ორგანიზაცია „ახალგაზრდა ადვოკატები“ საქართველოს ეროვნული ბანკს მოუწოდებს, თუ ორგანიზაციის მხრიდან გამოქვეყნებული კვლევა სრულიად უსაფუძვლო და გონივრულ მსჯელობას მოკლებულია, ადგილი აქვს ცრუ ბრალდებებსა და ფაქტების შეგნებულ დამახინჯებას, ადგილი აქვს ეროვნული ბანკის საქმიანი რეპუტაციის შელახვას, დაიწყოს სამართლებრივი მოქმედებების განხორციელება და სარჩელით მიმართოს სასამართლოს. განცხადება აღნიშნულზე „ახალგაზრდა ადვოკატების“ ხელმძღვანელმა, არჩილ კაიკაციშვილმა კვლევის პრეზენტაციის დროს გააკეთა, რითაც საქართველოს ეროვნული ბანკის წერილობით პოზიციას გამოეხმაურა.

საქართველოს ეროვნული ბანკი „ახალგაზრდა ადვოკატების“ კვლევას ეხმაურება და ორგანიზაციის მიმართ წერილობით განცხადებაში აღნიშნულია, რომ „წარმოდგენილი ე.წ. კვლევა, ასევე ორგანიზაციის მიერ 2021 წლის 2 ივნისს საქართველოს პარლამენტის საფინანსო-საბიუჯეტო კომიტეტის სხდომაზე გაჟღერებული ცრუ ბრალდებები და საჯაროდ გავრცელებული განცხადება 2019 წლის 26 ივლისს საქართველოს ეროვნულ ბანკსა და შპს „სითი ცენტრს“ შორის დადებული უძრავი ქონების ნასყიდობის ხელშეკრულებასთან დაკავშირებით სამართლებრივად სრულიად უსაფუძვლო და გონივრულ მსჯელობას მოკლებულია. საქართველოს ეროვნული ბანკის მიმართ წაყენებული ცრუ ბრალდებები რეალურად არსებული ფაქტების შეგნებულად და გამიზნულად დამახინჯებას, სამართლებრივი ნორმის არასწორ ინტერპრეტაციას წარმოადგენს და მიზნად ისახავს ეროვნული ბანკის საქმიანი რეპუტაციის შელახვას, რაც საბოლოო ჯამში, შესაძლოა, უარყოფითად აისახოს არა მხოლოდ ეროვნული ბანკის საზოგადოებრივ შეფასებაზე, არამედ მთლიანად სახელმწიფო ინტერესებზე - ნათქვამია სებ-ის 2021 წლის 10 ივნისის წერილში, რომელსაც ხელს აღმასრულებელი დირექტორი ვახტანგ ბურკიაშვილი აწერს.

„ახალგაზრდა ადვოკატების“ ხელმძღვანელის, არჩილ კაიკაციშვილის განმარტებით, სასამართლო ერთადერთი ადგილია, სადაც საქართველოს ეროვნულ ბანკს შეუძლია საკუთარი სიმართლე დაამტკიცოს. ამასთან, ორგანიზაცია გამოქვეყნებული კვლევის ფარგლებში, კვლავ რჩება წარმოდგენილ შეფასებებზე პასუხისმგებელი და საქართველოს ეროვნულ ბანკს მოუწოდებს, წინდახედულება გამოიჩინოს სამოქალაქო სექტორის წარმომადგენლებთან ურთიერთობების ენაზე. „არავითარი ე.წ კვლევა არ არსებობს, არსებობს ფაქტები და გარემოებები, რომელიც შეფასდა და საზოგადოებას წარედგინა სრულფასოვანი ანალიზი ფარულ გარიგებებზე. მოულოდნელი არ არის, თუ დოკუმენტს საქართველოს ეროვნული ბანკი, არ ეთანხმება. სასამართლოს გარდა, არ არსებობს სხვა საშუალება და მექანიზმი. შესაბამისად, მოვუწოდებ ეროვნული ბანკის პრეზიდენტ კობა გვენეტაძეს, მიმართეთ სასამართლოს“ - განაცხადა არჩილ კაიკაციშვილმა.

ცნობისთვის: საკითხზე: „საქართველოს ეროვნული ბანკის ახალი შენობის ინიციატივა - გადაწყვეტილებები და ფარული გარიგებები“, „ახალგაზრდა ადვოკატებმა“ კვლევა 2021 წლის 10 ივნისს გამოაქვეყნა. შესწავლის შედეგად იკვეთება, რომ საქართველოს ცენტრალური ბანკის საქმიანობის ისტორიაში, ადგილი აქვს უპრეცედენტო შემთხვევას - ფორმალური იურიდიული საფუძვლების შექმნით, წინასწარი განზრახვით, ისეთი მოჩვენებითი და თვალთმაქცური გარიგების დადებას, რამაც გამოიწვია სახელმწიფოს თავდებობით ცენტრალური ბანკის მხრიდან კერძო კომპანიის/ბიზნესმენის (შპს „სითი ცენტრი“) სასარგებლოდ 2 მილიონი დოლარის კრედიტის აღება. სებ-მა 2019 წლის 26 ივლისს გააფორმა ნასყიდობის და იპოთეკის ხელშეკრულებები. ხელშეკრულებაში აღნიშნულია, რომ საქართველოს ეროვნული ბანკი აცნობიერებდა და გასცემდა უპირობო თანხმობას შპს „სითი ცენტრს“ ს.ს. „ვითიბი ბანკ ჯორჯიადან“, თავისი სასესხო ვალდებულების უზრუნველსაყოფად, ხელშეკრულების ხელმოწერიდან 1 თვის ვადაში, მიეღო 2,106,960 აშშ დოლარის მოცულობით კრედიტი და დროებით საკუთრებაში მიღებული უძრავი ნივთი, ბანკის სასარგებლოდ და აღნიშნული კრედიტის უზრუნველსაყოფად, იპოთეკის უფლებით დატვირთულიყო.

„ახალგაზრდა ადვოკატებმა“ 2019 წლის სექტემბრიდან საქართველოს ეროვნულ ბანკთან აწარმოა წერილობითი კომუნიკაცია და გამოითხოვა ყველა საჯარო დოკუმენტი, რომელიც საკითხის სამართლებრივი და ფაქტობრივი გარემოებების შეფასებას შეეხებოდა. 2019 წლის 25 ოქტომბერს, ორგანიზაციამ შესწავლის შედეგად, პირველი საჯარო განცხადება გააკეთა და აღნიშნა, რომ საქართველოს ეროვნული ბანკის 8,427,840.00 აშშ დოლარის ნასყიდობის ხელშეკრულების მიზნობრიობა სახელმწიფო აუდიტის სამსახურს უნდა გადაეხედა. კვლევის შედეგები ამჟამად ხელმისწავდომია და გამოქვეყნებამდე გაეცნო საქართველოს პარლამენტს, საქართველოს ეროვნულ ბანკს, საქართველოს პროკურატურასა და აუდიტის სამსახურს. სებ-ი გამოქვეყნებულ კვლევას არ ეთანხმება.