,
ერთ დღეს გერმანია, შესაძლოა, იძულებული გახდეს, რუსეთის წინააღმდეგ თავდაცვითი ომი აწარმოოს , - მედიის ინფორმაციით, ამის შესახებ გერმანიის ბუნდესვერის გენერალურმა ინსპექტორმა, კარსტენ ბრეიერმა განაცხადა.
მისი თქმით, რუსეთის გადაიარაღება და ვლადიმერ პუტინის ქცევა შეშფოთების მიზეზს იძლევა და გერმანელებს მოუწევთ შეგუება იმ აზრთან, რომ ერთ დღეს შეიძლება თავდაცვითი ომის წარმოება მოუწიოთ.
კითხვაზე, შეძლებს თუ არა ბუნდესვერი გაუმკლავდეს ნატო-ზე რუსეთის შესაძლო თავდასხმას უკრაინაში ომის დასრულების შემდეგ, ბრეიერმა უპასუხა, რომ სხვა არჩევანი არ არსებობს.
"დიახ. წერტილი. ალტერნატივა არ გვაქვს. ჩვენ შეგვიძლია დავიცვათ თავი და დავიცავთ თავს", - განაცხადა ბუნდესვერის გენერალურმა ინსპექტორმა.
ამასთან, ბრეიერმა ხაზი გაუსვა, რომ ბუნდესვერი მრავალი წლის განმავლობაში ორიენტირებული იყო საერთაშორისო კრიზისების მოგვარებაზე და ჯერ კიდევ არასაკმარისად არის აღჭურვილი ეროვნული და სამოკავშირეო თავდაცვისთვის. მან ასევე აღნიშნა, რომ არსებობს სტრუქტურები, რომლებიც სწრაფ და მიზანმიმართულ გადაწყვეტილებებს თითქმის შეუძლებელს ხდის.
