საქართველოში შექმნილი პოლიტიკური კრიზისის პარალელურად, აშშ-ის ახალი ადამინისტრაციის მიმართ კიდევ უფრო მეტი ინტერესი ჩნდება. ახალი პრზიდენტი ჯო ბაიდენი 20 იანვრიდან გადაიბარებს, მანამდე კი აქტიურად მიმდინარეობს მისი ადმინისტრაციის დაკომპლექტება.

უკვე გარკვეულია, რომ ახალი სახელმწიფო მდივანი ტონი ბლინკენი იქნება, რომელიც კარგად იცნობს საქართველოს, თბილისში ორჯერ არის ნამყოფი და 2009 წელს საქართველოში შექმნილი პოლიტიკური კრიზისის მოგვარების პროცესშიც იყო ჩართული.

ტონი ბლინკენი, 1962 წლის 16 აპრილს დაიბადა,  ნიუ – იორკის გავლენიანი ებრაელი ადვოკატების, ჯუდიტ და დონალდ ბლინკენების ოჯახში. სწავლობდა ნიუ – იორკის დალტონის პრესტიჟულ კერძო სკოლაში.

მისი მშობლები 1970 წელს განქორწინდნენ. მალე ტონი ბლინკენის დედა,დაქორწინდა პოლონეთში დაბადებულ ადვოკატსა და მწერალზე სამუელ პიზარზე. რომელსაც ჰოლოკოსტის საშინელებები ჰქონდა გამოვლილი. ოჯახი პარიზში გადავიდა საცხოვრებლად,  სადაც ჯუდიტი სტუდენტთა და მხატვართა ამერიკულ ცენტრს ხელმძღვანელობდა. 1984 წელს ბლინკენმა დაამთავრა ჰარვარდის უნივერსიტეტი, სწავლა განაგრძო კოლუმბიის უნივერსიტეტში

2009-2013 წლებში ბარაკ ობამას პირველი საპრეზიდენტო ვადის განმავლობაში იგი მსახურობდა ვიცე-პრეზიდენტ ჯო ბაიდენის ეროვნული უსაფრთხოების მრჩევლად.

2013-2015 წლებში იყო აშშ-ს პრეზიდენტის ეროვნული უსაფრთხოების მრჩევლის მოადგილე, 2015-2017 წლებში - აშშ-ს სახელმწიფო მდივნის მოადგილე.

2018 წელს მან დააარსა საკონსულტაციო კომპანია  WestExec Advisors-ი აშშ – ს თავდაცვის მდივნის ყოფილ თანაშემწესთან პოლიტიკურ საკითხებში მიშელ ფლორნოისთან ერთად.

დღემდე არის სიენენის ანალიტიკოსი. დაქორწინებულია ევან რაიანზე, რომელიც ირლანდიელ კათოლიკეა.

ბლინკენი ამერიკაში საკმაოდ გავლენიანი ფიგურაა დადიდი ავტორიტეტით სარგებლობს. ის საქართველოს დიდი გულშემატკივარია და ჩვენმა ქვეყანამ ახლა ეს შანსი აუცილებლად უნდა გამოიყენოს.

აი რას ამბობდა ის 2016 წელს საქართველოს შესახებ: "თქვენი (საქართველოს) სტრატეგიული მდებარეობა აზიასა და ევროპას შორის კრიტიკულად მნიშვნელოვანია ამერიკის აბრეშუმის გზის პოლიტიკისთვის. აშშ მძლავრად უჭერს მხარს თქვენს რეგიონალურ ლიდერობას რათა შექმნათ მეგობრულ სახელმწიფოთ ქსელი ტრანსკასპიური კორიდორის ირგვლივ აზიასა და ევროპას შორის ვაჭრობის განსავითარებლად..საქართველო იმსახურებს განსაკუთრებულ დაფასებას. ის, რისი იმედიც გვაქვს საქართველოში,ეს არის დემოკრატიული პროცესების კიდევ უფრო გაღრმავებაა. ეს კარგი იქნება ასევე საქართველოს მისწრაფებისთვის, რომ მისი გაწევრიანება ევროატლანტიკური ინსტიტუტებში სხვადასხვა მიმართულებით მოხდეს.“

ქართველი დიპლომატები, რომელთაც ტონი ბლინკენთან პირადი ნაცნობობა და წარსულში საქმიანი ურთიერთობები აკავშირებდათ, მას უმაღლესი რანგის პროფესიონალად ახასიათებენ, რომელიც კარგად იცნობს ჩვენი რეგიონისა და კონკრეტულად საქართველოს სპეციფიკას და საქართველოს ისტორიასაც კი.

საქართველოს ყოფილი ელჩი ამერიკაში არჩილ გეგშიძე: „საკმაოდ ინფორმირებული ადამიანია, რომლიც ჩემთან საუბარში რეგიონის შესახებ დიდ ცოდნას ავლენდა. პოსტსაბჭოთა ქვეყნების შესახებ იცის დეტალური ინფორმაცია და საქართველოს მიმართ ამბავს მუდმივად დეტალებში კითხულობდა. მან რეგიონში არსებული პრობლემები სიღრმისეულად იცის. საქართველოს ისტორიის კარგი ცოდნაც შევამჩნია. როდესაც მას ვხდებოდი, და ის ჩემი მოღვაწეობის დროს ამერიკაში სახელმწიფო მდივნის მოადგილე იყო, საქართველოს შესახებ საათობით, ბევრს მესაუბრებოდა. ნებისმიერი შეხვედრის დროს, ეს იყო დიდ ხნიანი ვიზიტი თუ ხანმოკლე, მუდმივად გულისყურით და ინტერესით მისმენდა. ჩვენი ქვეყნის კარგი გულშემატკივარია.“

ანალიტიკოსი და კონსტიტუციონალისტი ლევან ბოძაშვილი: „თუკი ამერიკის სახელმწიფო მდივნად ენტონი ბლინკენი დაინიშნა, საქართველოს თეთრი სახლის ადმინისტრაციიდან უშუალო მხადაჭერა ექნება და ეს ჩვენი ქვეყნისთვის ძალიან ბევრს ნიშნავს. ეს პიროვნება საქართველოს პოლიტიკურ მოვლენებსა და რეგიონში არსებულ სიტუაციაში ზედმიწევნით კარგად ერკვევა. ის 2009 წელს ქვეყანაში უშუალოდ იყო ჩამოსული და მაშინდელ პოლიტიკურ მოვლენებში აქტიურად იყო ჩართული.

ამიტომაც მოლოდინი დიდია და ქვეყანამ ეს შესაძლებლობა მაქსიმალურად უნდა გამოიყენოს. ახალი ადმინისტრაციისმხრიდან პირველ რიგში დემოკრატიული ინსტიტუტების განვითარება იქნება პრიორიტეტული. ამერიკა საგარეო პოლიტიკაში საერთოდ ღირებულებებს იყენებს და ახალი ადმინისტრაცია ამ ღირებულებების კიდევ უფრო გაღრმავებას დაიწყებს. ეს არის დემოკრატიული ინსტრიტუტების კიდევ უფრო გაძლიერება. როდესაც ამხელა თანამდებობაზე ადამიანი ინიშნება, რომელიც საქართველოს კარგად იცნობს, ჩვენს მიმართ ინტერესი გაორმაგდება“