,
აზერბაიჯანის პრეზიდენტი ილჰამ ალიევმა რუსეთის პრეზიდენტ ვლადიმერ პუტინს უსაყვედურა სომხეთისთის იარაღის მიწოდების გამო.
აზერბაიჯანული მედია პრეზიდენტის ადმინისტრაციაზე დაყრდნობით იუწყება, რომ 13 აგვისტოს, ვლადიმერ პუტინთან სატელეფონო საუბრისას, ილჰამ ალიევმა ყურადღება გაამახვილა იმაზე, რომ „რუსეთის მიერ სომხეთისთვის სამხედრო ტვირთის მიწოდების ინტენსიფიკაციამ გამოიწვა სერიოზული შეშფოთება და კითხვის ნიშნები აზერბაიჯანის საზოგადოებაში“.
ალიევმა პუტინთან საუბარში გაიმეორა აზერბაიჯანის ოფიციალური პოზიცია სასაზღვრო დაპირისპირებების შესახებ და ამის მიზეზად სომხეთის მხრიდან პროვოკაცია დაასახელა [ერევანი ბაქოს სდებს ბრალს „პროვოკაციებში“]. ალიევის განცხადებით, ამ შეტევის მთავარი მიზანი იყო „მესამე მხარეების ჩართვა სომხეთ-აზერბაიჯანის კონფლიქტში“.
Apa-ს ცნობით, აზერბაიჯანის პრეზიდენტმა „ხაზგასმით აღნიშნა, რომ სომხეთის აგრესიის კიდევ ერთი გამოვლინების შედეგად დაიღუპნენ აზერბაიჯანის რესპუბლიკის შეიარაღებული ძალების სამხედრო მოსამსახურეები და ერთი სამოქალაქო პირი, ხოლო სომხეთის შეიარაღებული ძალების მიერ საზღვრის გასწვრივ სოფლებისა და საცხოვრებელი დასახლების საარტილერიო თავდასხმისას მრავალი სახლი განადგურდა“.
ალიევმა ასევე თქვა, რომ „რუსეთიდან სომხეთში გაგზავნილი სამხედრო დანიშნულების ტვირთების მოცულობამ (სომხეთ-აზერბაიჯანის საზღვარზე სამხედრო შეტაკების პირველი დღიდან დღემდე) გადააჭარბა 400 ტონას და ამ ტვირთის გადაცემა მოხდა ყაზახეთის, თურქმენეთის და ირანის ისლამური რესპუბლიკის საჰაერო სივრცის გამოყენებით.
ალიევის თანახმად, სატელეფონო საუბრის ძირითადი მიზანი სწორედ ამ საკითხის გარკვევა იყო. ამასთან, პრეს-რელიზის თანახმად, სატელეფონო საუბრის დროს განიხილეს „ორ ქვეყანას შორის ორმხრივი თანამშრომლობა და ყველა სფეროში აზერბაიჯან-რუსეთის პარტნიორობის კიდევ უფრო გაძლიერებ[ის მნიშვნელობა]“.
ამ ცნობაში ნახსენები არ არის საქართველო, რომელზეც აზერბაიჯანული პროსახელისუფლებო მედიასაშუალება Haqqin.az-ი წერდა, რომ სერბეთსა და რუსეთს სომხეთისთვის იარაღის მიწოდებაში დაეხმარა. საქართველოში Haqqin-ის ეს ცნობა უარყვეს და მას დეზინფორმაცია უწოდეს.
რუსეთი, სომხეთის სტრატეგიული პარტნიორობის მიუხედავად, ორივე მხარეს აწვდის იარაღს, რაც სომხეთში რუსეთით უკმაყოფილების ერთ-ერთი მიზეზია.
წყარო: netgazeti.ge
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
