,
625 მილიონი დოლარისა და 35 მილიონი ევროს გათეთრების ბრალდებით დაკავებულ კახა კოტორაშვილის ადვოკატის, ედიშერ ქარჩავას განცხადებით, დაცვის მხარეს არ ჰქონდა პატიმრობის შეფარდების მოლოდინი.
როგორც ადვოკატმა განმარტა, გამოძიება დიდი ხნის წინ დაიწყო, შესაბამისად მისი დაცვის ქვეშ მყოფი არ მიმალულა.
კითხვაზე, დაიწყო თუ არა გამოძიება ერთი წლის წინ ადვოკატი ასე პასუხობს:
“ბუნებრივია, დღეს არ დაწყებულა. საუბარია იმაზე, რომ თუ არის რეგულაციები, რომლებიც კანონის ჩარჩოში ვერ ჯდება, ამაზე უნდა იზრუნოს ყველამ ერთად. ეს შეიძლება ნიშნავდეს იმას, რომ მაგალითად, მე შეიძლება ქმედება კანონიერად მიმაჩნდეს, მაგრამ ეს ქმედება სხვანაირად შემიფასონ.
გამოძიება დაიწყო ადრე. მიუხედავად იმისა, რომ ჩემმა დაცვის ქვეშ მყოფმა იცოდა გამოძიების დაწყების შესახებ, არ მიმალულა. ამიტომ რა აუცილებლობააა დღევანდელი დაკავების”,- განაცხადა ადვოკატმა.
მისი თქმით, დაცვის მხარე მზად არის ითანამშრომლოს პროკურატურასთან და ჩაერთოს სამართლებრივი ხარვეზების მოგვარებაში, რომლებიც მისი თქმით, ვალუტის გადასახურდავებელ ჯიხურებსა და ბანკების პრაქტიკას უკავშირდება.
“მოლოდინი იმისა, რომ აღკვეთის ღონისძიების სახით პატიმრობა იქნებოდა გამოყენებული, ნამდვილად არ გვქონდა, იქიდან გამომდინარე, რომ საქმე, როგორც ფაქტობრივად, ასევე, სამართლებრივად ძალიან საინტერესოა.
ბევრი კითხვაა დაგროვილი, რომლებსაც პასუხები უნდა გაეცეს. ჩემი დაცვის ქვეშ მყოფ პირს, რაც აქვს ბრალად შერაცხული, აუცილებლად უნდა შეესაბამებოდეს მტკიცებულებებს. თუ ბრალი შეუსაბამოა მტკიცებულებებთან, რა თქმა უნდა, უნდა მოხდეს შესაბამისი დასაბუთება.
სამართლებრივი საკითხები, რომელიც თუნდაც ვალუტის გადასახურდავებელ ჯიხურებში არსებობს და ბანკებთან ურთიერთობას ეხება, თუ ეს არის დასარეგულირებელი, ამ კუთხით მზად ვართ პროკურატურასთან ვითანამშრომლოთ”, - აცხადებს ადვოკატი.
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
