ტურიზმის სექტორის წარმომადგენლები ამბობენ, რომ საქართველოში ვიზიტორების დიდი ნაწილი მეზობელი ქვეყნების, აზიის და ახლო აღმოსავლეთის ქვეყნებზე მოდის.

როგორც სასტუმროების მმართველი კომპანია McInerney Hospitality International-ის ვიცე-პრეზიდენტმა, მაია წერეთელმა “საქმის კურსის” ეთერში განაცხადა, ტურისტების ნაკადები გააქტიურებულია ისეთი ქვეყნებიდან, როგორიცაა ჩინეთი, ინდოეთი, ისრაელი.

მისივე თქმით, ვიზიტორების ნაკადები ფიქსირდება ევროპიდანაც, თუმცა მსოფლიო ტენდენციის მსგავსად, მეტად მზარდი აზიის და ახლო აღმოსავლეთის ქვეყნებია.

“ეს არის არა მხოლოდ საქართველოს ტენდენცია, არამედ მთელი მსოფლიოს მასშტაბით. მე ახლახან დავბრუნდი ევროპიდან და იგივე სიტუაცია აღინიშნება იქაც, სადაც მოგზაურთა უმრავლესობა გახლავთ აზიური ქვეყნებიდან, გააქტიურებულია ჩინეთი, მოგეხსენებათ, ინდოეთია საკმაოდ აქტიური. რა თქმა უნდა, გვაქვს ჩვენი მეზობელი ქვეყნებიდან ბევრი ვიზიტები, რაც ძალიან კარგია, ვინაიდან გეოგრაფიულად ეს ყოველთვის მისასალმებელია. ევროპის ქვეყნებიდანაც გვყავს გარკვეული რაოდენობაის სტუმრები. დიდი მოჭარბებაა ისრაელიდან და კიდევ მეტ სტუმარს ველოდებით მომავალი წლისთვის. ზოგადად, რასაც ჩვენ საქართველოში ვხედავთ, ეს არის ის სურათი, რისი განზოგადებაც შეიძლება მთელი ევროპის და შეიძლება ითქვას მსოფლიოს მასშტაბითაც, რომ მოგზაურთა ეროვნება და ზოგადად დემოგრაფია იცვლება და უმეტესი წილი მოდის აზიის, აფრიკის და შუა აღმოსავლეთის ქვეყნებზე.

როდესაც საუბარი გვაქვს აზიის ქვეყნებთან და ინდოეთთან და ჩინეთთან, ისინი არიან ადამიანები, რომლებიც არ მოგზაურობენ როგორც ინდივიდუალური ტურისტები. ხშირად ისინი არიან ჯგუფის წევრები, რომელიმე ტურისტულ კომპანიას ჩამოჰყავს ჩვენთან და ცდილობენ ჩაეტიონ იმ ბიუჯეტში, რასაც მათ ტურისტული კომპანია სთავაზობს. შესაბამისად, ვერ გეტყვით, რომ ეს ის ადამიანები არიან, რომლებიც ტურისტული კომპანიის ბიუჯეტის ზემოთ ბევრ თანხას დახარჯავენ სასტუმროში, მაგრამ ამავე დროს ეს იმას არ ნიშნავს, რომ მათ შედარებით ნაკლები ფასი აქვთ და რაიმე განსაკუთრებული ფასთა ცვლილება მოგვიწია ამის გამო, ქვეყნების მიხედვით და ეროვნების მიხედვით ფასწარმოებას არ ვაკეთებთ”, - განაცხადა მაია წერეთელმა.

ცნობისთვის, ოფიციალური სტატისტიკაც ადასტურებს, რომ წელს სამ კვარტალში ქვეყანაში საერთაშორისო ვიზიტების რაოდენობა 5.6%-ით 5.3 მილიონამდე გაიზარდა და ტრადიციულად ყველაზე მეტი ვიზიტი რუსეთიდან შედგა - 1 245 744. წლიური ზრდა 12%-ია. მეორე ადგილზეა თურქეთი 963 633 ვიზიტით, თურქეთის შემთხვევაში კლება 9%-ს შეადგენს. მესამე ადგილს კი სომხეთი იკავებს 720 114 ვიზიტით, აქ კლება 1.7%-ია. საანგარიშო პერიოდში საერთაშორისო ვიზიტორების მკვეთრი ზრდა დაფიქსირდა ჩინეთიდან, ისრაელიდან, ინდოეთიდან, აზერბაიჯანიდან.

წყარო:https://bm.ge/