Microsoft-ის დამფუძნებელმა და საქველმოქმედო ფონდის  თანათავმჯდომარემ  ბილ გეიტსმა  მოუწოდა კაცობრიობას,  მოემზადოს მომავალი პანდემიისათვის  და  ეს საფრთხე აღიქვას ისე სერიოზულად, როგორც  პოტენციური სამხედრო  კონფლიქტი.  ეს განცხადება  ნაწილია   ბილ და მელინდა გეითსების  ფონდის ყოველწლიური  გზავნილისა, რომლის ტექსტიც  გამოქვეყნდა  „The Seattle Times“-ში.

მილიარდერი  გამოთქვამს მოსაზრებას, რომ ცივილიზებული მსოფლიო  მომზადებული უნდა დაუხვდეს  მომავალ პანდემიას. ამ მიზნით მას ყველაზე  პრაგმატულ და გონივრულ  გამოსავლად მიაჩნია  ინვესტიციების მიმართვა  მეცნიერების განვითარების,  მასობრივი ტესტირების  ორგანიზებისა  და ინფორმაციის გლობალური სისტემის შექმნის მიმართულებით.

გეიტსი და მისი მეუღლე მელინდა განკარგავენ საქველმოქმედო ფონდს  და ყოველწლიურად აქვეყნებენ გზავნილს, რომელშიც  აშუქებენ ორგანიზაციის მიღწევებსა და სამომავლო გეგმებს.

ფონდის - Bill & Melinda Gates Foundation -მუშაობის ძირითად მიმართულებებს წარმოადგენს განვითარებად ქვეყნებში მძიმე  დაავადებების წინააღმდეგ ბრძოლა. ფონდი ასევე ახორციელებს რიგ სხვადასხვა პროგრამებს აშშ-ში  ჯანმრთელობის დაცვისა და განათლების მიმართულებით. მიმდინარე მომენტისათვის  კოვიდ -19-ის წინააღმდეგ ბრძოლაში ფონდს უკვე გახარჯული აქვს 1, 75 მილიარდი დოლარი.

ცოტა ხნის წინ გეითსმა ტვიტერზე დაწერა, რომ იგი აიცრა კოვიდსაწინააღმდეგო ვაქცინით. „ჩემი ასაკის  (65 წელი) ერთ-ერთი  უპირატესობა   ისიცაა, რომ   ავიცერი   ვაქცინის პირველი დოზით და თავს მშვენივრად ვგრძნობ. მადლობა ყველა  მეცნიერს, ექსპერიმენტების მონაწილეებს, სამედიცინო  ადმინისტრაციასა და მედიცინის  მუშაკებს, ყველას, ვინც იდგა  ბრძოლის წინა ხაზზე იმისათვის, რომ მივეყვანეთ  ამ ფინიშამდე“

ამ გზავნილის მესიჯებს მილიარდერი იმეორებს იუთუბის ერთ-ერთი არხის-Veritasium-ის მესაკუთრის -დერეკ მიულერისათვის მიცემულ ინტერვიუში.  მულტიმილიარდერი და ფილანთროპი იხსენებს 2015 წელს გაკეთებულ წინასწარმეტყველურ პროგნოზს, როდესაც მან ფაქტიურად იწინასწარმეტყველა კოვიდ-19-ის პანდემია და აგრეთვე ყურადღება გაამახვილა იმ საფრთხეებზე, რაც ემუქრება მსოფლიოს უახლოეს მომავალში.

6 წლის წინ, კონფერენციაზე გამოსვლისას ბილ გეიტსმა განაცხადა: „თუკი უახლოესი რამდენიმე ათწლეულის განმავლობაში  რაიმეს შეუძლია გამოიწვიოს 10 მილიონი ადამიანის განადგურება, ეს იქნება არა ომი, არამედ ძალიან გადამდები ვირუსი“.

იხსენებს რა თავის სიტყვებს,ბილ  გეიტსი ნანობს, რომ არ აღმოჩნდა  საკმარისად  დამაჯერებელი, რომ მსოფლიოს მისი ერწმუნა და პანდემიას მომზადებული დახვედროდა.

გეიტსის აზრით, არსებობს ძალიან გადამდები რესპირატორული ვირუსები,დიდი რაოდენობით,  რომლებიც ხანგამოშვებით იწვევენ ეპიდემოლოგიურ აფეთქებას მთელ მსოფლიოში. ასეთი იყო, მაგალითად , ესპანური გრიპი. ასე, რომ მის წინასწარმეტყველურ პროგნოზში არაფერი იყო რევოლუციური. თუმცაღა პანდემიები არც ისე ხშირად ხდება, რომ  ადამიანები დარწმუნდნენ მისი პრევენციის ინვესტირების საჭიროებაში.

„ჩვენ თავს ვიმშვიდებთ ყალბი უსაფრთხოების გრძნობით. არ ვფიქრობთ, რომ უახლოესი 10 წლის მანძილზე რაიმე მოხდება, ამიტომ არ ვთვლით  საჭიროდ  ამ საქმეში ფულის ჩადებას, მაგრამ კოვიდ-19-ის პანდემიამ თვალსაჩინოდ დაადასტურა  ამგვარი ინვესტიციის მნიშვნელობა“.

ინტერვიუს მეორე ნაწილი ეთმობა იმ საფრთხეების ანალიზს, რომელიც ემუქრება კაცობრიობას პოსტკოვიდურ ეპოქაში.

ესენია კლიმატური ცვლილებები და ბიოტერორიზმი.

იცვლება კლიმატი-მატულობს სიკვდილიანობა.

გეიტსი ვარაუდობს, რომ კლიმატის ცვლილებით გამოწვეული გარდაცვალების შემთხვევებმა  შეიძლება კიდეც გადაუსწროს კოვიდ-19-პანდემიით გამოწვეულ სიკვდილიანობის მაჩვენებელს.

მისი პროგნოზები დღეს უკვე მართლდება.

ჯანმრთელობის მსოფლიო ორგანიზაციის   გენდირექტორის თქმით  „კლიმატის ცვლილება უკვე ახდენს სერიოზულ ზეგავლენას ადამიანების ცხოვრებასა და ჯანმრთელობაზე. იგი ემუქრება ჩვენი ჯანმრთელობის ისეთ ბაზისურ მდგენელს, როგორიცაა სუფთა  ჰაერი,  უსაფრთხო სასმელი წყალი,  ეკოლოგიური  საკვები პროდუქტები  და უსაფრთხო საცხოვრისი. ამ საფრთხემ შეიძლება საერთოდ  გადაფაროს ათწლეულის მიღწევები  გლობალური ჯანმრთელობის  დაცვის დარგში“.

სითბური დარტყმები, სიკვდილიანობა ექსტრემალური ამინდის პირობებში, ინფექციების გავრცელება-ესაა კლიმატის ცვლილების შედეგების ჩამონათვალი.

როგორც ჯანმო მიუთითებს,  ჰაერის დაბინძურება  ყოველ წელს  ხდება 7 მილიონი ადამიანის გარდაცვალების მიზეზი მთელ მსოფლიოში და  იწვევს სოციალური სერვისის  ხარჯების ზრდას 5, 11 ტრილიონი დოლარით.

ლონდონის სამეფო კოლეჯის პროფესორის Majid Ezzati -ის აზრით  3-4 გრადუსით ტემპერატურის მატება  ავტომატურად იწვევს სიკვდილიანობის ზრდას. სიცხეში ხდება მეტი თვითმკვლელობა და გაზრდილია ძალადობის მაჩვენებელი. როგორც წესი, ამ დროს ადამიანები არიან უფრო აღგზნებულები და მოიხმარენ მეტ ალკოჰოლს, რაც  წარმოშობს  კონფლიქტებს. კვლევებით დგინდება, რომ  მაღალი ტემპერატურა დაკავშირებულია ფსიქიკური დაძაბულობის ბევრად მაღალ დონესთან, განსაკუთრებით ახალგაზრდებში.

 ბიოტერორიზმი იმსხვერპლებს  მეტ სიცოცხლეს, ვიდრე კორონავირუსი

ბილ გეიტსი ასევე პროგნოზირებს ბიოტერორიზმის საფრთხის მატებას. ამასთან განმარტავს, რომ ბიოტერორიზმში მოიაზრებს რესპირატორულ  ვირუსს.

ვირუსით დაინფიცირებულ ადამიანს, შესაძლოა, გარკვეულ მომენტამდე წარმოდგენაც არ ჰქონდეს საკუთარ დაავადებაზე,  ისე დააინფიციროს  სხვები საზოგადოებრივი თავშეყრის ადგილებში. “ამის შანსი  და აგრეთვე  ფასი, რომელსაც ჩვენ გადავიხდით, იქნება გაცილებით მაღალი, ვიდრე  ინფექციის ბუნებრივად აფეთქების შემთხვევაში, როგორც ეს ამჯერად მოხდა“- ამბობს მულტიმილიარდერი.

ცნობილია, რომ  ბიოლოგიურმა იარაღმა შეიძლება  გამოიწვიოს ისეთივე გამანადგურებელი შედეგები, როგორიც ქიმიურმა და ბირთვულმა იარაღმა. ამასთანავე გააჩნია რიგი უპირატესობები მათთან შედარებით.

მისი წარმოება ბევრად იაფია,  იგი შეიძლება აწარმოო ჩვეულებრივ სარდაფში, ანდაც ქალაქგარეთ, სახლში. იოლია მისი ტრანსპორტირება, ბევრად შეუმჩნეველია უსაფრთხოების სისტემისათვის.  ბიოლოგიური იარაღი ქიმიურზე  ნელა მოქმედებს, ამიტომ  ბიოტერორისტული შეტევა საწყის ეტაპზე შეიძლება შეცდომით ჩაითვალოს  ინფექციური დაავადების ბუნებრივ აფეთქებად, რაც გამოიწვევს მრავალრიცხოვან მსხვერპლს.

ბიოლოგიურ იარაღს, რომლითაც, დიდი ალბათობით, შეიძლება ისარგებლონ ბიოტერორისტებმა,  განაკუთვნებენ ყვავილის, ციმბირული წყლულის, შავი ჭირის გამომწვევებს. ამერიკელი  მკვლევარების გათვლით, ქარიან ამინდში გაფანტულმა რამდენიმე ასეული ფუნტი  ციმბირული წყლულის სპორებმა  იმ სიდიდის ქალაქში, როგორიც ვაშინგტონია,  შეიძლება გამოიწვიოს ასეულ ათასიდან მილიონამდე ადამიანის დაინფიცირება 24 საათში.

ამიტომაც  ჯერ კიდევ 1972 წელს ხელმოწერილ იქნა კონვენცია ბიოლოგიური იარაღის შესახებ. შეთანხმება კრძალავს მის წარმოებასა და შენახვას. მაგრამ არსებობს რისკი, რომ ბევრ ქვეყანაში შესაძლოა მიმდინარეობდეს ყვავილის ვირუსის გადამუშავება  ბიოლოგიურ იარაღად. ბიოლოგიური იარაღის შესაძლებლობების  მეცნიერულად შესწავლით ასევე დაინტერესებული არიან ტერორისტული ორგანიზაციები.

საჭიროა რეაგირების გლობალური სისტემა

მაიკროსოფტის დამფუძნებელი აცხადებს, რომ კაცობრიობისათვის აუცილებელია სახიფათო ინფექციების აღმოჩენის გლობალური სისტემა.  იმისათვის, რომ  წერტილი დაესვას მომავალში პანდემიის გავრცელებას, ბილ გეიტსი თვლის, რომ  ყოველკვირეულად რეგულარულად უნდა იტესტებოდეს  პლანეტის მოსახლეობის არანაკლებ 20%.

იგი გვთავაზობს რეზერვის შექმნას 3000 ექიმის ოდენობით, რომლებიც იქნებიან პანდემიასთან ბრძოლის მუდმივ მზადყოფნაში.

სახიფათო ინფექციების აფეთქების პრევენციის მიზნით  ბილ  გეიტსი გამოდის  „მეგადიაგნოსტიკური პლატფორმის“ შექმნის  ინიციატივით.

„ეს  სტრუქტურა მოითხოვს დიდ  ხარჯებს, მაგრამ ეს ხარჯები გამართლებულია, თუ გავითვალისწინებთ, რომ კოვიდ-19 -ით გამოწვეული დანაკარგი  უტოლდება  28 ტრილიონ დოლარს“.

ის აგრეთვე ყურადღებას ამახვილებს სპეციალური „რეაგირების ჯგუფის“ ფორმირების აუცილებლობაზე.

„ჩათვალეთ, რომ ეს უნდა იყოს პანდემიის  ერთგვარი   „სახანძრო ბრიგადები“. ისევე, როგორც მეხანძრეები,  ეს მაღალკვალიფიციური  პროფესიონალები   სულ მობილიზებულები უნდა იყვნენ, რომ მომენტალურად მოახდინონ რეაგირება  ყოველ პოტენციურად  კრიზისულ სიტუაციაში, მაშინვე,  როგორც კი ამის შესახებ გახდება ცნობილი“.

გეიტსი აღნიშნავს, რომ  „რეაგირების რაზმის“  წევრები  გამუდმებით უნდა იმაღლებდნენ კვალიფიკაციას.  ამისათვის უნდა გაიმართოს რეგულარული სწავლებები, ისეთი, როგორსაც გადიან სამხედროები.

„იმისათვის, რომ ავცდეთ ისეთ კრიზისს, როგორშიც აღმოვჩნდით გასულ წელს,  პანდემიისათვის მზადებას ისეთი სერიოზულობით უნდა მივუდგეთ, როგორც   პოტენციურ სამხედრო კონფლიქტს“,- აცხადებს მულტიმილიონერი.