,
"ფოთის ახალი საზღვაო ნავსადგურის“ მფლობელი კომპანია PACE GEORGIA-ს დირექტორი ირაკლი თათეიშვილი ამბობს, რომ ახალი ნავმისადგომის მშენებლობა, სავარაუდოდ, შემოდგომაზე დაიწყება. ამის შესახებ მან BMG-ის განუცხადა.
ამ პროექტის შესახებ ჯერ კიდევ შარშან "საქმიან დილაში" PACE ჯგუფში შემავალი კომპანია "ტრანსფორდის" აღმასრულებელმა დირექტორმა ვასილ მაზიაშვილმა ისაუბრა.
მთავრობის დღევანდელ სხდომაზე კი ცნობილი გახდა, რომ „ფოთის ახალ საზღვაო ნავსადგურს“ სახელმწიფოსგან, აღნაგობის უფლებით, სიმბოლურ ფასად, 5 000 კვ.მ-ის ზღვის ფსკერის ტერიტორია გადაეცემა.
"მათ სჭირდებათ ზღვის გარკვეული ნაწილის გამოყენება. აქედან გამომდინარე, სიმბოლურ ფასად, აღნაგობის უფლებით ვაძლევთ ზღვაზე ამ ტერიტორიის გამოყენების უფლებას; ესაა 5 000 კვ/მ, რომ მოხდეს ბურჯების დამაგრება“, - განაცხადა ეკონომიკის მინისტრმა ლევან დავითაშვილმა ბრიფინგზე, BMG-ის კითხვის საპასუხოდ.
თავის მხრივ, როგორც ირაკლი თათეიშვილი განმარტავს, მიწა, რომელიც ზღვის ფსკერს მოიცავს, ახალი ნავმისადგომისთვის ხიმინჯების მოსაწყობად იქნება გამოყენებული.
მისივე თქმით, პროექტის ჯამური საინვესტიციო ღირებულება 36 მლნ დოლარამდეა.
„ნავმისადგომის მშენებლობას ვაპირებთ. ახალი ნავმისადგომი დამატებით 1 მილიონ ტონა ტვირთს მოემსახურება. აღნაგობით გადმოგვეცემა ზღვის ფსკერი, სადაც უნდა მოეწყოს ხიმინჯები ახალი ნავმისადგომისთვის. ჯამური ინვესტიცია 36 მილიონ დოლარამდეა, პროექტის განხორციელებას ორი წელი დასჭირდება. პარტნიორი აშშ-ის საერთაშორისო განვითარების საფინანსო კორპორაციაა (DFC), რომლის თანამონაწილეობა 25 მილიონი დოლარია. პროცესი დაწყებული გვაქვს, დოკუმენტაციას ვამზადებთ. უშუალოდ ნავმისადგომის მშენებლობის პროცესი, ვფიქრობ, სექტემბერში ან ოქტომბერში დაიწყება“, - უთხრა BMG-ის ირაკლი თათეიშვილმა.
ინფორმაციისთვის: "Pace ჯგუფს" ნავმისადგომები ფოთის პორტის ძირითადი ოპერატორისგან, APM Terminals-ისგან გრძელვადიანი იჯარის ხელშეკრულებით აქვს აღებული. ჯგუფის 2023 წლის ფინანსური ანგარიშგების თანახმად, კომპანიის აქტივები 282 მილიონ ლარს შეადგენს. კომპანიის ძირითადი პარტნიორები არიან: ირაკლი კერვალიშვილი (38%); ლაურა ლარიონი (38%); თეიმურაზ კერვალიშვილი (10%) და ირაკლი თათეიშვილი (10%),
წყარო: https://bm.ge
დღგ-ის გადახდისგან თავის არიდება რთულდება - საქმე ის არის, რომ 2024 წლის ოქტომბრიდან ძალაში შევიდა ფინანსთა სამინისტროს ახალი რეგულაცია, რომელიც მნიშვნელოვნად შეცვლის დამატებული ღირებულების გადასახადის (დღგ) გადახდისგან თავის არიდების მიზნით შექმნილი სუბიექტების მიმართ სახელმწიფოს დამოკიდებულებას. ეს ცვლილება განსაკუთრებულ გავლენას მოახდენს როგორც მეწარმე ფიზიკურ პირებზე (ინდივიდუალური მეწარმე, მიკრობიზნესი, მცირე ბიზნესი, ფიქსირებული გადასახადის გადამხდელი პირი), ასევე ნებისმიერ წვრილ, ქსელურ, კომპანიებზე.
რა უნდა იცოდეს ბიზნესმა აღნიშნულ ცვლილებებთან დაკავშირებით - ახალ რეგულაციასთან დაკავშირებულ დეტალებს BMG-ისთან DGN Consulting-ის საგადასახადო მენეჯერი ანა ლობჟანიძე განმარტავს.
- კონკრეტულად რას გულისხმობს ფინანსთა მინისტრის გამოცემული ახალი რეგულაცია?
- 2024 წლის ოქტომბრიდან ამოქმედდა ცვლილებები ფინანსთა სამინისტროს N996 ბრძანებაში, რომლებიც დღგ-ის გადახდისგან თავის არიდების სქემების აღკვეთისკენ არის მიმართული. გარკვეული კრიტერიუმების დაკმაყოფილების შემთხვევაში, საგადასახადო ორგანოს უფლება აქვს, რამდენიმე დამოუკიდებელი სუბიექტი განიხილოს ერთ გადამხდელ პირად და ყველა სუბიექტის შემოსავალი ერთობლივად დაბეგროს. აღნიშნული ცვლილება ეხება იმ ბიზნესებს, რომლებიც ახორციელებენ ბიზნესის დანაწევრებას, რათა არ დაუფიქსირდეთ წლიური ბრუნვა 100 000 ლარზე მეტი და ამ მიზნით არეგისტრირებენ სხვა ბიზნესსუბიექტებს, იურიდიული სუბიექტის ან ინდივიდუალური მეწარმის სახით. აღნიშნული სქემით ბიზნეს სუბიექტები თავს არიდებენ დღგ-ის გადახდას.
- რა კრიტერიუმებით იხელმძღვანელებენ საგადასახადო ორგანოები?
- თუ რამდენიმე ბიზნესი აკმაყოფილებს შემდეგ კრიტერიუმებს, მათ საგადასახადო ორგანო ერთ გადამხდელ პირად განიხილავს. კრიტერიუმები შემდეგია:
1. საქმიანობასთან დაკავშირებულ გადაწყვეტილებებს ერთი და იგივე პირი იღებს;
2. საქმიანობის ადგილი და შინაარსი იდენტურია;
3. რომელიმე სუბიექტი დღგ-ის გადამხდელად რეგისტრირებული არ არის.
ამასთანავე, განმარტებულია, თუ რა პირობებში მიიჩნევა გადაწყვეტილებები ერთი და იგივე პირის მიერ მიღებულად. მაგალითად, თუ გადაწყვეტილებები მიიღება ისეთ საკითხებზე, როგორიცაა კონტრაქტორების შერჩევა, ფასების განსაზღვრა, დასაქმების პირობები ან ინვესტიციების განხორციელება.
- როგორ იმოქმედებს ეს ცვლილებები ბიზნესზე?
- ამ ცვლილებების მიზანია, გააძლიეროს საგადასახადო ორგანოების უფლებამოსილება და ხელი შეუშალოს დღგ-ს გადახდისგან თავის არიდების სქემებს. ეს ზომები ხელს შეუწყობს თანაბარი კონკურენტული გარემოს შექმნას მცირე და საშუალო ბიზნესებისთვის. თუმცა, ბიზნესმა ყურადღებით უნდა დაიცვას რეგულაციები და გაითვალისწინოს ახალი წესები, რათა თავიდან აირიდოს პოტენციური ჯარიმები და დამატებითი შემოწმებები. რაც შეიძლება ითვალისწინებდეს დღგ-ს გადამხდელად ნებაყოფლობით რეგისტრაციას და შესაბამისად, საქონლის/მომსახურების ფასში დღგ-ის ასახვას.
- რას ურჩევდით ბიზნესს ამ ცვლილებების გათვალისწინებით?
- ბიზნესი ყურადღებით უნდა დააკვირდეს საკუთარ საქმიანობას და დარწმუნდეს, რომ საქმიანობის პროცესში ითვალისწინებს კანონმდებლობით დადგენილ ახალ კრიტერიუმებს და მიდგომებს. ამ ცვლილებების მიზანია, გააძლიეროს საგადასახადო ორგანოების უფლებამოსილება და ხელი შეუშალოს დღგ-ს გადახდისგან თავის არიდების სქემებს. ეს ზომები ხელს შეუწყობს თანაბარი კონკურენტული გარემოს შექმნას მცირე და საშუალო ბიზნესებისთვის. თუმცა, ბიზნესმა ყურადღებით უნდა დაიცვას რეგულაციები და გაითვალისწინოს ახალი წესები, რათა თავიდან აირიდოს პოტენციური ჯარიმები და დამატებითი შემოწმებები.
წყარო:https://bm.ge/
