,
კომპანიის თბილისის ოფისში, „არემჯის“ 2025 წლის სტიპენდიატები საზეიმოდ გამოვლინდნენ. ინფორმაციას კომპანია „არემჯი“ ავრცელებს.
წელს სასტიპენდიო კონკურსში, საქართველოს ტექნიკური უნივერსიტეტის სტუდენტებთან ერთად, არემჯის და თბილისის სახელმწიფო უნივერსიტეტს შორის გაფორმებული მემორანდუმის ფარგლებში, თსუ-ის ზუსტ და საბუნებისმეტყველო მეცნიერებათა ფაკულტეტის სტუდენტებიც ჩაერთნენ.
რჩეულ 20 სტუდენტს, სამახსოვრო სერტიფიკატები არემჯის გენერალურმა დირექტორმა ჯონი შუბითიძემ და გენერალური დირექტორის მოადგილემ მალხაზ ნაცვლიშვილმა, საქართველოს ტექნიკური უნივერსიტეტის სამთო-გეოლოგიური ფაკულტეტის წარმომადგენლებთან ერთად გადასცეს.
სასტიპენდიო კონკურსში საქართველოს ტექნიკური უნივერსიტეტისა (სამთო-გეოლოგიური, ენერგეტიკის, ქიმიური ტექნოლოგიებისა და მეტალურგიის, ინფორმატიკისა და მართვის სისტემების ფაკულტეტები) და თბილისის სახელმწიფო უნივერსიტეტის ბაკალავრიატის, მაგისტრატურისა და დოქტორანტურის 150-მდე სტუდენტმა მიიღო მონაწილეობა. ორეტაპიანი გასაუბრების შედეგად შერჩეული 20 სტუდენტი არემჯისგან ერთი წლის განმავლობაში ფულად წახალისებას მიიღებს.
არემჯის სტიპენდია ყოველწლიურად სწავლაზე ორიენტირებულ, მოტივირებულ და მაღალი აკადემიური მოსწრების მქონე სტუდენტებს გადაეცემა. პროექტის მიზანია საინჟინრო მიმართულების ახალგაზრდა ტალანტების აღმოჩენა, მათი მოზიდვა და შემდგომი კარიერული განვითარების ხელშეწყობა.
სასტიპენდიო პროგრამა არემჯიმ საქართველოს ტექნიკური უნივერსიტეტის სტუდენტებისთვის 2018 წელს დააწესა. კომპანია ხარისხიანი განათლების მხარდაჭერას, გაეროს მდგრადი განვითარების მეოთხე მიზნის ფარგლებში ახორციელებს, რაც სხვადასხვა საგანმანათლებლო პროექტებში აქტიურ ჩართულობას ითვალისწინებს.
ირანისკენ კიდევ ერთი მშვენიერი არმადა მიემართება, - ამის შესახებ აშშ-ის პრეზიდენტმა, დონალდ ტრამპმა აიოვას შტატში, მხარდამჭერების წინაშე სიტყვით გამოსვლისას განაცხადა.
„ივნისში, ირანის ბირთვული პოტენციალი გავანადგურეთ. ამას ხალხი 22 წელი ელოდა. მათ ბირთვულ იარაღამდე დაახლოებით ერთი თვე აშორებდათ. ეს უნდა გაგვეკეთებინა“, - განაცხადა ტრამპმა.
დონალდ ტრამპმა იმედი გამოთქვა, რომ ირანი აშშ-სთან შეთანხმებას გააფორმებს.
„ახლა ირანისკენ კიდევ ერთი მშვენიერი არმადა მიემართება. დიდი იმედი მაქვს, რომ შეთანხმებას გააფორმებენ. შეთანხმება პირველივე ჯერზე უნდა გაეფორმებინათ“, - აღნიშნა აშშ-ის პრეზიდენტმა.
ცნობისთვის, ავიამზიდ „აბრაამ ლინკოლნის“ დამრტყმელი ჯგუფი ახლო აღმოსავლეთში ორშაბათს ჩავიდა. აშშ-ის ცენტრალურმა სარდლობამ განაცხადა, რომ დამრტყმელი ჯგუფი სამხედრო მზადყოფნის შემოწმების მიზნით წვრთნებს ჩაატარებს.
ინფორმაციისთვის, აშშ-ის პრეზიდენტის, დონალდ ტრამპის განცხადებით, ირანმა აშშ-სთან ახალი ბირთვული შეთანხმება უნდა დადოს, რომლის ფარგლებშიც თეირანი ურანის გამდიდრებას ვეღარ შეძლებს. 2025 წლის გაზაფხულზე აშშ-ის პრეზიდენტმა ირანის უზენაეს ლიდერს, აიათოლა ალი ხამენეის წერილი გაუგზავნა და მოლაპარაკებებისკენ მოუწოდა. წერილის თანახმად, დონალდ ტრამპმა ირანს ორი თვე მისცა, რათა ბირთვული პროგრამა შეეჩერებინა. 2025 წლის აპრილში, ომანში აშშ-ისა და ირანის დელეგაციებს შორის მოლაპარაკებები დაიწყო, რომელიც ივნისამდე გაგრძელდა. ირანმა ბირთვული პროგრამის შეჩერების შესახებ აშშ-ის მოთხოვნას მიუღებელი უწოდა და განაცხადა, რომ აშშ-ს ახალ წინადადებას წარუდგენდა. გასული წლის 13 ივნისს ისრაელმა ირანში რამდენიმე სამხედრო ობიექტს დაარტყა, ხოლო ისრაელის იერიშების დაწყებიდან ერთი კვირის შემდეგ, აშშ-მა ირანში ბირთვული ობიექტები დაბომბა.
