,
ჩრდილოეთ კორეიდან გაშვებული ნაგვით სავსე ბუშტი სამხრეთ კორეის პრეზიდენტის რეზიდენციის ტერიტორიაზე ჩამოვარდა, - ამის შესახებ ინფორმაციას სამხრეთ კორეის საინფორმაციო სააგენტო Yonhap-ი ავრცელებს.
გამოცემის ინფორმაციით, ადგილზე მობილიზებული იყო ქიმიურ, ბიოლოგიურ და რადიოლოგიურ საფრთხეებზე რეაგირების ჯგუფი, რომელმაც ნაგავი შეაგროვა და ადგილიდან გაიტანა. მათ დაადგინეს, რომ ნაგავი რაიმე დამატებით საფრთხეს არ შეიცავდა.
სეული დემილიტარიზებული ზონიდან მხოლოდ 56 კილომეტრში მდებარეობს. უცნობია, იმყოფებოდა თუ არა ინციდენტის დროს კომპლექსში სამხრეთ კორეის პრეზიდენტი იუნ სოკ იოლი.
ე.წ. ბუშტებით თავდასხმა სამხრეთ კორეის მიმართულებით ფხენიანმა მაისში დაიწყო. საჰაერო ბუშტებს პლასტიკი, სიგარეტების ნამწვავები და სხვა ნაგავი გადააქვთ. საპასუხოდ სეულმა საზღვართან პროპაგანდისტული მაუწყებლობა აღადგინა.
