ვაკის რაიონის გამგეობა რაიონში რეგისტრირებულ ბინათმესაკუთრეთა ამხანაგობებთან აქტიურად თანამშრომლობს.
„ბინათმესაკუთრეთა ამხანაგობების განვითარების ხელშეწყობის პროგრამის“ ფარგლებში, ბოლო რვა წლის განმავლობაში, მოსახლეობის განაცხადების საფუძველზე, სახურავებისა და წყალსაწრეტი მილების განახლების 446 პროექტი დაფინანსდა. საუბარია მრავალბინიანი კორპუსების ქანობიან და ბრტყელ სახურავებზე.
საერთო ჯამში, სარეაბილიტაციო პროექტების განსახორციელებლად გამგეობის ბიუჯეტიდან 5 302 500 ლარი დაიხარჯა და განახლდა 153 181 კვ.მ ფართობის სახურავები.
კანონმდებლობით, ბინათმესაკუთრეთა ამხანაგობის წევრთა საერთო ქონების ერთობლივად მართვა მესაკუთრეებს ეკისრებათ. გადაწყვეტილებები ბინათმესაკუთრეთა ამხანაგობის წევრთა კრებაზე, ამხანაგობის ყველა წევრის ჩართულობით მიიღება.
„ბინათმესაკუთრეთა ამხანაგობების განვითარების ხელშეწყობის პროგრამის” წესის თანახმად, გამგეობის მიერ სამუშაოების განხორციელებისას, პროექტების ღირებულების 5-10% ამხანაგობის საერთო ანგარიშზე რჩება და მოსახლეობის გადაწყვეტილებით, კორპუსის საერთო საჭიროებებს ხმარდება.
ამხანაგობა ვალდებულია, პროგრამის ფარგლებში დაფინანსებული სამუშაოების შედეგად რეაბილიტირებული და ამხანაგობის საერთო სარგებლობაში არსებული ქონების მოვლა-პატრონობა განახორციელოს.
