,
სოციალურ ქსელ Twitter-ის დამფუძნებელი და ფინტექ კომპანია Block-ის აღმასრულებელი დირექტორი, ჯეკ დორსი აცხადებს, რომ მისი პროგნოზით, 2030 წლისთვის ერთი ბიტკოინის ფასი 1 მილიონ დოლარს მიაღწევს, ანუ კრიპტოაქტივის საბაზრო კაპიტალიზაცია 20 ტრილიონი დოლარი იქნება, რაც დაახლოებით აშშ-ის ეკონომიკის მოცულობის ტოლფასია.
ამერიკელი მეწარმის შეფასებით, ბიტკოინი ფინანსურ სამყაროში გამოჩენილი ყველაზე მნიშვნელოვანი ინოვაციაა, რომელიც ადამიანებს ფინანსური თავისუფლების მოპოვების საშუალებას აძლევს, რადგან ბიტკოინის შენახვა ვირტუალურ სივრცეშია შესაძლებელი, მისი წართმევა, მოპარვა ან ჩამორთმევა კი ფაქტობრივად შეუძლებელია. როგორც დორსი ამბობს, ბიტკოინი საკუთრების უფლების გამოხატვის საუკეთესო საშუალებაა, რაც მას კაცობრიობისთვის კოლოსალურ ღირებულებას სძენს.
Twitter-ის დამფუძნებელი იმასაც ამბობს, რომ ბიტკოინი, დროსთან ერთად, ინტერნეტის დე ფაქტო ვალუტად იქცევა, რომელიც ნებისმიერ სახელმწიფოზე და ეროვნულ ვალუტაზე მაღლა იდგება, რადგან ის არავის კონტროლს არ ექვემდებარება და არავის საკუთრებას არ წარმოადგენს.
უნდა აღინიშნოს, რომ ჯეკ დორსი მხოლოდ თამამი პროგნოზებით არ შემოიფარგლება, მისი კომპანია ბიტკოინის საფულეს აწარმოებს და აქტიურად არის ჩართული ბლოკჩეინზე დაფუძნებული პროექტების განხორციელებაში. გარდა ამისა, Block-ის მიზანში მაინინგ ცენტრის მოწყობა და კრიპტოაქტივებთან დაკავშირებული სხვა აქტივობების განხორციელებაა. ცხადია, ჯეკ დორსი ბიტკოინში აქტიურად ინვესტირებს, თუმცა თანხის მოცულობას ის არ ასაჯაროებს.
თავად დორსი აშშ-ის ისტორიაში ერთ-ერთი ყველაზე ცნობილი მეწარმეა, რომელიც სილიკონის ველზე განსაკუთრებული გავლენით სარგებლობს. მისი ქონების შეფასება 5 მილიარდ დოლარს აღწევს, თუმცა ამ თანხაში ბიტკოინი არ შედის, რადგან რა მოცულობის კრიპტოაქტივს ფლობს დორსი, ეს უცნობია.
წყარო:https://bm.ge/
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
