ტიტე კალანდაძის გუნდმა პირველად ითამაშა კონტინენტის პირველობაზე და დებიუტანტის კვალობაზე მართლაც ჩინებული შთაბეჭდილება დატოვა. ნიდერლანდებსა (29:34) და შვედეთთან (26:42) წაგებების შემდეგ ბოსნიასთან მატჩი ჩვენთვის ფინალის ტოლფასი იყო.
მატჩი არ დაწყებულა საქართველოსთვის კარგად, შეტევაში გუნდს უჭირდა და 2:8 ჩამორჩა, მაგრამ პირველი ტაიმის ბოლო ნაწილი მთლიანად კალანდაძის შეგირდების იყო, შედეგად, შესვენებაზე გუნდები თანაბარი ანგარიშით გავიდნენ - 9:9.
მეორე ნახევარიც ბოსნიელებმა კარგად დაიწყეს, სამი ბურთითაც წინ გავიდნენ, მაგრამ საქართველოს ნაკრების მეკარის, ზურაბ ცინცაძის მიერ ერთ წუთში მოგერიებულმა ორმა პენალტმა (თავისი დამატებებით) თამაშში გარდატეხა შეიტანა. 42-ე წუთზე გიორგი დიხამინჯიას გოლით საქართველო პირველად დაწინაურდა (14:13) და დარჩენილ დროში უპირატესობა ხელიდან აღარ გაუშვია. აღსანიშნავია, რომ ცინცაძემ ორი პენალტის მოგერიების გარდა, ჯამში 19-დან 7 დარტყმა უკუაგდო, ორჯერ კი საგოლე პასიც კი გააკეთა და მატჩის ბოლოს, დამსახურებულად მიიღო საუკეთესო მოთამაშის პრიზი.
ყველაზე შედეგიანი გიორგი ცხოვრებაძე იყო 7 გოლით. 5-ჯერ გამოიჩინა თავი გიორგი დიხამინჯიამ, სამ-სამჯერ თემურ ორჯონიკიძემ, ირაკლი კბილაშვილმა და ერეკლე არსენაშვილმა, ხოლო ერთხელ ხაზეინ რუსტამოვმა.
ამრიგად, საქართველოს ნაკრებმა E ჯგუფში მესამე ადგილი დაიკავა 1 მოგებით და 2 წაგებით (2 ქულა), რაც სადებიუტო ევროპის ჩემპიონატის კვალობაზე უარყოფითი შედეგი არ არის, მით უფრო, რომ შვედეთისა და ნიდერლანდების სახით ჯგუფში მართლაც უძლიერესი მეტოქეები ჰყავდა და მეტის მოთხოვნა, ახლა უბრალოდ, უტოპიაც იქნებოდა.
გლობალური ფინანსური ქსოვილი სხვადასხვა ტიპის კომპანიების ურთიერთქმედებაზე დგას. ფინანსურ ეკოსისტემაში ვხვდებით, როგორც ბანკებს, ასევე ნეობანკებს და ფინტექ-კომპანიებს, საპენსიო ფონდებს, საგადახდო სერვისების მიმწოდებელ ორგანიზაციებს, კერძო კაპიტალის მმართველებს, ჰეჯ-ფონდებსა და აქტივების მმართველ კომპანიებს. აი, სწორედ ამ ბოლო კატეგორიას განეკუთვნება ამერიკული BlackRock-ი, რომელიც სხვა ადამიანებისა და კომპანიების აქტივებს მართავს, ანუ მარტივად რომ ვთქვათ, ინვესტიციას მათ ნაცვლად დებს. გამართული ბიზნესმოდელის გარდა, ამერიკულ კორპორაციას მაღალი რეპუტაცია, ინვესტორებისთვის ფინანსური სარგებლის გენერირების დეკადების განმავლობაში დამტკიცებული შედეგები და პლანეტარული მასშტაბის კავშირები გამოარჩევს.
ამ ყველაფრის დამსახურებით, BlackRock-ი პლანეტის უდიდეს აქტივების მმართველ კომპანიად იქცა, რომლის პორტფელი, ბოლო შედეგებით, $10.5 ტრილიონად იყო შეფასებული. 2024 წლის პირველი კვარტალის ფინანსური ანგარიშის თანახმად, გასულ ერთ წელიწადში, ამერიკულმა კორპორაციამ აქტივების ზომა $1.4 ტრილიონით გაზარდა. ამ თანხის მასშტაბს რომ მიხვდეთ, გეტყვით, რომ მექსიკის მთლიანი შიდა პროდუქტი სწორედ $1.4 ტრილიონია, როცა ესპანეთის, ინდონეზიის და საუდის არაბეთის - ნაკლები. თუმცა BlackRock-ის ჯამური აქტივების ზომა უფრო შთამბეჭდავია, რადგან ამ მაჩვენებელს ქვეყნების მშპ-სთან თუ შევაფარდებთ, აღმოვაჩენთ, რომ მას მხოლოდ ამერიკის შეერთებული შტატები და ჩინეთი უსწრებს.
რა შემოსავალს და წმინდა მოგებას აგენერირებს BlackRock-ი $10.5 ტრილიონად შეფასებული აქტივების მართვით?
2024 წლის I კვარტალში, BlackRock-მა $4.7 მილიარდის შემოსავალი მიიღო, რაც 11%-ით მეტია, ვიდრე შარშან. შემოსავალთან ერთად, ბოლო პერიოდში მკვეთრად, კერძოდ 36%-ითაა გაზრდილი კომპანიის წმინდა მოგება, რომელმაც მიმდინარე წლის პირველ სამ თვეში $1.5 მილიარდი შეადგინა. აღნიშნულ მაჩვენებლებს, უმეტესწილად, ის ფინანსური ინსტრუმენტები აგენერირებენ, რომელთაც BlackRock-ის პორტფელში ვხვდებით - აქ იგულისხმება, როგორც კომპანიების კაპიტალი, ანუ აქციები, ასევე ფიზიკური აქტივები, მათ შორის უძრავი ქონება.
აქციების კუთხით, BlackRock-ის აქტივებს შორის ყველაზე დიდი წილი მსოფლიოს უდიდეს ტექნოლოგიურ, ფარმაკოლოგიურ და ფინანსურ კომპანიებზე მოდის. BlackRock-ის აქციების პორტფელის ათი უდიდესი პოზიცია კი, შემდეგნაირად გამოიყურება:
#1 - Microsoft - $229.7 მილიარდად შეფასებული 542.02 მილიონი აქცია (BlackRock-ის პორტფელის 5.37%)
#2 - Apple - $178.4 მილიარდად შეფასებული 1.04 მილიარდი აქცია (BlackRock-ის პორტფელის 4.17%)
#3 - NVIDIA - $164.66 მილიარდად შეფასებული 182.42 მილიონი აქცია (BlackRock-ის პორტფელის 3.85%)
#4- Amazon - $115.18 მილიარდად შეფასებული 638.54 მილიონი აქცია (BlackRock-ის პორტფელის 2.69%)
#5 - META - $77.18 მილიარდად შეფასებული 158.94 მილიონი აქცია (BlackRock-ის პორტფელის 1.8%)
#6 - Alphabet (Class A) - $62.77 მილიარდად შეფასებული 415.9 მილიონი აქცია (BlackRock-ის პორტფელის 1.47%)
#7 - Alphabet (Class C) - $54.11 მილიარდად შეფასებული 355.37 მილიონი აქცია (BlackRock-ის პორტფელის 1.27%)
#8 - Eli Lilly - $50.78 მილიარდად შეფასებული 65.27 მილიონი აქცია (BlackRock-ის პორტფელის 1.19%)
#9 - Broadcom - $46.27 მილიარდად შეფასებული 34.91 მილიონი აქცია (BlackRock-ის პორტფელის 1.08%)
#10 - Berkshire Hathaway (Class B) - $45.21 მილიარდად შეფასებული 107.51 მილიონი აქცია (BlackRock-ის პორტფელის 1.06%)
წყარო:https://bm.ge/