უკრაინაში მის შესახებ ბევრმა მხოლოდ ის იცის, რომ იგი თითქოსდა რუსეთის პრეზიდენტის მოწინააღმდეგეა და რომ მან რუსეთში კორუფციასთან ბრძოლის ფონდი დაარსა და ამ სფეროში თავისი ჯგუფით გარკვეულ გამოკვლევებს აწარმოებს. თუმცა რაღაც-რაღაცეებს თუ გავიხსენებთ, მასზე უფრო მეტის თქმა შეიძლება.

ალექსეი ნავალნის უკრაინული ფესვები აქვს (მამამისი ჩერნობილის/ივანკოვსკის რაიონშია დაბადებული), უმაღლესი განათლება რუსეთში მიიღო (1998 წელს დაამთავრა მოსკოვის ხალხთა მეგობრობის უნივერსიტეტის იურიდიული ინსტიტუტი), შემდეგ კი ნახევარწლიანი პროგრამით იელის (აშშ) უნივერსიტეტში სწავლობდა.
რაც შეეხება შრომით საქმიანობას: სხვადასხვა დროს დაკავებული იყო ბიზნესით, ფლობდა კომპანიების აქციებს, იყო ადვიკატი, ბლოგერი... ათი წლის წინათ ალექსეი ნავალნიმ პირველად უწოდა მმართველ პარტია „ედინაია როსსიას“ „თაღლითებისა და ქურდების პარტია“.

დღეს ალექსეი ნავალნი პოპულარული იუთუბ-არხების - „ალექსეი ნავალნის“ და „ნავალნი ლაივის“ ავტორია.

ბევრი თვლის, რომ ალექსეი ნავალნი რუსი ლიბერალია, მაგრამ ყველამ არ იცის, რომ იგი ადრე პარტია „იაბლოკოს“ წევრი იყო და იქიდან გააძევეს... პარტიისათვის პოლიტიკური ზიანის მიყენების გამო, კერძოდ, „ნაციონალისტური საქმიანობისათვის“. მოგვიანებით მან დააარსა ნაციონალურ-დემოკრატიული მოძრაობა „ხალხი“, იღებდა აქტიურ მონაწილეობას ნაციონალისტური მოძრაობის „რუსული მარშის“ მსვლელობებში.
როცა რუსეთის ჯარებმა საქართველოს შეუტიეს, ალექსეი ნავალნიმ რუსეთის მხარე დაიკავა. მან თავის ბლოგში ქართველებს («Грузин») „მღრღნელები“ («грызуны») უწოდა და რუსეთის ხელისუფლებას მიმართა აქტიურად დახმარებოდა სამხრეთ ოსეთს და აფხაზეთს სამხედრო და ფინანსური თვალსაზრისით. ალექსეი ნავალნის იმდროინდელი განცხადებით, „რუსეთმა საქართველოს სრული ბლოკადა უნდა დაუწესოს და საქართველოს ყველა მოქალაქე რუსეთიდან უნდა გააძევოს“.

ალექსეი ნავალნის ნაციონალისტური შეხედულებები და საქმიანობა ფართო დისკუსიას იწვევდა ლიბერალურ ინტელიგენციას შორის, როცა 2013 წელს მან თავისი თავი მოსკოვის მერის კანდიდატად წამოაყენა.. სხვათა შორის, სწორედ იმ დროს ჰკითხეს მას ზემოთხსენებული ბლოგის შესახებ, რაზედაც მან უპასუხა: „დიახ, ქართველებს „გრიზუნები“ ვუწოდე ჩემს პოსტში, ეს კარგად არ გამომივიდა და ამაზე ვნანობ, მაგრამ ყველა დანარჩენს, რაც მაშინ დავწერე, დღესაც ხელს ვაწერ“ (ანუ აფხაზეთსა და ცხინვალის რეგიონზე, საქართველოს ბლოკადაზე და მოქალაქეების გაძევებაზე ალექსი ნავალნის თავისი აზრი არ შეუცვლია).
წყარო: უკრაინული სააგენტო "უნიან".