,
თეთრი სახლი ავღანეთის მოქალაქეებისთვის საიმიგრაციო პოლიტიკას ამკაცრებს და ქვეყანაში მცხოვრები ავღანური წარმოშობის ყველა იმიგრანტის ხელახალ შემოწმებას იწყებს. როგორც ირკვევა, საუბარია არამარტო ლეგალური სტატუსის მიღების პროცესების შეჩერებაზე, ასევე შესაძლო დეპორტაციაზე, თუ დადგინდა, რომ გამოვლენილი პირები ქვეყანაში ყოველგვარი სამართლებრივი სტატუსის გარეშე ცხოვრობენ.
გადაწყვეტილებას წინ ამერიკის შეერთებული შტატების შეიარაღებული ძალების ორი ოფიცრის მკვლელობა უძღოდა. საუბარია ოთხშაბათს მომხდარ ფაქტზე, როცა ავღანელმა იმიგრანტმა დედაქალაქში პატრულირებისთვის გამოსულ ჯარისკაცებს ცეცხლი გაუხსნა. პრეზიდენტ ტრამპის განცხადებით, აღნიშნული პირი უკვე დაკავებულია და ის კანონის სრული სიმკაცრით დაისჯება, “თუ იქამდე მიღებული ჭრილობები არ დაასრულებს მას”.
როგორც პრეზიდენტმა საგანგებო მიმართვისას განმარტა, 29 წლის რამანულა ლაკანვალი ქვეყანაში არალეგალურად ცხოვრობდა და ის 2021 წელს, ავღანეთიდან გამოფრენილ ერთ-ერთ ბოლო ამერიკულ რეისს გამოჰყვა. შტატების ლიდერმა მომხდარში ექსპრეზიდენტ ბაიდენის როლზეც ისაუბრა და აღნიშნა, რომ, რომ არა მისი წინამორბედის “უპასუხისმგებლო გადაწყვეტილებები”, ჯარისკაცები ახლა ცოცხლები იქნებოდნენ. სამხედროების ჩაცხრილვის საპასუხოდ, დონალდ ტრამპმა დედაქალაქში დამატებით 500 სამხედროს გადასროლა დააანონსა და აღნიშნა, რომ კონტროლი კიდევ უფრო გამკაცრდება.
ირანისკენ კიდევ ერთი მშვენიერი არმადა მიემართება, - ამის შესახებ აშშ-ის პრეზიდენტმა, დონალდ ტრამპმა აიოვას შტატში, მხარდამჭერების წინაშე სიტყვით გამოსვლისას განაცხადა.
„ივნისში, ირანის ბირთვული პოტენციალი გავანადგურეთ. ამას ხალხი 22 წელი ელოდა. მათ ბირთვულ იარაღამდე დაახლოებით ერთი თვე აშორებდათ. ეს უნდა გაგვეკეთებინა“, - განაცხადა ტრამპმა.
დონალდ ტრამპმა იმედი გამოთქვა, რომ ირანი აშშ-სთან შეთანხმებას გააფორმებს.
„ახლა ირანისკენ კიდევ ერთი მშვენიერი არმადა მიემართება. დიდი იმედი მაქვს, რომ შეთანხმებას გააფორმებენ. შეთანხმება პირველივე ჯერზე უნდა გაეფორმებინათ“, - აღნიშნა აშშ-ის პრეზიდენტმა.
ცნობისთვის, ავიამზიდ „აბრაამ ლინკოლნის“ დამრტყმელი ჯგუფი ახლო აღმოსავლეთში ორშაბათს ჩავიდა. აშშ-ის ცენტრალურმა სარდლობამ განაცხადა, რომ დამრტყმელი ჯგუფი სამხედრო მზადყოფნის შემოწმების მიზნით წვრთნებს ჩაატარებს.
ინფორმაციისთვის, აშშ-ის პრეზიდენტის, დონალდ ტრამპის განცხადებით, ირანმა აშშ-სთან ახალი ბირთვული შეთანხმება უნდა დადოს, რომლის ფარგლებშიც თეირანი ურანის გამდიდრებას ვეღარ შეძლებს. 2025 წლის გაზაფხულზე აშშ-ის პრეზიდენტმა ირანის უზენაეს ლიდერს, აიათოლა ალი ხამენეის წერილი გაუგზავნა და მოლაპარაკებებისკენ მოუწოდა. წერილის თანახმად, დონალდ ტრამპმა ირანს ორი თვე მისცა, რათა ბირთვული პროგრამა შეეჩერებინა. 2025 წლის აპრილში, ომანში აშშ-ისა და ირანის დელეგაციებს შორის მოლაპარაკებები დაიწყო, რომელიც ივნისამდე გაგრძელდა. ირანმა ბირთვული პროგრამის შეჩერების შესახებ აშშ-ის მოთხოვნას მიუღებელი უწოდა და განაცხადა, რომ აშშ-ს ახალ წინადადებას წარუდგენდა. გასული წლის 13 ივნისს ისრაელმა ირანში რამდენიმე სამხედრო ობიექტს დაარტყა, ხოლო ისრაელის იერიშების დაწყებიდან ერთი კვირის შემდეგ, აშშ-მა ირანში ბირთვული ობიექტები დაბომბა.
