,
ბრიტანულ–ქართული აკადემიის სასკოლო საზოგადოება ერთობლივ განცხადებას ავრცელებს, სადაც უკმაყოფილებას გამოხატავენ დამფუძნებლისა და დირექტორის ნათია ჯანაშიას თანამდებობიდან შესაძლო გადაყენებისა და ახალი დირექტორის დანიშვნის გამო.
სასკოლო საზოგადოების განცხადებას სრულად გთავაზობთ:
"ჩვენ, BGA-ის სასკოლო საზოგადოების წევრებს, გვსურს, უკმაყოფილება გამოვხატოთ ჩვენი დამფუძნებლისა და დირექტორის, ქალბატონი ნათია ჯანაშიას გადაყენებასთან დაკავშირებით მოულოდნელად გამოცხადებული პროცესის შესახებ.
ხაზგასმით გვინდა აღვნიშნოთ, რომ ბრიტანულ-ქართულ აკადემიაში ვმუშაობთ სწორედ იმიტომ, რომ, პირველ რიგში, გვჯერა აკადემიის ღირებულებების, რომელიც უმთავრეს პრიორიტეტად არა ფინანსურ სარგებელს, არამედ მოსწავლის საუკეთესო ინტერესებს აყენებს.
ქალბატონმა ნათიამ, როგორც ამ სკოლის დამფუძნებელმა, ქვეყნის ერთ-ერთი წამყვანი და წარმატებული საგანმანათლებლო დაწესებულება შექმნა. მისი ხედვები და მიზნები განათლების შესახებ სრულ თანხვედრაშია იმ შეხედულებებთან, რომლებსაც, ჩვენი ღრმა რწმენით, განათლება უნდა ემსახურებოდეს.
გვსურს, შეშფოთება გამოვხატოთ ახალი დირექტორის დანიშვნის პროცესებთან დაკავშირებითაც, რომელიც არ წარმართულა სასკოლო საზოგადოებისთვის უმნიშვნელოვანეს ადამიანებთან კონსულტაციით და ჩვენთვის მისაღებ გამჭვირვალე პირობებში. ბატონ იოჰან ვან ლილს არ გაუვლია საერთაშორისო სტანდარტებით გათვალისწინებული შერჩევის არც ერთი საფეხური (ინტერვიუები თანამშრომლებთან, მასწავლებლებთან, მოსწავლეებთან და მშობლებთან).
ბრიტანულ-ქართული აკადემია უკვე მრავალი წელია, პერსონალის შერჩევის საერთაშორისო სტანდარტებს ინარჩუნებს და მიჰყვება პროტოკოლებს, რომელთა უპირველესი მიზანიც მოსწავლეების უსაფრთხოების დაცვაა.
ვგრძნობთ, რომ ვდგავართ ჩვენი დირექტორის დაკარგვის წინაშე, ვისთან ერთად მუშაობაც მნიშვნელოვანი იყო წლების განმავლობაში.
როგორც მასწავლებლები, ასევე აკადემიის სხვა თანამშრომლები, უაღრესად იმედგაცრუებულნი ვართ მოსალოდნელი ცვლილებების გამო და ხმამაღლა გამოვხატავთ სურვილს, რომ ქალბატონი ნათია დარჩეს სკოლის დირექტორის თანამდებობაზე", – ნათქვამია ბრიტანულ–ქართული აკადემიის თანამშრომლების ერთობლივ განცხადებაში.
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
