,
სოფლის მეურნეობის ეკოლოგიურად სუფთა პროდუქტის მწარმოებელი კომპანია “ჯი ეს ეი ტექნოლოგიები” თანამედროვე სასათბურე მეურნეობის განვითარების მესამე ეტაპზე გადავიდა.
კომპანია „ჯი ეს ეი ტექნოლოგიები“ 7 თვეა, რაც სოფლის მეურნეობის დარგში ინოვაციურ ტექნოლოგიას „ჭკვიან აეროპონიკას“ მართვას. სოფლის მეურნეობის ეკოლოგიურად სუფთა პროდუქტის მწარმოებელი კომპანია მიზნად ისახავს, საქართველოში პირველად დანერგოს სოფლის მეურნეობის 100%-ით ეკოლოგიურად სუფთა პროდუქტის მწარმოებელი თანამედროვე სასათბურე მეურნეობა, რომლის ეფექტურობის წყარო აეროპონიკის სისტემაში ინტეგრირებული მცენარეთა ვეგეტაციის პროცესის მართვის ინოვაციური პროგრამული უზრუნველყოფაა (software). პროექტის ინოვაციურობა, რომელიც ტექნოლოგიის დატესტვის პერიოდში გამოიკვეთა, ისაა, რომ მსგავს ტექნოლოგიებში “ჭკვიანი აეროპონიკა” პირველია, რომელსაც ერთწლოვან კულტურებთან ერთად მრავალწლოვანი კულტურებიც მოჰყავს.
კომპანიის თანამდეფუძნებელი ონისე ზივძივაძე BM.GE-თან „ჭკვიანი აეროპონიკის“ მოქმედების გამართულობაზე საუბრობს და განმარტავს, რომ ტექნოლოგიების გამოცდის 7-თვიანი სატესტო რეჟიმი 100%-იანი წარმატებით მიმდინარეობს. მისი თქმით, პროცესში კვალიფიციური აგრონომების ჩართვა დაიწყო, რაც სოფლის მეურნეობის პროდუქტების ტექნოლოგიურ წარმოებას განვითარებას ახალ ეტაპზე გადაიყვანს.
„ზამთარში სხვადასხვა ერთწლოვანი და მრავალწლოვანი კულტურების დარგვა დავიწყეთ, რაც დეფიციტური და არადეფიტირია ყველაფერი კულტურა დავრგეთ - სატაცური, მარწყვი, სალათი, რეჰანი, ვარდი, ჟოლო... ყველა მათგანი დავამწიფეთ, თუმცა პირველ ეტაპზე ეს აგრონომების გარეშე შევძელით. ძირითადად ტექნიკურ საკითხებზე ვმუშაობდით. ტექნიკურად ტექნოლოგიას ხარვეზი არ უფიქსირდება, 7 თვეა სატესტო რეჟიმშია და კარგად მუშაობს. ახლა აგრონომიული ნაწილი დაგვრჩა დასახვეწი, რომ საბოლოო პარამეტრები ვიცოდეთ სად, რომელი კულტურა, რა დროში რამდენი კილოგრამი შეგვიძლია მივიღოთ. გვინდა, რომ 100%-ით ეფექტურობა ვაჩვენოთ და აგრონომებთან ერთად საბოლოო პაკეტები შევქმნათ. აგრონომმა მაღალკვალიფიციურად იცის რა, როგორ უნდა დახვეწოს იმისთვის, რომ სუფთა პროდუქტი მივიღოთ. ვფიქრობ, დაახლოებით თვენახევარში ამ პროცესს დავასრულებთ“, - ამბობს “ჯი ეს ეი ტექნოლოგიების“ თანადამფუძნებელი.
მისი საუბრიდან ირკვევა, რომ სოფლის მეურნეობის ტექნოლოგიური მიდგომებისადმი ინტერესი დიდია, შესაბამისად კომპანია განვითარებისთვის საჭირო ფინანსების მოსაზიდად ინოვაციებისა და ტექნოლოგიების სააგენტოს საგრანტო კონკურსში აპირებს მონაწილეობას.
„მოთხოვნა ძალიან დიდია, ყველა კატეგორია მოდის ვისაც ინვესტიციის განხორციელება სტაბილურ ბინზესში უნდა. ჩვენ შეგვიძლია ამ დანადგარით წლის ნებისმიერ დროს ნებისმიერი სახეობის დეფიციტური თუ არადეფიტური პროდუქტი ვაწარმოოთ. ინოვაციებისა და ტექნოლოგიების სააგენტოს კონკურსში მოგებული 100 000-ლარიანი გრანტი უკვე ამოვწურეთ და ახლა განაცხადი მომდევნო ეტაპზე - 650 ათას ლარიან პროექტზე შევიტანეთ. რა თქმა უნდა განვითარება ჩვენითაც შეგვიძლია, წინასწარი შეკვეთებით, თუმცა გრანტი მოკლე დროში დიდი საწარმოს მოწყობაში დაგვეხმარება, რაც დიდი მოცულობის შეკვეთების სწრაფად დაკმაყოფილების საშუალებას მოგვცემს“, - აცხადებს ზივზივაძე.
“ჯი ეს ეი ტექნოლოგიები” პროექტის ადგილობრივ ბაზარზე განვითარების შემდეგ, პროდუქციის საქართველოს საზღვრებს გარეთ ევროკავშირის, აშშ-ის და ჩინეთის ბაზრების ათვისებას გატანას გეგმავს.
წყარო:https://bm.ge/
ბრიტანულ „დეილი ტელეგრაფში“ (The Daily Telegraph) გამოქვეყნებულია სტატია სათაურით „ტრამპმა პუტინისათვის დრო ისე გამოთვალა, რომ სანქციებით მაქსიმალურ შედეგს მიაღწიოს“ (ავტორი – კონ კოფლინი). პუბლიკაციაში განხილულია აშშ-ის პრეზიდენტის მიერ რუსეთის წინააღმდეგ მიმართული მეორადი სანქციების ათდღიანი ვადა და მოცემულია მათი სავარაუდო შედეგები.
გთავაზობთ სტატიას შემოკლებით:
დონალდ ტრამპმა, ალბათ, ყველაზე საუკეთესო და შესაფერისი დრო შეარჩია თავისი მეორადი ეკონომიკური სანქციების ახალი ვადის გამოცხადებისათვის, რომ რუსეთს ნავთობისა და გაზის გაყიდვით მიღებული შემოსავლები შეუმცირდეს და უკრაინაში ომი შეწყვიტოს.
დონალდ ტრამპს სამჯერ ეგონა, რომ ვლადიმერ პუტინი სამშვიდობო მოლაპარაკების აუცილებლობაში დაარწმუნა, მაგრამ სამჯერვე, როგორც კი სატელეფონო საუბარი მთავრდებოდა, რუსეთის არმია უკრაინული ქალაქების დასაბომბად რაკეტებსა და დრონებს უშვებდა.
აშშ-ის პრეზიდენტის მხრიდან იმის დაგვიანებული აღიარება, რომ „პუტინი მას თურმე ათამაშებდა და ომის გასაგრძელებლად დროს იგებდა“, იმას ნიშნავს, რომ როგორც იქნა, „ტრამპი აბობოქრდა“ და თავის რუს კოლეგას ათდღიანი ვადა დაუწესა ცეცხლის შესაწყვეტად. თუ კრემლი თეთრი სახლის მოთხოვნას არ დაეთანხმება, ძალაში შევა ახალი მომატებული საბაჟო ტარიფები იმ ქვეყნების მიმართ, რომლებიც რუსეთისაგან ნავთობს ყიდულობენ. სანქციის მიზანი და განხორციელების პროცედურა ასეთია: აშშ რუსული იაფი ნავთობისა და გაზის მოყვარული ქვეყნების – ინდოეთის, ჩინეთის (და ალბათ, თურქეთის და სხვების) მიერ წარმოებულ იმპორტირებულ პროდუქციაზე მომატებულ საბაჟო ტარიფებს დააწესებს. მათი ფასი იმდენად გაძვირდება, რომ ამერიკაში მყიდველი აღარ ეყოლება, ანუ ინდური და ჩინური კომპანიები დაზარალდებიან. ზარალის თავიდან ასაცილებლად იგივე ქვეყნები იძულებულნი გახდებიან, რომ რუსეთისაგან ნავთობისა და გაზის შესყიდვა შეწყვიტონ, რის შედეგადაც რუსეთს შემოსავლები შეუმცირდება, ანუ კრემლს აღარ ექნება თანხები უკრაინასთან ომის გასაგრძელებლად. რუსეთი ცეცხლს შეწყვეტს და სამშვიდობო მოლაპარაკებაზე დათანხმდება.
კონგრესში ზოგიერთი დეპუტატი უფრო რადიკალურად არის განწყობილი, რომლებიც 500%-იან სანქციების დაწესებას მოითხოვენ.
უეჭველია, რომ დონალდ ტრამპი სერიოზულად არის განწყობილი. თუ გავითვალისწინებთ იმ ფაქტს, რომ მან იძულებული გახადა იაპონია და ევროკავშირი სავაჭრო ხელშეკრულებების დადებისას აშშ-ის მოთხოვნებზე დათანხმებულიყვნენ, განა თეთრი სახლი კრემლის წინაშე უკან დაიხევს?
როგორც კი ინდოეთი და ჩინეთი მტკივნუულ დარტყმას იგრძნობენ ამერიკასაგან, ისინი იძულებულნი გახდებიან რუსეთისაგან ნავთობ-გაზის შესყიდვა შეამცირონ (ან საერთოდ შეწყვიტონ). ამით დაინგრევა ვლადიმერ პუტინის გენერალური გეგმა რუსეთის იმპერიული ძლიერების აღდგენის შესახებ.
რუსეთი უკრაინის ფრონტზე წარუმატებლობას განიცდის. მართალია, კრემლმა დრონებითა და რაკეტებით უკრაინული ქალაქების დაბომბვა გააძლიერა, მაგრამ ფაქტია, რომ მაისში დაწყებულ შეტევას რუსეთის არმიისათვის რაიმე მნიშვნელოვანი წარმატება არ მოუტანია. ვლადიმერ პუტინი ბოლო დროს მუდმივად ცდილობს რომელიმე მსხვილი უკრაინული ქალაქის დაპყრობას, მაგრამ უშედეგოდ – პოკროვსკს და კონსტანტინოვკას ისევ უკრაინელები აკონტროლებენ. უკრაინელები მამაცურად იბრძვიან, რუსები უამრავ ჯარისკაცს კარგავს – კრემლის ზარალმა უკვე მილიონს მიაღწია დაღუპულებისა და დაჭრილების სახით. ეს ნიშნავს ყოველდღიურად 1080 რუსი მებრძოლის დაღუპვა-დასახიჩრებას.
ასევე ნაკლებად სავარაუდოა, რომ რუსეთი ათასკილომეტრიან ფრონტის ხაზზე რაიმე წარმატებას მიაღწევს მას შემდეგ, რაც დონალდ ტრამპი უკრაინას მეტ იარაღს მიაწვდის. უკრაინელებს თუ იარაღი საკმარისი რაოდენობით ექნებათ, ისინი რუსებს უკან დაახევინებენ და საეჭვოა პუტინმა ის ტერიტორია შეინარჩუნოს, რაც ბოლო დროს დაიპყრო. კრემლს ირანის იმედიც აღარ ექნება, რადგან თეირანი მნიშვნელოვნად არის დასუსტებული ისრაელთან (და აშშ-სთან) ამასწინანდელი საჰაერო შეტაკების გამო.
არის იმის ნიშნებიც, რომ თვითონ ვლადიმერ პუტინს მისსავე გარემოცვაში ბევრი არ ეთანხმება, რასაც მოსკოვში მიმდინარე საკადრო წმენდა მოწმობს. ზოგიერთი მაღალჩინოსანი ჩინოვნიკი სიცოცხლეს თვითმკვლელობით ამთავრებს, ცნობილი ოლიგარქები კი ქვეყნიდან გაქცევის დროს იქნენ დაკავებულები. ზოგიერთი მაღალჩინოსანი ოფიცერი, რომლებსაც ყოფილ თავდაცვის მინისტრთან სერგეი შოიგუსთან ახლო ურთიერთობა ჰქონდათ, დაპატიმრებულები იქნენ კორუფციის ბრალდებით.
იმ სიძნელეების მასშტაბს, რასაც ვლადიმერ პუტინი შეეჯახა ომის გამო, მოწმობს ის ფაქტი, რომ იგი იძულებული გახდა გასულ კვირას ყოველწლიური სამხედრო-საზღვაო აღლუმის ჩატარება გაეუქმებინა – უკრაინაში განცდილი დიდი დანაკარგების გამო.
ამრიგად, დონალდ ტრამპის გადაწყვეტილება ვადების შემცირების თაობაზე დროულია – ის იმ დროს იქნა მიღებული, როცა ვლადიმერ პუტინს, ყოყოჩობის მიუხედავად, ე.წ. „სპეციალური სამხედრო ოპერაციის“ გაგრძელების ვარიანტები უმთავრდება.
თუ რუსეთის პრეზიდენტი გამოფხიზლდება და მიხვდება, რომ მას უკრაინაში ომის მოგების შანსი არ აქვს, მას სხვა არჩევანი არ ექნება იმის გარდა, რომ დონალდ ტრამპის მოთხოვნას დათანხმდეს – ცეცხლი შეწყვიტოს და სამშვიდობო მოლაპარაკება დაიწყოს.
