,
აშშ-ის პრეზიდენტ დონალდ ტრამპის ადმინისტრაციამ რუსეთის ზოგიერთი ბანკის მიმართ დაწესებული სანქციები შეაჩერა, - ამის შესახებ ინფორმაციას აშშ-ის ფინანსთა სამინისტრო ავრცელებს.
განცხადებაში აღნიშნულია, რომ სანქციები ნაწილობრივ მოიხსნა სამოქალაქო ბირთვული ენერგიის პროექტებში ჩართული ინსტიტუტებისთვის.
უწყებამ გასცა ზოგადი ლიცენზია, რომელიც გარკვეულ რუსულ ბანკებთან ტრანზაქციების განხორციელების საშუალებას 2026 წლის 18 ივნისამდე იძლევა. ეს ტრანზაქციები ეხება პროექტებს, რომლებიც 2024 წლის 21 ნოემბრამდე დაიწყო.
დოკუმენტის თანახმად, იმ ბანკებს შორის, რომლებთანაც ოპერაციები ნებადართულია, არიან : „გაზპრომბანკი“, „სბერბანკი“, „ვითიბი“, „ალფა-ბანკი“, „სოვკომბანკი“, „როსბანკი“, „ზენიტ ბანკი“ და სხვა.
აშშ-ის ფინანსთა სამინისტროს მიერ გაცემული ლიცენზია ასევე ვრცელდება იმ კომპანიებზე, რომლებშიც ზემოაღნიშნული ბანკები ფლობენ აქციების 50%-ს ან მეტს. თუმცა, დაშვებულია მხოლოდ ის ტრანზაქციები, რომლებიც განხორციელდება სამოქალაქო ბირთვული ენერგიის მხარდასაჭერად. ყველა სხვა ტრანზაქცია სანქციებს ექვემდებარება.
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
