,
ბრიტანული გაზეთის „დეილი მეილის“ (Daily Mail) 5 მარტის ნომერში რუბრიკით „ექსკლუზივი“ გამოქვეყნებულია სტატია სათაურით „ტრამპს განზრახული აქვს ნატოში ლიდერობა საფრანგეთსა და დიდ ბრიტანეთს დაუთმოს და მეტი პასუხისმგებლობა მათ დაეკისროთ“ (ავტორები - ჯეისონ გროვსი და მარკ ნიკოლი).
გთავაზობთ პუბლიკაციას შემოკლებით:
დონალდ ტრამპი განიხილავს იმის შესაძლებლობას, რომ ამერიკამ უარი თქვას ნატოში ლიდერობაზე მას შემდეგ, რაც მან ევროპელ მოკავშირეებს მოსთხოვა მეტი პასუხისმგებლობა აიღონ კონტინენტის უსაფრთხოების უზრუნველსაყოფად.
ამერიკა თავის ლიდერულ როლს ინარჩუნებს თავდაცვითი ალიანსის შექმნის დროიდან მეორე მსოფლიო ომის შემდეგ. 1949 წლიდან, როცა ვაშინგტონში ჩრდილოატალანტიკური სამხედრო ორგანიზაციის ხელშეკრულება გაფორმდა, ევროპაში დისლოცირებული ნატოს გაერთიანებული შეიარაღებული ძალების მთავარსარდალი ყოველთვის ამერიკელი მაღალჩინოსანი ოფიცერი (ოთხვარსკვლავიანი გენერალი ან ადმირალი) იყო.
მაგრამ იმის შესაბამისად, რომ ამჟამად აშშ ითხოვს - მისმა ევროპელმა მოკავშირეებმა მეტი პასუხისმგებლობა აიღონ კონტინენტის უსაფრთხოებაზე - ვაშინგტონი ელოდება, რომ გაერთიანებული შეიარაღებული ძალების მთავარდლის პოსტს ბრიტანელი ან ფრანგი გენერალი დაიკავებს. ეს მოხდა მას შემდეგ, რაც პრეზიდენტმა დონალდ ტრამპმა თავისი ევროპელი მოკავშირეები შოკში ჩააგდო უკრაინისათვის სამხედრო დახმარების შეჩერებით, თეთრი სახლის ოვალურ კაბინეტში მომხდარი ისტორიული დიპლომატიური ინციდენტის კვალობაზე.
დონალდ ტრამპმა ორშაბათს საღამოს მკაცრად გააფრთხილა უკრაინელი ლიდერი, რომ არ მოითმენს მის უპატივცემლო მოქმედებას, რაც უკრაინას უარეს ეფექტს მოუტანს. თეთრმა სახლმა თავის ნათქვამს, მეტი დარწმუნების მიზნით, პრაქტიკული გადაწყვეტილება მოაყოლა სამხედრო დახმარების შეჩერების თაობაზე.
მაგრამ სამშაბათს, 5 მარტს - მას შემდეგ, რაც ბრიტანეთის პრემიერ-მინისტრმა გააფრთხილა უკრაინის პრეზიდენტი, რომ აუცილებელია მან აშშ-სთან ურთიერთობა გააუმჯობესოს საკუთარი ქვეყნის გადასარჩენად, ვოლოდიმირ ზელენსკიმ, შერიგების მიზნით, დონალდ ტრამპს ზეთისხილის სამშვიდობო რტო გაუწოდა: მან განაცხადა, რომ დიდად აფასებს ამერიკის მხარდაჭერას და მზად არის პრეზიდენტ ტრამპის ძლიერი ხელმძღვანელობის ქვეშ იმუშაოს მტკიცე მშვიდობის მისაღწევად“. მან „დასანანი“ უწოდა ოვალურ კაბინეტში მომხდარ სკანდალს და აღნიშნა, რომ აქვს წინადადებები სამშვიდობო შეთანხმების პროცესის მიმართ - უკრაინა გამოაცხადებს ტყვეების გათავისუფლებას, ცეცხლის შეწყვეტას ჰაერიდან, საზღვაო აკვატორიაში, თუ რუსეთიც დათანხმდება.
დამატებითი წყაროების ცნობით, კირ სტარმერი და ემანუელ მაკრონი მზად არიან ვოლოდიმირ ზელენსკისთან ერთად, მომავალ კვირას ვაშინგტონში გაემგზავრნონ და ერთად შეხვდნენ დონალდ ტრამპს, ასე ვთქვათ „ერთიანი ევროპული ფრონტით შეუტიონ აშშ-ის პრეზიდენტს“.
დონალდ ტრამპის გადაწყვეტილება უკრაინისათვის სამხედრო დახმარების შეჩერების თაობაზე დაუნინგსთრითზე, სხვა ევროპული მთავრობებისაგან განსხვავებით, როგორც ჩანს, მოულოდნელი არ ყოფილა. სავარაუდოდ, კირ სტარმერმა და დონალდ ტრამპმა ამ საკითხზე ორსაბათს ტელეფონით ისაუბრეს, თუმცა ბრიტანელმა პრემიერმა ამერიკის პრეზიდენტს გადაწყვეტილება ვერ შეაცვლევინა.
აშშ-ის პრეზიდენტის გადაწყვეტილება ეხება აგრეთვე იმ სამხედრო ტვირთების შეჩერებას, რომლებიც ამჟამად პოლონეთშია და უკრაინის საზღვარი არ გადაუკვეთავთ, ანუ ჯო ბაიდენის განკარგულებით გაცემულ დახმარებას.
