,
აშშ-ის პრეზიდენტმა ჯო ბაიდენმა კონგრესში, თავის წლიურ მიმართვაში რუსეთ-უკრაინის ომზე ვრცლად ისაუბრა. მან მომხდარში მხოლოდ რუსეთის პრეზიდენტი დაანაშაულა. მისი თქმით, ვლადიმერ პუტინი ფიქრობდა, რომ დასავლეთი ამაზე პასუხს არ აგებინებდა.
„პუტინის ეს შეტევა უკრაინაზე წინასწარ განზრახული და არაპროვოცირებული იყო. მან უარი თქვა მრავალჯერადად შეთავაზებულ დიპლომატიაზე. ის ფიქრობდა, რომ დასავლეთი და ნატო პასუხს არ გასცემდა. პუტინი შეცდა. ჩვენ მზად ვიყავით. აი, რა გავაკეთეთ. საფუძვლიანად და საგულდაგულოდ მოვემზადეთ. პუტინის საპირისპიროდ თვეების განმავლობაში ვქმნიდით კოალიციას სხვა თავისუფლებისმოყვარე ერებთან ევროპაში, ამერიკაში, აზიასა და აფრიკაში. მრავალი საათი გავატარე ევროპელი მოკავშირეების გასაერთიანებლად. წინასწარ გავუზიარეთ მსოფლიოს, რა ვიცოდით პუტინის გეგმების შესახებ და ზუსტად როგორ შეეცდებოდა ის თავისი აგრესიის გამართლებას და ახლა, როდესაც მან იმოქმედა, თავისუფალი სამყარო მას პასუხს აგებინებს”, - განაცხადა ბაიდენმა.
აშშ-ის პრეზიდეტმა რუსეთისთვის დაწესებულ ეკონომიკურ სანქციებზეც ისაუბრა, რომელიც რუსულ ფინანსურ ინსტიტუტებსა და მაღალჩინოსნებსაც შეეხო.
“საშუალებას არ ვაძლევთ რუსეთის ცენტრალურ ბანკს, დაიცვას რუსული რუბლი, რაც პუტინის 630-მილიარდ დოლარიან „ომის ფონდს" ყოვლად უსარგებლოს ხდის. ვახშობთ რუსეთის წვდომას ტექნოლოგიებზე, რაც გამოფიტავს მის ეკონომიკურ ძალას და მის ჯარს მრავალი წლით დაასუსტებს”.
ბაიდენი საკუთარ გამოსვლაში რუს ოლიგარქებსაც დაემუქრა. მისი თქმით, რუსი ოლიგარქებისა და კორუმპირებული პირების მიერ არის რუსეთის არსებული რეჟიმი მხარდაჭერილი. ამასთან, თქვა, რომ აშშ-ის იუსტიციის დეპარტამენტი უკვე მუშაობს რუსი ოლიგარქების დანაშაულის გამოსავლენად.
“აშშ-ის იუსტიციის დეპარტამენტი ქმნის სპეციალურ სამუშაო ჯგუფს, რომელიც რუსი ოლიგარქების დანაშაულს გამოიძიებს. ვუერთდებით ჩვენს ევროპელ მოკავშირეებს, რათა გამოვავლინოთ და ჩამოგართვათ თქვენი იახტები, თქვენი მდიდრული სახლები, თქვენი კერძო თვითმფრინავები. ჩვენ მოვაკითხავთ თქვენს უკანონოდ მოპოვებულ ქონებას”, - ამბობს ბაიდენი.
აშშ-ის პრეზიდენტმა მიმართვაში რუსეთის წინააღმდეგ ახალი სანქციაც დააანონსა და ევროპის ქვეყნების მსგავსად, რუსეთის ავიაკომპანიებს საჰაერო სივრცე დაუკეტა. ბაიდენის განცხადებით, ამ ნაბიჯით რუსეთის იზოლაცია გაძლიერდება, ხოლო ეკონომიკაზე წნეხი გაიზრდება.
“მოკავშირეებთან ერთად უკრაინას მხარს ვუჭერთ თავისუფლებისთვის ბრძოლაში. სამხედრო, ეკონომიკური და ჰუმანიტარული დახმარება გავუწიეთ. უკრაინას ვაძლევთ 1 მილიარდ დოლაზე მეტ პირდაპირ დახმარებას”, - თქვა მან.
ბაიდენმა კიდევ ერთხელ გაიმეორა, რომ ამერიკელ ჯარისკაცებს უკრაინაში საბრძოლველად არ გაუშვებს, თუმცა დაიცავს NATO-ს წევრებს იმ შემთხვევაში თუ პუტინი დასავლეთით სვლის გაგრძელებას გადაწყვეტს.
ამერიკული გაზეთი „ჰილი“ (The Hill) აქვეყნებს სტატიას სათაურით „მკვდრეთით აღმსდგარი: დონალდ ტრამპი როგორც ამერიკული პოლიტიკის „ლაზარე“ (ავტორი - დერეკ ჰანტერი).
„სიტყვას „ისტორიული“ პოლიტიკაში ხშირად იყენებენ ხოლმე და მას ფეხბურთის ბურთივით ათამაშებენ, ზოგჯერ კი მიზანში ვერ ურტყამენ. დონალდ ტრამპთან მიმართებით კი ამ სიტყვის გამოყენება სამართლიანია. მისი მიღწევა მართლაც ისტორიულია. მან უდიდესი რევანში აიღო პოლიტიკაში.
დონალდ ტრამპი არამხოლოდ პოლიტიკური გვამი იყო, არამედ საერთოდ, „პერსონა ნონ-გრატა“ როგორც ვაშინგტონში, ასევე მშობლიურ ნიუ-იორკშიც. და როგორც ხდება ხოლმე პოლიტიკაში, მას საპყრობლეში გაგზავნითაც ემუქრებოდნენ... და ახლა იგი თეთრ სახლში ძლევამოსილად ბრუნდება - ისეთ თამაშში გამარჯვების შემდეგ, რომელიც მანამდე არავის უთამაშია.
აშშ-ის ისტორიაში დონალდ ტრამპამდე მისნაირად მხოლოდ 22-ე და 24-ე პრეზიდენტი გროვერ კლივლენდი იქნა არჩეული ორი ვადით („შუალედური შესვენებით“ 1885-1889 და 1893-1897 წლებში). მსგავსი შემთხვევა ჰქონდა რიჩარდ ნიქსონს, რომელმაც 1960 წელს საპრეზიდენტო არჩევნებიც წააგო, გუბერნატორის არჩევნებიც (1962 წელს) და განაცხადა - „მორჩა, მეგობრებო, რიჩარდ ნიქსონს ვეღარსად ვეღარ ნახავთ - იმიტომ, რომ ეს ჩემი ბოლო პრეს-კონფერენციაა“. ჩვენ მისი ნახვა მაინც მოგვიწია 1968 წელს, თეთრ სახლის ოვალურ კაბინეტში. თუ რითი დაასრულა მან თავისი პრეზიდენტობა, გვახსოვს („უოტერგეიტით“), მაგრამ ფაქტია, რომ მისი დაბრუნება იმ დროისათვის ძალზე შთამბეჭდავი იყო.
დონალდ ტრამპმა კი რიჩარდ ნიქსონსაც გადააჭარბა. იგი ფაქტიურად „დამარხული“ იყო საკუთარი რესპუბლიკური პარტიის წევრების მხრიდანაც კი, სხვები კი მოთმინებით ელოდნენ, რომ იგი უბრალოდ გუდა-ნაბადს აიკრავდა და პოლიტიკიდან წავიდოდა. მაგრამ ასე არ მოხდა.
ამერიკელებმა თავისი პოზიცია გამოხატეს: მათ ცვლილებები სურდათ და კიდეც განახორციელეს. დონალდ ტრამპი ვერაფერმა ვერ შეაჩერა - ვერც ბრალდებებმა, ვერც თავდასხმებმა... ყველა მემარცხენე გაზეთი და ტელევიზია აკრიტიკებდა, ემუქრებოდა, აშინებდა, მაგრამ ისინი ყველა „ქაღალდის ვეფხვები“ აღმოჩნდნენ, დონალდ ტრამპმა ყველა „დაიკიდა“. რას იზამენ ახლა ტელეარხების MSNBC-სა და CNN-ის ხელმძღვანელები და მაყურებლები? ვინ აღმოჩნდა მარგინალი - ისინი თუ დონალდ ტრამპი? აღიარებენ თუ არა იმას, რომ არასწორად იქცეოდნენ - როცა ყველას, ვინც დონალდ ტრამპის გვერდით იდგა, გიჟებად და სულელებად თვლიდნენ?
მოკლედ, დონალდ ტრამპი „კონსტანტის“ (მუდმივის) განსახიერებაა: იგი იყო, არის და იქნება.
წყარო: https://thehill.com/opinion/campaign/4975713-donald-trump-greatest-comeback-since-lazarus/
