ჩინეთის საგარეო საქმეთა მინისტრმა ვანგ იმ ისრაელთან კონფლიქტში პალესტინის მხარდაჭერა გამოუცხადა. ამის შესახებ განცხადება ჩინეთის საგარეო საქმეთა სამინისტროს ვებ-გვერდზე გამოქვეყნდა.
ჩინეთში თვლიან, რომ პალესტინის საკითხი სამართლიანად არ მოგვარებულა, გაერო-ს უსაფრთხოების საბჭოს რეზოლუციები სრულებით არ სრულდება. სწორედ ამიტომ, ვანგ ის აზრით, კონფლიქტის მოგვარების ერთადერთი ვარიანტი რჩება - პალესტინელებისათვის ცალკე სახელმწიფოს შექმნა.
ჩინეთმა მზადყოფნა გამოთქვა ხელი შეუწყოს კონფლიქტის მოგვარებას პოლიტიკური საშუალებებით. ვან ი აცხადებს, რომ ამ დროისთვის მთავარი პრიორიტეტი ცეცხლის შეწყვეტა და ძალადობის შეჩერებაა.
ისრაელსა და ჰამასს შორის ბოლო რამდენიმე დღის განმავლობაში მიმდინარე დაპირისპირება პიკს აღწევს და საერთაშორისო შეშფოთებას იწვევს. ვითარება შესაძლოა კონტროლიდან გავიდეს.
11 მაისის ღამით დაჯგუფება „ჰამასმა“ ისრაელის მიმართულებით დაახლოებით 630 რაკეტა გაუშვა. აქედან 150 ღაზას სექტორის შიგნითვე აფეთქდა. ისრაელის სარაკეტო თავდაცვის სისტემამ დაახლოებით 200 მათგანის შეკავება შეძლო.
ისრაელის არმიის გენშტაბის ინფორმაციით, სამხედრო ოპერაციები მანამდე გაგრძელდება, ვიდრე ღაზას სექტორში რადიკალების ყველა გვირაბი არ იქნება განადგურებული.
ისრაელის შეიარაღებული ძალების ცნობით, კონფლიქტის დაწყებიდან დღემდე, პალესტინელებმა ღაზას სექტორიდან ისრაელის მიმართულებით 2 000-ზე მეტი რაკეტა გაუშვეს.
კონფლიქტის დაწყებიდან დღემდე, ღაზას სექტორში გარდაცვლილთა რიცხვი 149-ს აღწევს, მათ შორის 41 ბავშვია. ხოლო ისრაელში თავდასხმებს 41 ადამიანი ემსხვერპლა, მათ შორის ორი ბავშვი.