ერთ დროს კრიპტოინდუსტრიის მეფედ წოდებული, Forbes-ის მიერ წლის კაცად შეფასებული, აწ უკვე ყოფილი მილიარდერი, სემ ბენკმენ-ფრიდი ამერიკის სასამართლომ ოფიციალურად ცნო თაღლითად და დამნაშავედ.
კრიპტობირჟა FTX-ის დამფუძნებელს ბრალად ედება თითქმის ყველაფერი, რაც ფინანსურ დანაშაულს უკავშირდება - ფულის გათეთრებით დაწყებული, ინვესტორების აქტივების მიტაცებით დამთავრებული.
თაღლითის წოდების გარდა, ბენკმენ-ფრიდს პატიმრობაც ემუქრება, თანაც დაახლოებით 100 წლით, ანუ რეალურად მას მთელი ცხოვრების გატარება ციხეში მოუწევს. მართალია, ამ საკითხთან დაკავშირებით სასამართლოს საბოლოო გადაწყვეტილება ჯერაც არ მიუღია, თუმცა დიდი შანსია, ის იმ იშვიათ მილიარდერთა შორის აღმოჩნდეს, რომელსაც სული საკანში აღმოხდება.
ბენკმენ-ფრიდმა ბოლო დროის ერთ-ერთი ყველაზე მასშტაბური თაღლითური პროექტი, FTX შექმნა, რომელიც ერთ დროს ყველაზე სწრაფად მზარდი კრიპტობირჟა იყო.
ეგვიპტის პირამიდებისგან განსხვავებით, ფინანსურ პირამიდებს დიდ ხანს სიცოცხლე არ უწერიათ და გასულ წელს FTX-მაც კოლაფსი განიცადა, რის შედეგად ინვესტორებმა დაახლოებით 65 მილიარდი დოლარის აქტივები დაკარგეს. FTX-ის მიერ ინდუსტრიაზე მიყენებული არაპირდაპირი ზარალის მოცულობა კი $200 მილიარდს აღწევს, რაც ბენკმენ-ფრიდს კაცობრიობის ისტორიაში ერთ-ერთ ყველაზე დიდ თაღლითად აქცევს.
