ანაკლიის ღრმაწყლოვანი პორტის ინვესტორის საერთაშორისო კონკურსში გამარჯვებულად ჩინური კონსორციუმი China Communications Construction Company Limited-ი (CCCC) გამოვლინდება, რომელმაც სახელმწიფოს საბოლოო საინვესტიციო წინადადება წარუდგინა.

CCCC ამ პროექტს კონსორციუმის მეშვეობით განახორციელებს, რომლის შემადგენლობაშიც შედიან მისი შვილობილები China Harbour Investment PTE, ხოლო სამშენებლო თვალსაზრისით ქვეკონტრაქტორი CCCC-ის შვილობილი China Road and Bridge Corporation-ი იქნება.

პორტის პირველი ფაზის საინვესტიციო მოცულობა 600 მილიონ დოლარს შეადგენს. პროექტის პირველი ფაზის მიხედვით უნდა აშენდეს პორტი, რომლის გამტარიანობაც წლიურად 7 მილიონი ტონა ტვირთების და 600,000 კონტეინერის მომსახურება იქნება.

CCCC ერთ-ერთი უმსხვილესი გლობალური საინჟინრო კომპანიაა, რომელიც სხვადასხვა საერთაშორისო საფინანსო ინსტიტუტის მიერ დაფინანსებულ პროექტს ახორციელებს. დონორები საეჭვო, თაღლითური, კორუფციული ან სხვა შესაბამისობის დარღვევების შემთხვევაში კონტრაქტორი კომპანიების დაბლოკვას და გარკვეული პერიოდით მათ შავ სიაში შეყვანას ახორციელებენ. მსოფლიო ბანკის, აზიის განვითარების ბანკისა (ADB) და აფრიკის განვითარების ბანკის შავ სიაში სხვადასხვა დარღვევების გამო CCCC და მისი შვილობილები მოხვდნენ.

თაღლითობა ფილიპინებში და მსოფლიო ბანკის შავი სია - 2011 წელი

მსოფლიო ბანკმა CCCC და მისი შვილობილები ფილიპინების გზების გაუმჯობესების პროექტში თაღლითური პრაქტიკის გამო, 2011 წელს 6 წლით შეიყვანა შავ სიაში რა პერიოდის განმავლობაშიც კომპანიას და მის შვილობილებს მსოფლიო ბანკის მიერ გამოცხადებულ პროექტებსა და ტენდერებში მონაწილეობა შეზღუდული ჰქონდათ.

ამასთან, მსოფლიო ბანკმა ჯერ კიდევ 2009 წელს შეიყვანა CCCC-ის შვილობილი China Road and Bridge Corporation-ი შავ სიაში რვა წლის ვადით.

მსოფლიო ბანკმა აღნიშნა ის პოზიტიური ცვლილება, რაც 2011 წელს ჩინეთის პარლამენტის მიერ კრიმინალურ კოდექსში შეტანილ ცვლილებას უკავშირდებოდა, რაც ჩინური კომპანიების მხრიდან უცხო ქვეყნის მაღალჩინოსნებისთვის ქრთამის შეთავაზების კრიმინალიზებას ახდენდა. 2011 წლამდე აღნიშნული პრაქტიკა სამართალდარღვევას არ წარმოადგენდა.

კორუფცია კონგოში - 2014 წელს CCCC-ის შვილობილი CFHEC აფრიკის განვითარების ბანკმა შავ სიაში შეიყვანა

2014 წლის დეკემბერში აფრიკის განვითარების ბანკმა გამოაქვეყნა გადაწყვეტილება CCCC-ის შვილობილის China First Highway Engineering Co-ს შავ სიაში შეყვანასთან დაკავშირებით. აფრიკის განვითარების ბანკის განცხადების თანახმად, მათ გამოავლინეს კორუფციული დარღვევები კონგოში China First Highway Engineering Co-ს პროექტში, რასაც თავად კომპანიის მხრიდან დარღვევის აღიარებაც მოჰყვა. კომპანიის მხრიდან დანაშაულებების აღიარებას აფრიკის განვითარების ბანკსა და China First Highway Engineering Co-ს შორის მორიგებაც მოჰყვა, რის შედეგადაც კომპანია შავ სიაში სამი წლით მოხვდა, ამასთან შავ სიაში ყოფნის ერთი წლით შემცირება კომპანიას ბანკისთვის $18.86 მილიონი დოლარის კომპენსაციის გადახდით შეეძლო. ამავე გადაწყვეტილებით აფრიკის განვითარების ბანკმა CCCC-ის, ანუ China First Highway Engineering Co-ს მშობელ კომპანიას შიდა კონტროლის მექანიზმების გაძლიერებისკენ მოუწოდა.

თაღლითობა ნეპალში და აზიის განვითარების ბანკის (ADB) შავი სია - 2021 წელი:

2021 წლის 21 დეკემბერს აზიის განვითარების ბანკმა (ADB) ნეპალის აეროპორტის გაფართოების პროექტში თაღლითური ქმედებების გამო სამი ჩინური კონტრაქტორის შავ სიაში შეყვანის გადაწყვეტილება მიიღო. სიაში შეყვანილ კომპანიებს შორის არის China Harbour Engineering Company-ი, რომელიც CCCC-ის შვილობილია. მიღებული გადაწყვეტილება თაღლითობასა და სავარაუდო კორუფციაში მონაწილეობას უკავშირდებოდა.

წყარო:https://bm.ge/