,
ბრიტანული ტელეარხის „სქაი ნიუსის“ (Sky News) ეთერში გადაიცა ვიდეოსიუჟეტი სათაურით „კომენტარი სლოვაკეთის პრემიერ რობერტ ფიცოს მიმართ განხორციელებულ ტერაქტთან დაკავშირებით“, რომელშიც ლონდონის სამეფო კოლეჯის პროფესორი, სამხედრო ანალიტიკოსი მაიკლ კლარკი საუბრობს.
გთავაზობთ პუბლიკაციის შინაარსს:
პროფესორ მაიკლ კლარკი ვარაუდობს, რომ რადგანაც სლოვაკეთის პრემიერ-მინისტრის რობერტ ფიცოს პოლიტიკური კარიერა აშკარად პრორუსულია, ამიტომ არ არის გამორიცხული, რომ ტერორისტული აქტი უკავშირდებოდეს მის კეთილგანწყობილ პოზიციას კრემლის მიმართ.
გარდა ამისა, რობერტ ფიცო გარკვეულ წინააღმდეგობას უწევს ევროკავშირის საერთო პოლიტიკას და ცდილობს მხარი არ დაუჭიროს რუსეთის წინააღმდეგ მიმართულ სანქციებს, იგი უარს აცხადებს უკრაინისადმი სამხედრო დახმარების გაწევაზეც, რაც ბრიუსელის კურსს ეწინააღმდეგება.
„წლების განმავლობაში რობერტ ფიცო ძალიან პრორუსულ პოლიტიკოსად გადაიქცა. რა თქმა უნდა, ამას თავისი მიზეზები აქვს. შესაძლოა საქმე პირად განწყობებსა და ხედვებშია. ისევე როგორც უნგრეთის პრემიერ-მინისტრი ვიქტორ ორბანი, რობერტ ფიცოც აქტიურად გამოდიოდა ევროკავშირის მიერ დაწესებული ანტირუსული სანციების წინააღმდეგ და უარს აცხადებდა უკრაინისათვის იარაღის მიწოდებაზე.
ორივე - ბრატისლავაც და ბუდაპეშტიც - ევროკავშირისა და ნატოს წევრები არიან და მაინც ბრიუსელის პოლიტიკის საწინააღმდეგო კურსს ატარებენ: ვიქტორ ორბანი და რობერტ ფიცო თიტქმის პოზიტიურად არიან ვლადიმერ პუტინის მიმართ განწყობილნი, ომის დაწყებიდან არ შეხვედრიან ვოლოდიმირ ზელენსკის და არანაირ თანაგრძნობას არ აცხადებენ კიევის მიმართ. ორივე ხაზს უსვამს, რომ მათ „ომის სწრაფად დასრულება და მშვიდობა სურთ“. ამაში ისინი რეალურად გულისხმობენ იმას, რომ ომში რუსეთმა გაიმარჯვოს, კრემლმა წარმატებას მიაღწიოს და სამშვიდობო მოლაპარაკება მოსკოვის პირობების მიხედვით გაიმართოს, ანუ უკრაინამ კაპიტულაცია გამოაცხადოს და ტერიტორიების დათმოს“, - ამბობს ინტერვიუში პროფესორი მაიკლ კლარკი.
წყარო: https://news.sky.com/video/professor-michael-clarke-on-the-political-career-of-shot-slovakian-prime-minister-robert-fico-13136456
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
