ვიაკომპანია Uzbekistan Airways-ი ბათუმის მიმართულებით ფრენებს იწყებს - მიმდინარე წლის 21 მაისიდან, ტაშკენტი - ბათუმი - ტაშკენტის საჰაერო ხაზზე რეისების შესრულება დაიწყება. ამის შესახებ ინფორმაციას ეკონომიკისა და მდგრადი განვითარების სამინისტრო ავრცელებს.

უწყების ცნობით, ავიაკომპანიის მიერ, სამოქალაქო ავიაციის სააგენტოში წარმოდგენილი ფრენის განაცხადის შესაბამისად, რეგულარული რეისები ტაშკენტსა და ბათუმს შორის 1 ოქტომბრის ჩათვლით, კვირაში 2 სიხშირით, ყოველ ოთხშაბათს და შაბათს შესრულდება.

„საქართველოს საავიაციო სექტორის განვითარება, ახალი რეისების, ახალი ავიაკომპანიების ოპერირება და ავიამიმოსვლების ზრდა მსოფლიოს სხვადასხვა ქვეყნებთან არის ის მნიშვნელოვანი მიმართულება, რაზეც დიდად არის დამოკიდებული ეკონომიკის ერთ-ერთი პრიორიტეტული სექტორის - ტურიზმის სწრაფი აღდგენა და გაუმჯობესება. ვიცით, რომ ტურიზმში ძალიან მზარდი დინამიკა გვაქვს და სასიხარულოა, რომ ამ პოზიტიურ სტატისტიკაში უზბეკეთიდან შემოსული ვიზიტორების რაოდენობასაც მნიშვნელოვანი წილი ექნება", - განაცხადა ეკონომიკის მინისტრის მოადგილემ, მარიამ ქვრივიშვილმა.

მისივე ინფორმაციით, მიმდინარე წლის ოთხ თვეში უზბეკეთიდან შემოსული ვიზიტორების რაოდენობა, 2019 წლის ანალოგიურ პერიოდთან შედარებით 95 პროცენტით, ხოლო გასული წლის პირველ ოთხ თვესთან შედარებით 59 პროცენტით არის გაზრდილი. როგორც მარიამ ქვრივიშვილი აცხადებს, ბათუმის აეროპორტიდან უზბეკური ავიაკომპანიის ოპერირებით რეისების შესრულება ამ დინამიკას კიდევ უფრო გააუმჯობესებს.

საქართველოს ეკონომიკისა და მდგრადი განვითარების სამინისტროს სსიპ სამოქალაქო ავიაციის სააგენტომ Uzbekistan Airways-ს აღნიშნული მიმართულებებით ოპერირების ნებართვა 16 მაისს მიანიჭა.