USD 2.7384
EUR 2.8548
RUB 2.6619
Тбилиси
5 სექტემბრის შეჯამება უკრაინაში
дата:  275
- დონეცკის რაიონში გუშინ გათავისუფლებული სოფელი ოზერნეს შენარჩუნება უკრაინელებმა წარმატებით შეძლეს და გარშემო ტერიტორიებზე შეტევაც წამოიწყეს. დამატებითი დანაყოფები მდინარე ჩრდილოეთის დონეცის აღმოსავლეთ სანაპიროზე გადავიდნენ და დაკავებული სოფლის გამაგრება მოახერხეს. ამ ეტაპზე, ლიმანი-იამპილის მიმართულებით უკრაინელებს აქვთ ინიციატივა.
- დონეცკის რაიონშიც ამუშავდა უკრაინული "ბაირაქტარები". რეალურად, მიუხედავად იმისა, რომ რუსული შეტევის ბირთვი სწორედ ამ რაიონში რჩება, უკრაინელები მაინც ახერხებენ გადაადგილებას ჰაერში. როგორც ჩანს HARM რადარსაწინააღმდეგო რაკეტები ძალიან ეფექტურად არიან ჩართული საბრძოლო მოქმედებებში.
- დონეცკის რაიონში რუსების ქალაქი ბახმუტის სამხრეთიდან და აღმოსავლეთიდან ერთდროულად ცდილობენ ინტენსიური შეტევის წამოწყებას, მაგრამ ჯერჯერობით ქალაქის საზღვრების შიგნით შეღწევას ვერ ახერხებენ. სიტუაცია გარკვეულწილად უფრო მძიმეა სოლედარში. მიუხედავად უკრაინელთა ლოკალური კონტრშეტევისა რუსებმა დღეს დასახლებაში შესვლა აღმოსავლეთიდან ისევ სცადეს. უკრაინელებს ჯერჯერობით პოზიციები საკმაოდ კარგად აქვთ გამაგრებული, მაგრამ აშკარაა, ეს მრავალფლანგიანი შეტევა რუსული მობილიზებული ცოცხალი ძალით დაწოლასთანაა დაკავშირებული და გრძელვადიანად ქალაქისათვის ბრძოლა უფრო ინტენსიური გახდება.
- მძიმე ბრძოლა გრძელდება ქალაქი დონეცკის მომიჯნავედ - პისკისა და ავდიივკას მიმართულებით. პისკის შემოგარენში რუსული შტურმი კვლავ აქტიურია. თუკი რუსული დაწოლა ამ ინტენსივობით გაგრძელდა დიდი ალბათობით უკრაინელებს რამდენიმე ასეული მეტრით უკან დახევა მოუწევთ, რადგან რუსული დანაყოფები პისკის გარეუბანს არამხოლოდ ცენტრიდან და სამხრეთიდან არამედ ახლა უკვე ჩრდილოეთიდანაც უტევენ. ოღონდ რეალურად ეს შეიძლება იყოს 200-300 მეტრი, რადგან ამის მიღმა უკრაინელთა თავდაცვის ახალი პოზიციებია გზის გასწვრივ მოწყობილი.
- ლუგანსკის რაიონში უკრაინელებმა აღმოაჩინეს და გაანადგურეს რუსული სამხედრო ძლების შტაბი კრემინაში, სევეროდონეცკის ჩრდილოეთით. რთული სათქმელია რეალურად რამდენი დაიღუპა და დაშავდა, მაგრამ უკრაინელები 400 რუს სამხედროზე საუბრობენ.
- სტრატეგიული თვალსაზრისით კუპიანსკი ხარკივის რაიონში ერთ-ერთი საკვანძო ქალაქია. მასზე გადის რაიონის რკინიგზისა და სახმელეთო მაგისტრალის კვანძები. სწორედ კუპიანსკის გავლით ხდება იზიუმის მომარაგება რუსების მიერ. დღეს უკრაინულმა არტილერიამ მნიშვნელოვანი იერიშები მიიტანა რუს სამხედრო ნაწილებსა და სამხედრო ტვირთზე, რომლებიც კუპიანსკში იტვირთებოდნენ და სამხრეთით, იზიუმისაკენ მიემართებოდნენ. დაღუპულების სახით უკრაინელები 100 რუს სამხედროზე საუბრობენ.
- ზაპორიჟიას რაიონში, ენერჰოდარიდან სამხრეთით, მდინარე დნეპრის სანაპიროზე, კამიანკა-დნიპროვკაში უკრაინელებმა რუსული სამხედრო საწყობი და ეფ-ეს-ბეს ერთ-ერთი ცენტრი დაბომბეს.
- ხერსონის რაიონში, ეფ-ეს-ბეს ცენტრალური შტაბი უკრაინებმა HIMARS-ების მეშვეობით გაანადგურეს. ეს ადგილობრივების დევნის, დამუშავებისა და პროპაგანდის პროცესს შეაფერხებს.
- ხერსონი-მიკოლაივის კონტრშეტევის ნაწილში უკრაინულმა არტილერიამ დაიწყო სნიჰურივკაში რუსული პოზიციების ინტენსიური დაბომბვა. ქალაქი ინჰულეცის დასავლეთ სანაპიროზე მდებარეობს და ცენტრალური შემტევი ჯგუფის ერთ-ერთი საკვანძო სამიზნე იქნება.
- ჩრდილოეთის შემტევი დაჯგუფება ვისოკოპილიას სამხრეთით ტერიტორიების გათავისუფლებას აგრძელებს. როგორც მოსალოდნელი იყო ურბანული ცენტრების სიმცირე და უკრაინული არტილერიის ინტენსივობა რუსებისათვის პოზიციების ნაწილის მიტოვების მიზეზი გახდა. ამასთან, რუსებს საკვების, საწვავისა და მძიმე ტექნიკის თვალსაზრისით, უკრაინელებთან შედარებით, უპირატესობა აღარ აქვთ და ლოჯისტიკური ხაზების დაბომბვის ფონზე სერიოზულ პრობლემებს აწყდებიან. მიუხედავად იმისა, რომ რუსული საჰაერო-სადესანტო ძალები, რომელთაც ამჯერად დიდი ტექნიკური მხარდაჭერა აქვთ (თუმცა მედესანტეები თავისთავად მობილური, ხშირ შემთხვევაში მსუბუქად შეიარაღებული ელიტური შემტევი რაზმია და თავდაცვისათვის იდეალურ ძალას არ წარმოადგენენ) უკრაინულ შეტევას ყველა მიმართულებით ვერ გაუმკლავდებიან.
- ნოვა კახოვკასთან უკრაინელებმა ნავთობმზიდები დაბომბეს. საწვავის დეფიციტი უკვე დაეტყო რუსულ ტექნიკას, რომლის მიტოვებაც გახშირდა. რუსული ზოგადი უკანდახევის ფონზე უკრაინელებმა სასანგრე პოზიციებიდან თუ მდელოებზე მიტოვებული ტექნიკის სახით დიდი რაოდენობით რუსულ შეიარაღებას მოუყარეს თავი.
- ბრიტანეთის პრემიერი ლიზ ტრასი ხდება. რუსები ხუმრობენ რომ თუკი ბორის ჯონსონი უკრაინის დასახმარებლად იარაღს არ იშურებდა ლიზ ტრასი რუსეთთან საომრად არ დაიშურებს მას. ლიზ ტრასი გამორჩეულად გაბედული პოლიტიკოსია, რომელსაც მისი კოლეგები როგორც მიზანსწრაფულს ისე ახასიათებენ. ასევე დიდი ალბათობა, რომ პოსტს შეინარჩუნებს ბრიტანეთის მოქმედი თავდაცვის მინისტრიც.
аналитика
«The Washington Post» (აშშ): „ომისადმი შიშის გამო, საქართველო რუსეთისაკენ დაბრუნებას ირჩევს“

ამერიკული გაზეთი „ვაშინგტონ პოსტი“ (The Washington Post) აქვეყნებს სტატიას სათაურით „ომისადმი შიშის გამო, საქართველო რუსეთისაკენ დაბრუნებას ირჩევს“ (ავტორი - მარია ილიუშინა), რომელშიც განხილულია არჩევნებისშემდგომი სიტუაცია საქართველოში.

გთავაზობთ პუბლიკაციას შემოკლებით:

(...) ქართველთა უმრავლესობა - გამოკითხვების მიხედვით, 80%-ზე მეტი - მხარს უჭერს ქვეყნის ევროპულ ორიენტაციას და მოსკოვის მიმართ მაინცდამაინც განსაკუთრებულ სიყვარულს არ ამჟღავნებს, ოპოზიცია კი ცდილობს ხმის მიცემის შედეგები წარმოადგინოს როგორც არჩევანი ევროკავშირსა და რუსეთს შორის.

მაგრამ იმის გათვალისწინებით, რომ ორ ქვეყანას შორის 2008 წლის აგვისტორში მომხდარი ხანმოკლე ომის შედეგად საქართველოს ტერიტორიის 20% დე-ფაქტოდ რუსეთის კონტროლის ქვეშ იმყოფება, მოსკოვის სამხერო ძლიერების ჩრდილი სულ უფრო შესამჩნევი ხდება. შესაბამისად, „ქართულმა ოცნებამ“ ამომრჩევლებს უფრო რადიკალური დილემა შესთავაზა: არჩევანი მშვიდობასა და ომს შორის.

მმართველი პარტიის „რუსეთის მხარეს შებრუნება“ შედარებით ახალ მოვლენას წარმოადგენს. 2012 წელს, როცა „ქართული ოცნება“ ხელისუფლებაში მოვიდა, მნიშვნელოვან საგარეოპოლიტიკურ წარმატებას მიაღწია - სწრაფად დაუახლოვდა ევროკავშირს მასში გაწევრიანების სურვილით, მაგრამ რუსეთ-უკრაინის ომის დაწყების კვალობაზე პარტიამ რუსეთის ორბიტისაკენ გადაუხვია. მთავრობამ ევროპა და ადგილობრივი ოპოზიცია წარმოადგინა „ომის გლობალური პარტიად“, რომელსაც სურს საქართველო მოსკოვთან ომში ჩაითრიოს და კრემლთან დაპირისპირების ინსტრუმენტად გამოიყენოს

ამჟამად „ქართული ოცნება““ ოფიციალურად პრორუსულ პარტიას არ წარმოადგენს, მაგრამ ხშირად მისი პრაქტიკული მოქმედება საერთო პრორუსულ ჩარჩოებში ჯდება. 

ევროპული გზიდან გადახვევის პოლიტიკის ცენტრში მოჩანს „ქართული ოცნების“ დამაარსებელი ბიძინა ივანიშვილი - მილიარდერი, ყოფილი პრემიერ-მინისტრი, რომელიც ბოლო ათწლეულში წავიდა ქართული პოლიტიკიდან, მაგრამ იმავდროულად გავლენიან ადამიანად რჩებოდა. ბიძინა ივანიშვილი რუსეთში ყოფნის დროს გამდიდრდა, 1990-იან წლებში და როგორც მისი კრიტიკოსები ამბობენ,  მისი რიტორიკა და პოლიტიკური მრწამსი რუსეთის ლიდერის პოზიციას უთავსდება.

რუსეთის არმიის უკრაინაში შეჭრის დაწყებიდან პურველ ეტაპზე საქართველომ უკრაინას მხარი დაუჭირა. თბილისში დღესაც ბევრი უკრაინული დროშა ფრიალებს, მაგრამ მთავრობა თავს იკავებს რუსეთის გადაჭარბებული კრიტიკისაგან და ერიდება ანტირუსული სანქციების რეალიზებას.

„ჩვენ, როგორც ქვეყნის მმართველმა პარტიამ, მთავრობამ, ყველაფერი გავაკეთეთ უკრაინისა და უკრაინელი ხალხის მხარდასაჭერად“, - განაცხადა „ვაშინგტონ პოსტთან“ საუბარში „ქართული ოცნების“ თავმჯდომარის მოადგილემ არჩილ თალაკვაძემ, მაგრამ, მისი თქმით, დასავლეთის ოფიციალურმა პირებმა რუსეთ-უკრაინის ომში საქართველოს ჩათრევა მოისურვეს: „ჩვენ ჩავთვალეთ, რომ ასეთი პოლიტიკა საქართველოსათვის ძალზე სარისკო და გაუმართლებელი იქნებოდა“.

„ქართულმა ოცნებამ“ წინასაარჩევნო კამპანიის დროს აქტიურად ისარგებლა უკრაინის ომით და ამომრჩევლებს პლაკატების სერია შესთავაზა, რომლებზე გამოსახულია ერთი მხრივ, ომით დანგრეული უკრაინის ქალაქები და სოფლები, მეორე მხრივ - აღმშენებლობის პროცესში მყოფი საქართველო. ასეთმა პროპაგანდამ თავისი გამოძახილი ჰპოვა რუსეთთან ომგადატანილ საქართველოს მოსახლეობაში, განსაკუთრებით სოფლებში, ოკუპირებულ რეგიონებთან ახლოს, მხარეთა დამაშორიშორებელ ე.წ. სადემარკაციო ხაზის გასწვრივ.

როგორ ავიცილოთ თავიდან ომი

ქართველებს კარგად ახსოვთ 2008 წლის აგვისტოს ომი. ჭორვილისაკენ - ბიძინა ივანიშვილის მშობლიური სოფლისაკენ მიმავალი გზა, რომელიც კავკასიის ქედის სამხრეთ კალთებზე მდებარეობს, სწორედ რუსეთის მიერ ოკუპირებული რეგიონის - სამხრეთ ოსეთთან ახლოს გადის, სულ რაღაც ორიოდე კილომეტრში, სადემარკაციო ხაზთან.

ჭორვილაში ბიძინა ივანიშვილს თითქმის ეროვნულ გმირად თვლიან - მდიდარ ადამიანად, რომელიც თანასოფლელებს ყოველმხრივ ეხმარებოდა - სახლებისა თუ გზების მშენებლობაში, ჯანდაცვასა თუ კომუნალური გადასახადების გადახდაში, სანამ მან სახელმწიფო თანამდებობა - ქვეყნის პრემიერ-მინისტრის პოსტი არ დაიკავა.

„მე ომის მოწინააღმდეგ ვარ. დარწმუნებული ვარ, რომ „ქართული ოცნება“ მსვიდობას შეინარჩუნებს. არ გვსურს, რომ რომელიმე ქვეყანა საქართველოს მტერი იყოს და არც ის გვინდა, რომ საქართველოს იყოს სხვა ქვეყნის მტერი“, - ამბობს გიორგი გურძენიძე, სკოლის დირექტორი, რომელსაც ახსოვს, თუ როგორ ხმაურით დაფრინავდნენ სოფლის თავზე, ცაში რუსული თვითმფრინავები 2008 წელს.

„ქართული ოცნება“ აქტიურად უჭერს მხარს ბიძინა ივანიშვილის პოლიტიკური კურსის ორ ძირითად მომენტს - მშვიდობას ნეიტრალიტეტის გზით და ქართული ტრადიციული ფასეულობების დაცვას. „ქართული ოცნების“ მტკიცებით, მისი სტრატეგიული მიზანი არ შეცვლილა - ევროინტეგრაცია ძალაში რჩება, რომლის რეალიზებას 2030 წლისათვის არის დაგეგმილი: საქართველო ევროკავშირის წევრი გახდება „ღირსეულად“ და ტრადიციული ეროვნული ფასეულობების დაცვით.

„რა თქმა უნდა, მსურს ევროკავშირის წევრი ვიყოთ, მაგრამ ჩვენ ჩვენი წინაპრების ღირსებაც და მემკვიდრეობაც უნდა დავიცვათ. ქალი ქალი უნდა იყოს, კაცი კი - კაცი“, - ამბობს ჭორვილელი მამია მაჭავარიანი.

ქართველთა ღირსება კი დაცული იქნება ორი კანონით, რომლებმაც, პრაქტიკულად, ევროკავშირში საქართველოს პოტენციური წევრობის პროცესი შეაჩერეს - იმიტომ, რომ მათი დებულებები ევროპული ბლოკის სტანდარტებს ეწინააღმდეგება. ეს კანონებია „ოჯახური ფასეულობებისა და არასრულწლოვანების დაცვის, ასევე უცხოური გავლენის გამჭვირვალობის შესახებ, რომლებიც, როგორც ოპოზიცია აცხადებს, რუსული სამართლებრივი აქტების ასლებს წარმოადგენენ.

ევროპა შორეული ხდება?!

საქართველოს დედაქალაქის მცხოვრებთა ნაწილი შეშფოთებულია, რომ ქვეყნის შანსი ევროკავშირის წევრობაზე მცირდება. „არჩევნებში „ქართული ოცნების“ გამარჯვება სხვა არაფერია, თუ არა ხელისუფლების უზურპაცია“, - ამბობს 38 წლის გიორგი, რომელიც გვარს არ ასახელებს, ვაითუ დევნა დაუწყონ, - „ჩვენ ევროკავშირთან ინტეგრაცია უნდა გავაღრმავოთ. რუსეთთან დაახლოებას კი არცერთი ნორმალური ქვეყანა არ ცდილობს. პრორუსუსლი ორიენტაცია თვითმკვლელობას ნიშნავს, რადგან მოსკოვი არანაირი შეთანხმების პირობებს არ იცავს“.

ოპოზიცია მწვავედ აკრიტიკებს „ქართული ოცნების“ ომის წინააღმდეგ მიმართულ კურსს და მას პროპაგანდისტულს უწოდებს, ზოგიერთები კი თვლიან, რომ მმართველ პარტიის მხრიდან ამგვარი ლოზუნგების წარმოჩენა ხელისუფლებაში დარჩენასა და ერთპარტიული მმართველი სისტემის შენარჩუნებას ემსახურება.

პარტია „საქართველოსათვის“ ლიდერის გიორგი გახარიას განცხადებით, ბიძინა ივანიშვილისა და „ქართული ოცნების“ პოლიტიკაში მომხდარი ცვლილებები - პრორუსული გადახრები - იმითაა გამოწვეული, რომ ევროკავშირში გაწევრიანება ხელისუფლების როტაციას ნიშნავს: „მისი მთავარია მიზანია ხელისუფლების შენარჩუნება. იგი ხედავს, რომ ევროპული დემოკრატია ხელისუფლების არჩევნების გზით შეცვლას ითვალისწინებს“.

მაგრამ არჩევნების შედეგების წინააღმდეგ მიმდინარე საპროტესტო აქციები ისეთივე ძლიერი და ფართო არ არის, როგორიც გაზაფხულზე მიმდინარეობდა ზემოთ ხსენებული კანონების მიღების დროს. ეს ნიშნავს, რომ ოპოზიცია გამოფიტულია. მათ ვერც დასავლეთი ვერ უწევს სათანადო დახმარებას. ბრიუსელს შეუძლია გარკვეული ზეწოლა მოახდინოს „ქართულ ოცნებაზე“, მაგრამ ევროპელი ჩინოვნიკების რეაქცია აწონილ-დაწონილია: დამკვირვებლებმა ნამდვილად დააფიქსირეს დარღვევები, მაგრამ მათ თავი შეიკავეს იმის განცხადებაზე, რომ არჩევნები გაყალბდა და ხმები მოპარულია.

არჩევნებში მომხდარი ყველა დარღვევის დეტალურად გამოკვლევა დროს მოითხოვს - კვირეებს და შეიძლება თვეებსაც, თანაც საკმაოდ რთულია მათი დამტკიცება-დადასტურება. „ჩვენ ახლა ისეთ სიტუაციასთან გვაქვს საქმე, როცა დასავლეთს არ სურს ხისტი ნაბიჯები გადადგას საკმარისი მტკიცებულებების გარეშე, ოპოზიციას კი საკმარისი მტკიცებულებები არ აქვს“, - ამბობს ჯონ დიპირო საერთაშორისო რესპუბლიკური ინსტიტუტიდან.

ბიძინა ივანიშვილი აშკარად იმაზე დებს თავის ფსონს, რომ ევროპა საქართველოსადმი ინტერესს დაკარგავს. ჯერ კიდევ ზაფხულში იგი აცხადებდა, რომ აშშ-ის საპრეზიდენტო არჩევნებში დონალდ ტრამპის გამარჯვება რუსეთ-უკრაინის ომს დაასრულებს. „ჩვენ მაქსიმუმ ერთი წელი გვაქვს, რომ ეს ყველაფერი მოვითმინოთ, შემდეგ კი [დასავლეთის] გლობალური და რეგიონული ინტერესები შეიცვლება, მათთან ერთად კი შეიცვლება ინტერესები საქართველოს მიმართაც“, - ამბობდა ბიძინა ივანიშვილი, - ომის დასრულებასთან ერთად კი ყველა გაუგებრობა ევროპასთან და ამერიკასთან გაქრება“.

წყარო: https://www.washingtonpost.com/world/2024/11/21/georgia-russia-elections-influence/

 

более
голосование
ვინ გაიმარჯვებს რუსეთ - უკრაინის ომში?
голосование
Кстати