,
.png)
აშშ და ირანი მიმდინარე კვირას ხელმოწერილი 14-პუნქტიანი შეთანხმების განხორციელების მიზნით საიდუმლო წინადადებების შემუშავებაზე მუშაობენ. ინფორმაციას CNN-ი მოლაპარაკებების პროცესში ჩართული სამ ამერიკელ ოფიციალურ პირზე, ერთ რეგიონულ მაღალჩინოსანსა და აშშ-ის ყოფილ ოფიციალურ პირზე დაყრდნობით ავრცელებს.
წყაროების ცნობით, განხილვები მოიცავს ირანის ბირთვული პროგრამის მომავლის საკითხსაც და შეთანხმების პრაქტიკაში განხორციელების კონკრეტულ მექანიზმებს.
როგორც CNN-ი იუწყება, აშშ-ის ვიცე-პრეზიდენტმა ჯეი დი ვენსმა ხუთშაბათს მიანიშნა, რომ ადმინისტრაციის მიერ ე.წ. „ჯენტლმენურ შეთანხმებებად“ მოხსენიებული გარკვეული შეთანხმებები, რომლებიც ურთიერთგაგების მემორანდუმში არ შესულა, წერილობითი ფორმითაც არსებობს.
თუმცა, წყაროები ხაზს უსვამენ, რომ ეს დოკუმენტები ჯერ საბოლოო სახით ჩამოყალიბებული არ არის. ირანს, როგორც ეს ურთიერთგაგების მემორანდუმის შემთხვევაში მოხდა, დამატებით დოკუმენტებზე ხელი ჯერ არ მოუწერია, რაც აჩენს კითხვებს, ხომ არ გადააჭარბა ადმინისტრაციამ თეირანისგან მიღებული ვალდებულებების შეფასებას. ამასთან, ეს კიდევ ერთხელ აჩვენებს, რამდენად მყიფეა საბოლოო შეთანხმების მიღწევის პოლიტიკური პროცესი და რამდენად სწრაფად შეიძლება ის ჩაიშალოს.
ერთ-ერთი წყაროს ინფორმაციით, ამერიკელმა მომლაპარაკებლებმა გადაწყვიტეს, ხელმოწერილი ურთიერთგაგების მემორანდუმი საჯაროდ გაევრცელებინათ ისე, რომ არ დალოდებოდნენ ირანის უმაღლესი ხელმძღვანელობის თანხმობას შეთანხმების 14-პუნქტიანი ჩარჩოს განხორციელების დეტალურ გეგმებზე.
