,
ჩინეთის უძრავი ქონების სექტორში კრიზისი მნიშვნელოვნად გაღრმავდა. ქვეყნის სტატისტიკის ეროვნული ბიუროს მონაცემებით, უძრავი ქონების სექტორში განხორციელებული ინვესტიციები წინა წლის ანალოგიურ 11 თვესთან შედარებით 15.9%-ით შემცირდა. ეს მაჩვენებელი ნათლად ასახავს ინვესტორებისა და დეველოპერების მხრიდან სექტორის მიმართ ნდობის მკვეთრ კლებას და ჩინეთის ეკონომიკის ერთ-ერთი ყველაზე მნიშვნელოვანი სფეროს შენელებას.
ინვესტიციების მასშტაბური კლება რამდენიმე ფუნდამენტურ ფაქტორს უკავშირდება. უპირველეს ყოვლისა, სიტუაცია გაამწვავა მსხვილი დეველოპერული კომპანიების, მათ შორის Evergrande-სა და Country Garden-ის, ფინანსურმა პრობლემებმა და დეფოლტმა, რამაც მთელი სექტორის დესტაბილიზაცია და ინვესტორებში პანიკა გამოიწვია.
გარდა ამისა, საცხოვრებელი სახლების გაყიდვების მოცულობა მნიშვნელოვნად შემცირდა, რაც დეველოპერებს ფულადი სახსრების ნაკადს უმცირებს და ახალი პროექტების დაწყების ინტერესს აქრობს.
ამ ყველაფერს ემატება ჩინეთის ეკონომიკის საერთო შენელება და მოსახლეობის მხრიდან ეკონომიკური ზრდის პერსპექტივის მიმართ ნდობის შემცირება, რამაც უარყოფითად იმოქმედა ახალი საცხოვრებელი სახლების და იპოთეკური სესხების მოთხოვნაზე.
უძრავი ქონების სექტორში ინვესტიციების შემცირება სერიოზულ საფრთხეს უქმნის ჩინეთის მთლიან შიდა პროდუქტს, ვინაიდან ეს სექტორი ქვეყნის ეკონომიკის მნიშვნელოვან ნაწილს წარმოადგენს და მასზე პირდაპირაა დამოკიდებული როგორც დეველოპერული და სამშენებლო, ასევე საბანკო სექტორები.
წყარო:https://bm.ge
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
