,
ევროკავშირის წევრი სახელმწიფოების ლიდერებმა ისტორიულ შეთანხმებას მიაღწიეს - 2035 წლიდან ევროკავშირის მასშტაბით ბენზინსა და დიზელზე მომუშავე, შიდაწვისძავიანი ახალი ავტომობილების გაყიდვა სრულად აიკრძალება.
აღნიშნული ინიციატივის მიზანი CO2 ემისიების მაქსიმალური შემცირება და ელექტრიფიკაციის კამპანიის ხელშეწყობაა. კანონმდებლების შეფასებით, ტრადიციულ საწვავზე (ბენზინი, დიზელი, გაზი) მომუშავე ავტომობილების აკრძალვა მნიშვნელოვან როლს ითამაშებს გარემოსდაცვითი მიზნების შესრულების პროცესში.
კანონმდებლების განმარტებით, ავტოინდუსტრიაზე ევროკავშირის ემისიების საერთო მოცულობის თითქმის 16% მოდის, ამ სექტორის დეკარბონიზაცია კი მნიშვნელოვან როლს შეასრულებს გარემოსდაცვითი მიზნების შესრულებაში.
„ეს არის მკაფიო მესიჯი იმისა, რომ ჩვენ კლიმატის ცვლილების ფარგლებში დასახულ მიზნებს უნდა მივაღწიოთ. ეს შეთანხმება ავტოინდუსტრიას მოსამზადებლად საჭირო დროს და გონივრულ ვადებს აძლევს“, - განაცხადა გერმანიის გარემოსდაცვის მინისტრმა, სტეფი ლემეკმა.
საგულისხმოა, რომ მოლაპარაკებების პროცესში საწვავის სრული აკრძალვის ინიციატივას ეწინააღმდეგებოდა გერმანია, რომელსაც მსოფლიოს მოწინავე ავტოინდუსტრია აქვს. გერმანიის წინააღმდეგობის შედეგად, პროექტის საწყისი ვერსია შეიცვალა და ახალ კომპრომისულ შეთანხმებაში გამონაკლისის სახით დაიშვა ის ავტომობილები, რომლებიც „CO2-ნეიტრალურ“ საწვავს მოიხმარენ, რაც არ გულისხმობს უშუალოდ ელექტრომობილებს.
Dodge-ის, Jeep-ის, Fiat-ის, Alfa-Romeo-სა და Opel-ის მფლობელი ჰოლდინგის, Stellantis-ის გენერალური დირექტორის, კარლოს ტავერესის შეფასებით, აღნიშნული საკანონმდებლო ცვლილება "სრულად დოგმატიკურია" და ევროკავშირის პოლიტიკურ ლიდერებს მეტად პრაგმატული და რეალისტური გადაწყვეტილებების მიღება მართებთ.
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
