ჩეხეთის არჩევნებში ანდრეი ბაბიშის პარტია იმარჯვებს. ცენტრალური საარჩევნო კომისიის მიერ გამოქვეყნებული ამჟამინდელი მონაცემებით, პოპულისტი მილიარდერის პარტია ANO, რაც ჩეხურად ნიშნავს "დიახ", ხმათა 34.87%-ს ფლობს. შესაბამისად, ის პარლამენტში 82 მანდატს დაიკავებს.

აღსანიშნავია, რომ ბაბიშის პარტიამ დედაქალაქის გარდა ქვეყნის ყველა რეგიონში მოიპოვა უპირატესობა.

მეორე ადგილზე მოქმედი პრემიერ-მინისტრის, პეტრ ფიალას SPOLU-ა. მემარცხენე ცენტრისტებს ხმათა 23.13% ერგოთ, რაც პარლამენტის ქვედა პალატაში 51 ადგილის დაკავებისთვისაა საკმარისი. აღსანიშნავია, რომ 2021 წლის არჩევნებთან შედარებით მათ 20 მანდატი დაკარგეს.

12 მანდატი დაკარგა მესამე ადგილზე გასულმა "დამოუკიდებელი კანდიდატების" პარტია STAN-მაც, რომელმაც ხმათა 11.13% მოიპოვა და, სავარაუდოდ, პარლამენტში 21 დეპუტატით იქნება წარმოდგენილი. აღსანიშნავია, რომ STAN-ი პეტრ ფიალას პარტიასთან ერთად მოქმედ კოალიციაში იყო.

განსხვავებით მეორე და მესამე ადგილზე გასული პარტიებისგან, დადებითი ზრდა აქვს სამთავრობო კოალიციის მესამე წევრ "მეკობრეების" პარტიას, რომელმაც ხმათა 8.80% მიიღო და პარლამენტში დამატებით 13 დეპუტატი შეიყვანა. ამ მოცემულობით, "Piráti" პარლამენტში 17 სკამს დაიკავებს.

მეხუთე ადგილზე გავიდა იაპონური წარმოშობის ჩეხი პოლიტიკოსის, ტომიო ოკამურას "პირდაპირი დემოკრატების პარტია", რომელიც აქამდე ერთ-ერთ ფავორიტად განიხილებოდა და ეგზიტპოლებით მე-3 ადგილზე უნდა გასულიყო. SPD-ს ხმათა 7.854% ერგო, რაც 15 დეპუტატის გაყვანისთვისაა საკმარისი. რაც ნიშნავს, რომ 2021 წლის შემდეგ ოკამურას გუნდმა 5 სკამი დაკარგა.

პარლამენტში 14 დეპუტატით იქნება წარმოდგენილი "მოტორისტების" პარტია, რომელმაც ხმათა 6.80% მიიღო. აღსანიშნავია, რომ ეგზიტპოლების თანახმად "Motoristé" 5%-იან ბარიერს ვერ ლახავდა.

ყველაზე დიდი მოულოდნელობა კომუნისტებისა და სოციალ-დემოკრატების პარტიის მიერ დაფიქსირებული შედეგია. "Stačilo!"-მ ხმათა 4.34% მიიღო და 5%-იანი ბარიერი ვერ გადალახა. შეგახსენებთ, აღნიშნული პარტია 2017-2021 წლებში ანდრეი ბაბიშის კოალიციურ მთავრობაში იმყოფებოდა.