„ევროპული საქართველოს“ ერთ-ერთი ლიდერი, გიგა ბოკერია აცხადებს, რომ „ფოტოგრაფების საქმე“ სპეცსამსახურში არსებული პარანოიის შედეგი იყო და მას პოლიტიკური სარჩული არ ჰქონია.
„ფოტოგრაფების საქმე იყო ძალიან ცუდი საქმე, მტკიცებულებების, რაც იყო მაგ ხალხის მიმართ, სუსტიც კი არ ჰქვია, როცა ასეთ ბრალდებას უყენებ. ოღონდ პოლიტიკური მოტივი არ არსებობდა. არანაირი 26 მაისის შესახებ კადრები“, – განაცხადა გიგა ბოკერიამ 20 ოქტომბერს „რუსთავი 2-ის“ ეთერში ჟურნალისტ ირაკლი იმნაიშვილის კითხვაზე პასუხად.
„ჩემი აზრი გაინტერესებთ, რატომ მოხდა? – პარანოიას აქვს ხოლმე ადგილი ზოგჯერ სპეცსამსახურების მიერ და ეს ძალიან სახიფათო რამეა“, – განაცხადა პოლიტიკოსმა.
„გამართლებას კი არ ვცდილობ რამის, რომ არ გეგონოთ. პარანოია ძალიან სახიფათოა, სპეცსამსახური რომ ხარ, გელანდება ჯაშუშები და მერე იწყებ მოქმედებას და, თუ არავინ გაკონტროლებს, ეგეთი რამეები ხდება. მაგრამ ამისთვის კუდის მობმა და ამ საქმესთან შედარება – ივერის და ნატალიას საქმესთან შედარება — არაკორექტულია, რადგან ეს საქმე არის კატასტროფა“, – განაცხადა მან.
„მანდ არანაირი პოლიტიკური კამპანიის მოტივი არ არსებობდა… ვინმემ გამოიყენა ეგ საქმე პოლიტიკოსების წინააღმდეგ? ოღონდ ეგ არ ამართლებს… ეგ ხალხი ციხეში იჯდა ისე, რომ მათ წინააღმდეგ მტკიცებულებები აღმკვეთი ღონისძიებისთვისაც კი, ჩემი აზრით, არ იყო საკმარისი. ოღონდ ეს მოგონილი ამბავია, მერე რომ 26 მაისის რაღაც კადრები იყო [მოტივი], რომელმაც მოიარა მთელი მსოფლიო იქამდეც. სისულელეა“, – თქვა გიგა ბოკერიამ.
ფოტოგრაფების დაკავება 2011 წლის ერთ-ერთი ყველაზე გახმაურებული საქმე იყო, რომელსაც არაერთი საპროტესტო აქცია მოჰყვა:
2011 წლის 7 ივლისს შინაგან საქმეთა სამინისტროს თანამშრომლებმა ჯაშუშობის ბრალდებით დააკავეს ფოტორეპორტიორები, ზურაბ ქურციკიძე, გიორგი აბდალაძე, ირაკლი გედენიძე და მისი მეუღლე, ნათია გედენიძე.
ხელისუფლების ცვლილების შემდეგ, საქართველოს მთავარმა პროკურატურამ ამ საქმის გამოძიება დაიწყო. უწყების პოზიციით, ფოტოგრაფების დაკავების რეალური მიზეზი არა ჯაშუშობა, არამედ ამავე წლის 26 მაისს ხელისუფლების სანააღმდეგოდ გამართული აქციის დარბევის ფოტოების გავრცელება გახდა.
ფოტოგრაფების საქმეზე 2017 წლის 20 ივლისს თბილისის საქალაქო სასამართლომ კონტრდაზვერვის ყოფილ მაღალჩინოსან დავით დევნოზაშვილს ოთხნახევარი წლით, ხოლო სასჯელაღსრულების დაწესებულების N8 საპყრობილის ყოფილ დირექტორ ალექსანდრე მუხაძეს წლინახევრით პატიმრობა მიუსაჯა.
ამერიკული გაზეთი „ჰილი“ (The Hill) აქვეყნებს სტატიას სათაურით „მკვდრეთით აღმსდგარი: დონალდ ტრამპი როგორც ამერიკული პოლიტიკის „ლაზარე“ (ავტორი - დერეკ ჰანტერი).
„სიტყვას „ისტორიული“ პოლიტიკაში ხშირად იყენებენ ხოლმე და მას ფეხბურთის ბურთივით ათამაშებენ, ზოგჯერ კი მიზანში ვერ ურტყამენ. დონალდ ტრამპთან მიმართებით კი ამ სიტყვის გამოყენება სამართლიანია. მისი მიღწევა მართლაც ისტორიულია. მან უდიდესი რევანში აიღო პოლიტიკაში.
დონალდ ტრამპი არამხოლოდ პოლიტიკური გვამი იყო, არამედ საერთოდ, „პერსონა ნონ-გრატა“ როგორც ვაშინგტონში, ასევე მშობლიურ ნიუ-იორკშიც. და როგორც ხდება ხოლმე პოლიტიკაში, მას საპყრობლეში გაგზავნითაც ემუქრებოდნენ... და ახლა იგი თეთრ სახლში ძლევამოსილად ბრუნდება - ისეთ თამაშში გამარჯვების შემდეგ, რომელიც მანამდე არავის უთამაშია.
აშშ-ის ისტორიაში დონალდ ტრამპამდე მისნაირად მხოლოდ 22-ე და 24-ე პრეზიდენტი გროვერ კლივლენდი იქნა არჩეული ორი ვადით („შუალედური შესვენებით“ 1885-1889 და 1893-1897 წლებში). მსგავსი შემთხვევა ჰქონდა რიჩარდ ნიქსონს, რომელმაც 1960 წელს საპრეზიდენტო არჩევნებიც წააგო, გუბერნატორის არჩევნებიც (1962 წელს) და განაცხადა - „მორჩა, მეგობრებო, რიჩარდ ნიქსონს ვეღარსად ვეღარ ნახავთ - იმიტომ, რომ ეს ჩემი ბოლო პრეს-კონფერენციაა“. ჩვენ მისი ნახვა მაინც მოგვიწია 1968 წელს, თეთრ სახლის ოვალურ კაბინეტში. თუ რითი დაასრულა მან თავისი პრეზიდენტობა, გვახსოვს („უოტერგეიტით“), მაგრამ ფაქტია, რომ მისი დაბრუნება იმ დროისათვის ძალზე შთამბეჭდავი იყო.
დონალდ ტრამპმა კი რიჩარდ ნიქსონსაც გადააჭარბა. იგი ფაქტიურად „დამარხული“ იყო საკუთარი რესპუბლიკური პარტიის წევრების მხრიდანაც კი, სხვები კი მოთმინებით ელოდნენ, რომ იგი უბრალოდ გუდა-ნაბადს აიკრავდა და პოლიტიკიდან წავიდოდა. მაგრამ ასე არ მოხდა.
ამერიკელებმა თავისი პოზიცია გამოხატეს: მათ ცვლილებები სურდათ და კიდეც განახორციელეს. დონალდ ტრამპი ვერაფერმა ვერ შეაჩერა - ვერც ბრალდებებმა, ვერც თავდასხმებმა... ყველა მემარცხენე გაზეთი და ტელევიზია აკრიტიკებდა, ემუქრებოდა, აშინებდა, მაგრამ ისინი ყველა „ქაღალდის ვეფხვები“ აღმოჩნდნენ, დონალდ ტრამპმა ყველა „დაიკიდა“. რას იზამენ ახლა ტელეარხების MSNBC-სა და CNN-ის ხელმძღვანელები და მაყურებლები? ვინ აღმოჩნდა მარგინალი - ისინი თუ დონალდ ტრამპი? აღიარებენ თუ არა იმას, რომ არასწორად იქცეოდნენ - როცა ყველას, ვინც დონალდ ტრამპის გვერდით იდგა, გიჟებად და სულელებად თვლიდნენ?
მოკლედ, დონალდ ტრამპი „კონსტანტის“ (მუდმივის) განსახიერებაა: იგი იყო, არის და იქნება.
წყარო: https://thehill.com/opinion/campaign/4975713-donald-trump-greatest-comeback-since-lazarus/
