თბილისის მუნიციპალური ინსპექციის უფროსმა გოგი ჩიქოვანმა „დღის ქრონიკის“ ეთერში, ახალი რეგულაციების შესახებ ისაუბრა.
თბილისის მუნიციპალური ინსპექცია მეწარმეებს აფრთხილებს ახალი რეგულაციის შესახებ, რომლის ამოქმედება დაგეგმილია 2026 წლის 1 იანვრიდან; თბილისის მერიის ინიციატივით დამტკიცებული ახალი წესი ეხება მეორეული საბურავების, შავი და ფერადი ლითონების ჯართის, ექსპლუატაციიდან გამოსული სატრანსპორტო საშუალებებისა და მათი ნაწილების, ადვილად აალებადი, ფეთქებადი ან ამტვერებადი მასალის განთავსებას ან/და რეალიზაციას.
დადგენილებით იკრძალება ზემოაღნიშნული საქმიანობა საცხოვრებელ, რეკრეაციულ, სატყეო, სპეციალურ, სატრანსპორტო და სანიტარული დაცვის ზონებში. ასევე, დასაშვებ ფუნქციურ ზონებში (ძირითადად სამრეწველო და საზოგადოებრივ-საქმიანი ზონა), განისაზღვრა გარკვეული პირობები, რომლის დაკმაყოფილებაც მოუწევთ ტერიტორიის მესაკუთრეებს და მეწარმე სუბიექტებს.
წესის ამოქმედებამდე, დავალების შესაბამისად, თბილისის მუნიციპალური ინსპექციის მიერ დედაქალაქში განხორციელდა სრული ინვენტარიზაცია რეგულაციას დაქვემდებარებული ტერიტორიების და მეწარმე/სუბიექტების, ინსპექციამ 14-ზე მეტი მსხვილი არეალის მესაკუთრეს, რომელსაც თავიანთ საკუთრებაში არსებულ ტერიტორიაზე 10000-მდე მცირე მეწარმე ჰყავთ დასაქმებული და 1500-ზე მეტ საშუალო მეწარმე სუბიექტს პირდაპირი კომუნიკაციით გაუწია კონსულტაცია და გააცნო აუცილებელი პირობები, რომელიც უნდა დააკმაყოფილონ, ასევე ჩაბარდათ შესაბამისი გაფრთხილების წერილები.
