არქიტექტორ-რესტავრატორებმა და კონსტრუქტორმა აბბა ალავერდელ მიტროპოლიტ მეუფე დავითთან ერთად დეტალურად განიხილეს ალავერდის სამონასტრო კომპლექსში შემავალი ობიექტების შემდგომი რეაბილიტაციის საკითხები.
პარალელურად მიმდინარეობდა მონასტრის ეზოში გადაუდებელი რეაბილიტაციისთვის საჭირო ხარაჩოს დასაწყობების დასკვნითი ეტაპი.
ამ მომენტისთვის სპეციალისტების მონაწილეობით მონასტრის შიდა პერიმეტრზე ხარაჩოს მონტაჟისთვის აუცილებელი მასალის მიტანა - განთავსების პროცესი დასრულებულია. ამასთანავე, იგეგმება ინვენტარული ხარაჩოს მოწყობის I ეტაპის სამუშაოები, რათა საშუალება მიეცეთ რესტავრატორებს, ზუსტად შეაფასონ გუმბათის მდგომარეობა და განსაზღვრონ მომდევნო ეტაპზე ჩასატარებელი სამუშაოების რიგითობა და მასშტაბი. სარეაბილიტაციო სამუშაოების სრულად ჩასატარებლად, ადგილზე გაიგზავნა 1500 კვ.მ-ის ხარაჩო.
ინფორმაციისთვის: ადგილობრივი ეპარქიისა და სააგენტოს წარმომადგენლებთან შეთანხმებით გადაწყდა, უმოკლეს ვადაში ტაძრის ფასადზე მოეწყოს ხარაჩო, რათა სპეციალისტებმა შეძლონ გუმბათზე მუშაობა.
როგორც საზოგადოებისთვის ცნობილია, 26 ივნისს საქართველოს კულტურისა და სპორტის მინისტრი თეა წულუკიანი სსიპ საქართველოს კულტურული მემკვიდრეობის დაცვის ეროვნული სააგენტოს გენერალურ დირექტორ ნიკოლოზ აზნაურაშვილთან ერთად გაეცნო ალავერდის სამონასტრო კომპლექსში არსებულ მდგომარეობას.
