რუსეთის დუმის ფიზიკური კულტურისა და სპორტის კომიტეტის თავმჯდომარის მოადგილე, დიმიტრი სვიშჩევი იმედს გამოთქვამს, რომ საერთაშორისო ფარიკაობის ფედერაცია თბილისში მსოფლიო ჩემპიონატზე მომხდარ სკანდალზე რეაგირებას მოახდენს. სვიშჩევი ოკუპანტების წინააღმდეგ, თბილისში გამართული აქციის უკან უკრაინულ კვალს ხედავს და ქართულ პოლიციას მადლობას უხდის, თუმცა უკმაყოფილებასაც გამოთქვამს:
"აღმაშფოთებელი პროვოკაცია ანტირუსული ქართული ძალების მხრიდან. გარდა ამისა, არსებობს უკრაინული კვალი და შესაძლოა სხვა ქვეყნებისაც. რა თქმა უნდა, ამ ქმედებას სპორტთან არაფერი აქვს საერთო. ვიცი, რომ საქართველოს სამართალდამცავმა ორგანოებმა საკმაოდ მკაცრი პოზიცია დაიკავეს. მადლობას ვუხდი მათ ამისთვის, მაგრამ, ჩემი აზრით, მათ შეეძლოთ კიდევ უფრო მკაცრი ყოფილიყვნენ დამრღვევების მიმართ. თუმცა, ეს საქართველოს კანონებია და ჩვენ მათზე არ ვისაუბრებთ, თუმცა შეჯიბრებების მასპინძელი ქვეყანა იღებს პასუხისმგებლობას ვიზების მხარდაჭერასა და დელეგაციების უსაფრთხოებაზე“ - ამბობს დუმის დეპუტატი.
თბილისში მიმდინარე ფარიკაობის მსოფლიო ჩემპიონატზე მონაწილეობის მისაღებად რუსი მოფარიკავეები ჩამოვიდნენ. მათ შორის არიან ისეთებიც, ვისაც რუსული არმიის სამხედრო ოფიცრის წოდებები აქვთ. რუსი სამხედრო მოფარიკავეების საქართველოში ჩამოსვლა ტურნირში მონაწილეობა გუშინ, 27 ივლისს, ახალ სპორტის სასახლესთან ახალგაზრდებმა გააპროტესტეს. "17 რუსი ანწუხელიძის ქვეყანაში" - ამ სახელწოდების აქციაზე მათ რუსეთის დროშაც დაწვეს
