,
ბათუმის საკრებულომ ბათუმის 2024 წლის ბიუჯეტი დაამტკიცა. ბათუმის მუნიციპალიტეტის მერიის ცნობით, ბიუჯეტის მოცულობა 382 მილიონი ლარია.
2024 წლის ბიუჯეტის პროექტი ბათუმის მერმა არჩილ ჩიქოვანმა წარადგინა.
ქალაქის მთავარი ფინანსური დოკუმენტის დამტკიცებამდე, ბათუმის მერი 2023 წელს ბათუმში განხორციელებული პროექტების ანგარიშით წარდგა.
„კიდევ ერთხელ მინდა მოგილოცოთ ის ისტორიული გადაწყვეტილება, რომელიც რამდენიმე დღის წინ მიიღეს. ჩვენი ქვეყანა ყოველთვის იყო ევროპის განუყოფელი ნაწილი. ქართველი ხალხი მუდამ იზიარებდა ევროპულ ღირებულებსა და ფასეულობებს. დამოუკიდებლობის აღდგენის დღიდან, ევროკავშირი მუდამ გვერდით ედგა და მხარს უჭერდა საქართველოსა და ქართველ ხალხს. მჯერა, რომ საქართველო მალე გახდება ევროკავშირის სრულფასოვანი წევრი, რადგან ეს არის საქართველოს ისტორიული არჩევანი და გადაწყვეტილება. ყველას კიდევ ერთხელ გილოცავთ კანდიდატის სტატუსის მიღებას“ - განაცხადა არჩილ ჩიქოვანმა.
როგორც ბათუმის მერმა აღნიშნა, 2023 წლის ბიუჯეტიდან 361 მილიონ 200 ათასი ლარი სხვადასხვა ინფრასტრუქტურულ პროექტსა და პროგრამაზე გადანაწილდა.
მისივე თქმით, გზების მშენებლობა-რეაბილიტაცია განხორციელდა 209 ქუჩასა და მონაკვეთზე, ბეტონის საფარი დაიგო და მიმდინარეობს 74 მისამართზე. კაპიტალურად შეკეთდა და რეაბილიტირდა ჯამში 247 712,35 კვ.მ. ტერიტორია. გარდა ამისა, სამრეწველო ზონის მიმდებარედ 10-ამდე მთავარი და მეორეხარისხოვანი გზის მშენებლობა დასრულდა.
მისივე თქმით, „ხელმისაწვდომი საცხოვრისის” პროგრამის მეორე ეტაპზე აშენდა 4 ხუთსართულიანი კორპუსი, რითაც საცხოვრებელი ფართით 100 ოჯახი დაკმაყოფილდა.
„ბათუმი ავარიული სახლების გარეშე“- პროგრამის ფარგლებში მშენებლობა მიმდინარეობს 9 მისამართზე, სამშენებლო-გამაგრებითი სამუშაოები დასრულდა 6 მისამართზე, რითაც 500-ზე მეტი ოჯახი შეძლებს უსაფრთხო გარემოში ცხოვრებას. საერთო ჯამში, უახლოეს პერიოდში 1000-ზე მეტი ოჯახი ბინით დაკმაყოფილდება. რაც შეეხება საბავშვო ბაღების მშენებლობას, წელს 3 ახალი საბავშვო ბაღი აშენდა. გამაგრება-ახლის მშენებლობა მიმდინარეობს 8 მისამართზე, 12 ბაღში კი ენერგოეფექტურობის ევროპული სტანდარტები დაინერგება“ - განაცხადა არჩილ ჩიქოვანმა.
როგორც არჩილ ჩიქოვანმა აღნიშნა, რეკრეაციული სივრცეების მოწყობა დასრულდა და მიმდინარეობს 13 მისამართზე. დაირგო 2500 ხე-მცენარე, 1 მილიონი ყვავილი და გამწვანდა 80 ქუჩა. მისივე თქმით, მნიშვნელოვანი გადაწყვეტილება იქნა მიღებული სატრანსპორტო პოლიტიკის მიმართულებით.
„2023 წელს სრულად განახლდა ბათუმის მუნიციპალური ავტოპარკი. რაც შეეხება განათლების, კულტურის, სპორტისა და ახალგაზრდობის მიმართულებებს, 30 პროგრამა განხორციელდა, ლუკა ასათიანის სტიპენდია გადაეცა 100 სტუდენტს, ხოლო ტბელ აბუსერიძის სტიპენდია 18-ს. წელს ბათუმი კულტურული და სპორტული ღონისძიებებით საკმაოდ დატვირთული იყო. მთელი წლის განმავლობაში ბათუმმა არაერთ კულტურულ და სპორტულ ფესტივალსა და ჩემპიონატს უმასპინძლა, როგორც ადგილობრივ, ისე საერთაშორისო მასშტაბების. ჯანმრთელობისა და სოციალური დაცვის კუთხით, 29 მასშტაბური პროგრამა და ქვეპროგრამა განხორციელდა და 53 000-მა ბენეფიციარმა ისარგებლა აღნიშნული სერვისებით. 2023 წელი იყო როგორც გამოწვევებით სავსე, ასევე საკმაოდ ნაყოფიერი და წარმატებული წელი ჩვენი ქალაქისა და თანაქალაქელებისათვის. ამ ერთი წლის განმავლობაში ბათუმისთვის მართლაც მნიშვნელოვანი და საინტერესო პროექტები განხორციელდა. 2024 წელის პროგნოზიც საკმაოდ პოზიტიური გვაქვს. განხორციელდება სასიცოცხლოდ მნიშვნელოვანი პროექტები და პროგრამები, რისთვისაც 382 მილიონი ლარი დაიხარჯება. დარწმუნებული ვარ, ჩვენ, ყველა ერთად, ერთობლივი მუშაობითა და ძალისხმევით შევძლებთ ბათუმის უკეთესი მომავლის შექმნას“- განაცხადა არჩილ ჩიქოვანმა საკრებულოს სხდომაზე.
„ბათუმის ბიუჯეტი 382 მილიონი ლარით განისაზღვრა. პრიორიტეტები, რომელთა დაფინანსებაც ბათუმის 2024 წლის ბიუჯეტით არის გათვალისწინებული:
მუნიციპალური ინფრასტრუქტურის განვითარება - 168 მილიონ 341 ათას 300 ლარი ეკოლოგიური მდგომარეობა და რეკრეაცია - 48 მილიონ 360 ათას 200 ლარი ჯანმრთელობის დაცვა და სოციალური უზრუნველყოფა - 27 მილიონ 264 ათას 600 ლარი განათლება - 43 მილიონ 495 ათას 600 ლარი კულტურა, სპორტი, ახალგაზრდობა - 25 მილიონ 502 ათას 600 ლარი საკუთარი შემოსავლები - 205 მილიონი ლარი აჭარის ავტონომიური რესპუბლიკის ბიუჯეტიდან გამოყოფილია 177 მილიონი ლარი“,-აღნიშნულია ინფორმაციაში.
„სუფრა - ასე ჰქვია ქართულ მოლხენა-დროსტარებას, რომელიც სტუმართმოყვარეობისა და მხიარულების განსახიერებას წარმოადგენს. რომელი კერძებს მიირთმევენ ქართველები სტუმრებთან ერთად? ჩვენი კორესპონდენტი შეეცადა ქართული სუფრის დიდებულება ეჩვენებინა და დარწმუნდებით, რომ ეს მართლაც კარგად გამოუვიდა“, - ასე იწყება გერმანულ გაზეთ „ფრანკფურტერ ალგემაინე ცაითუნგში“ (Frankfurter Allgemeine Zeitung) გამოქვეყნებული სტატია სათაურით „ქართული სამზარეულოს მრავალფეროვნება“ (ავტორი - მაიკე ფონ გალენი).
გთავაზობთ პუბლიკაციას შემოკლებით:
„როცა მივედით, მაგიდა უკვე გაშლილი დაგვხვდა: თეფშებზე დაწყობილი ყველით და ლორით, ნიგვზის ფარშიანი ბადრიჯნით, მხალეულობით, მწვანილით, კიტრით და პომიდორით... მათ შორის ჩადგმულია გრაფინები მოცხარის წვენით და ტარხუნის ლიმონათის ბოთლებით. ოფიციანტი წითელ ღვინოს ბოკალებში ასხამს. გარეთ თბილისური საღამოა, რესტორან „რიგის“ დარბაზში გაშლილ გრძელ მაგიდაზე კი ქართული სუფრა - ქართული ქეიფი იწყება.
ისინი, რომლებიც ქართულ სამზარეულოს არ იცნობენ, მადააღძრულები სწრაფად მიირთმევენ სიმინდის ფქვილისაგან გამომცხვარ თბილ მჭადებს, სალათებს და ყველს. მაგრამ ვინც იცის, ის ნელ-ნელა ჭამს და მთავარს ელოდება...
ქართველი ქალბატონი თიკო ტუსკაძე, რომელიც ლონდონში ცხოვრობს, მაგრამ ახლა სამშობლოში იმყოფება, ჩვენი გიდის როლს ასრულებს და ქართულ სუფრას გვაცნობს როგორც „გემრიელი საჭმელების უსასრულო რიგს“. იგი კულინარული წიგნის ავტორია და გვიხსნის, თუ რომელი საჭმელი როგორ მივირთვათ.
ზოგიერთმა უკვე საკმაო რაოდენობის სალათა მიირთვა, რომ მაგიდაზე ახალი კერძები მოაქვთ - მოხრაკულ-მოთუშული სოკო, ხაჭაპური, ხორცით მომზადებული კერძები... საჭმლით სავსე თეფშები სულ უფრო მრავლდება და მაგიდაზე თავისუფალი სივრცე მცირდება, თუმცა ახალ-ახალი ნუგბარისათვის ადგილი მოიძებნება.
„სტუმართმოყვარეობა - ქართული კულტურის განუყოფელ ნაწილს წარმოადგენს, რაც კარგად არის გამოხატული ქართულ სუფრაში, როცა მაგიდას ეროვნულ სამზარეულოს კერზები ამშვენებს“, - განმარტავს მაკა თარაშვილი. რა თქმა უნდა, იგი ახალბედა სუფრის წევრებისაგან განსხვავებით, შეცდომებს არ უშვებს და ყველაფერს ერთად არ მიირთმევს. მან კარგად იცის, რა როდის უნდა მიირთვას და უცხოელ სტუმრებს ჭამის საიდუმლოებას ასწავლის: როდის დგება მწვადის, „ჩაქაფულის და საჭმელების მიღების დრო...
ქართული ტრადიციის თანახმად, სუფრაზე იმდენი საჭმელი უნდა იყოს, რომ სტუმრების წასვლის შემდეგაც საკმაო რაოდენობით უნდა დარჩეს: „სუფრა, რომელზეც არაფერი აღარ რჩება, საქართველოში არ არსებობს“, - ამბობს მაკა თარაშვილი, - მასპინძლები იფიქრებენ, რომ სტუმრები მშივრები დარჩნენ. ამიტომ ყველაფერი უამრავია“.
რესტორანი „ქეთო და კოტე“ ძველი თბილისის უბანში, შემაღლებულ ადგილზე მდებარეობს. დარბაზში მყუდრო გარემოა შექმნილი. მაგიდები ყოველთვის მდიდრულადაა გაშლილი - ტრადიციული კერძები თანამედროვე სტილითაა გაფორმებული. თავდაპირველად თვენ მოგართმევენ ცივ და ვეგეტარიანულ კერძებს, ბოსტნეულს, შემდეგ გამომცხავარს, ცომეულს, ბოლოს კი ხორცით მომზადებულ საჭმელებს.
ქართული სუფრის ტრადიციაა თამადა, ანუ დროსტარების ხელმძღვანელი. იგი სუფრის თავში ზის და სადღეგრძელოებს ამბობს. რესტორან „შატო მუხრანში“, სადაც ჩვენ ვიყავით (თბილისიდან ერთი საათის სავალზე), მეღვინე პატრიკ ჰონეფმა ჩვენი სტუმრობის სადიდებელი სადღეგრძელო წარმოსთქვა. გერმანელი მეღვინე უკვე მრავალი წელია საქართველოში ცხოვრობს, ოჯახიც აქ ჰყავს. პატრიკი მადლობას გვიხდის სტუმრობისათვის, რომ გერმანელი ტურისტები საქართველოთი დაინტერესდნენ და კავკასიურ ქვეყანას ეწვივნენ.
მასპინძელი გვიხსნის, რომ სუფრის თამადა ყურადღებით ისმენს სტუმრების საუბარს სადღეგრძელოებისათვის იმპულსის მისაცემად. იგი დისკუსიას ზომიერ მიმართულებას აძლევს და განწყობას ამაღლებს. ამიტომაც თამადა ისეთი პიროვნებაა, რომელიც ცნობილია თავისი კეთილი ხასიათით, გონებამახვილობით და ინტელექტით.
თუ როგორ მზადდება კლასიკური ქართული კერძები, ამას თქვენ თბილისიდან საკმაოდ მოშორებით, კახეთში გაიგებთ, სადაც ღვინის კომპანია „შუმის“ რესტორანი მდებარეობს. აქ სტუმარი საკუთარი თვალით ხედავს, თუ როგორ ცხვება ქართული თონის პური, როგორ კეთდება ხინკალი, რომელიც ქართული სამზარეულოს ერთ-ერთ დიდებულ და გემრიელ კერძს წარმოადგენს.
