინს რუმინეთიდან, ეგვიპტიდან და ბულგარეთიდან, ხოლო 2025 წლის დეკემბრიდან აზერბაიჯანიდან ყიდულობს. მშვიდობის დამყარების შემდეგ ბაქომ ერევნისთვის სატრანზიტო შეზღუდვები მოხსნა და როგორც პრეზიდენტი, ილჰამ ალიევი ამბობს, მიწოდების მოცულობამ უკვე 12 000 ტონას მიაღწია.