,
- დღეს ყირიმის ხიდი ორივე მიმართულებიდან ჩაიკეტა. როგორც რუსები წერენ უკრაინელთა ბალისტიკური რაკეტის განადგურება შეძლეს, რომელიც ყირიმის ხიდის აფეთქებას ისახავდა მიზნად. რეალურად რა მოხდა და რომელი რაკეტა იქნა გაშვებული რთული სათმელია, მაგრამ რუსები შიშობენ, რომ ეს უკრაინელთა მხრიდან მხოლოდ მოთელვა და ტესტირება შეიძლება იყოს და შემდგომი, ინტენსიური სარაკეტო იერიშები მხოლოდ წინაა.
- ბახმუტის ჩრდილოეთით და სამხრეთით პრაქტიკულად უწყვეტი საბრძოლო მოქმედებები მიმდინარეობს. ჩრდილოეთით, ბერკივკასა და იაჰიდნეს მიმართულებით საბრძოლო მოქმედებების ინტენსივობა ძალიან მაღალია. გუშინ უკრაინელებმა რუსული Su-25 მოიერიშე ჩამოაგდეს. რუსები სიახლოვეში მყოფ ყველა არსებულ რეზერვს იყენებენ უკრაინელთა შეტევის დასაგდებად. აშკარაა, ბახმუტსა და სოლედარს რუსებისათვის მარიუპოლთან მიახლოებული მნიშვნელობა აქვს შეძენილი და ყველაფრის ფასად ცდილობენ მის და მის ირგვლივ არსებული ტერიტორიების შენარჩუნებას. თუმცა ეს შოიგუსათვისაც კრიტიკული ღირებულებისაა, რადგან არ გამართლდეს პრიგოჟინის მიდგომა, რომ "ვაგნერის" გასვლამ მართლაც გამოიწვია ქალაქის დაკარგვა.
- უკრაინული და რუსული არტილერია ერთმანეთის პოზიციების წინააღმდეგ ინტენსიურ დარტყმებს ახორციელებს ზაპორიჟიას ოლქში, განსაკუთრებით კი ორიხივი-ტოკმაკის გზის გასწვრივ, რობოტინესთან. აქაც, ძალიან საინტერესო ტენდენცია ისაა, რომ რუსებს თავდაცვის პოზიცია არ უკავიათ და პერიოდულად ცდილობენ საარტილერიო ცეცხლის შემდეგ კონტრშეტევა აწარმოონ უკრაინელთა მიერ გათავისუფლებული პოზიციების წინააღმდეგ. ანუ სულ რამდენიმე კილომეტრის გასწვრივ გვაქვს ძალიან მაღალი ინტენსივობის შეტაკებები და არცერთი მხარე არ იკავებს თავდაცვის პოზიციას. უკრაინელთა მხრიდან გასაგებია, მაგრამ რუსების მხრიდან მსგავსი რამ მოასწავებს, რომ პოლიტიკური ბრძანებაა მოსული უკან არდახევის შესახებ. ეს ცხადია დიდ მსხვერპლსაც მოასწავებს რუსების მხრიდან, თუმცა აშკარად აქვთ იმედი რომ უკრაინულ შეტევას გამოფიტავენ. თუმცა კონტრბატარეულ საარტილერიო დუელებში უკრაინელები ბევრად ჯაბნიან რუსებს.
- უკრაინელებმა მელიტოპოლსა და მის სიახლოვეს, ჩრდილოეთით, ზარიჩნესთან, რუსული პოზიციები დაბომბეს. სამიზნე, როგორ ჩანს რუსული სამეთაურო პუნქტი იყო.
- პრო-უკრაინული თავისუფალი რუსეთის ლეგიონი აცხადებს, რომ რუსეთის პუტინის რეჟიმისაგან გასათავისუფლებლად ბრძოლას აგრძელებს და მალე შედეგებსაც დადებს. ვნახოთ.
ზოგადი მდგომარეობა:
საბრძოლო მოქმედებების ახალი მიმართულებები არ არის. ინტენსივობა კონკრეტულ ორ მონაკვეთზე - ბახმუტის ირგვლივ და ზაპორიჟიაში, ორიხივი-ტოკმაკის გზის სიახლოვეს - შედარებით მაღალია. მოძრაობებია ველიკა ნოვოსილკას სამხრეთითაც, დონეცკის ოლქში, მაგრამ აქაც მნიშვნელოვანი ცვლილებები არ გაქვს.
მიყევით ბმულს - გიორგი კობერიძე
ბრიტანულ გაზეთ „ფაინენშელ თაიმსში“ (Financial Times) დაბეჭდილია სტატია სათაურით „მსოფლიოში არასტაბილურობა სუფევს, ამიტომ ევროპა უნდა შეიარაღდეს“, რომლის ავტორები არიან ფრიდრიხ მერცი (გერმანიის კანცლერი) და ემანუელ მაკრონი (საფრანგეთის პრეზიდენტი).
გთავაზობთ სტატიის შინაარსს:
„ჰააგაში ნატოს სამიტის ფონზე მსოფლიოში ქაოსური მოვლენები სუფევს: ბობოქრობენ ომები, ჩვეული ქცევის წესები და ნორმები ინგრევა, ხოლო დიდი ხნით განმტკიცებული რწმენები ეჭვის ქვეშ დგება. ამ ეპოქალური გამოცდის ჟამს გერმანია და საფრანგეთი - თავიანთ ევროპელ და ატლანტის ოკეანის გაღმა ნაპირზე მყოფ მეგობრებთან და მოკავშირეებთან ერთად ერთიანი და მტკიცე ფრონტით გამოდიან, რათა დაიცვან ჩვენი საერთო ფასეულობები, ჩვენი მოქალაქეების თავისუფლება და უსაფრთხოება“, - ნათქვამია სტატიის დასაწყისში.
ავტორთა აზრით, „ევროპაში არასტაბილურობის ძირითად წყაროს რუსეთი და მისი იმპერიალისტური ომები წარმოადგენს: „2008 წელს რუსეთი თავს დაესხა საქართველოს, შემდეგ, 2014 წელს - მოახდინა ყირიმისა და დონბასის ოკუპაცია, 2022 წელს კი კრემლის ჯარები უკრაინის დანარჩენ ტერიტორიაზე შეიჭრნენ. ვლადიმერ პუტინის მიზანია ძირი გამოუთხაროს ევროპულ უსაფრთხოებას, მეზობლებს თავს მოახვიოს უკანონო მეურვეობა, ისინი შიგნიდან გატეხოს და თავის ორბიტაზე გადაიყვანოს, საერთაშორისო მართლწესრიგს საფუძველი შეურყიოს. ეს ყველაფერი რუსეთის სტრატეგიულ ინტერესებს წარმოადგენს. ჩვენ არ შეგვიძლია ამ ყველაფერს შევურიგდეთ, ჩვენს კონტინენტზე მშვიდობა უნდა დავიცვათ“.
„თუ კრემლის ამჟამინდელი პოლიტიკის ტრაექტორია არ შეიცვლება, რუსეთი საფრანგეთისა და გერმანიის ურყევ და მტკიცე პოზიციის წინაშე აღმოჩნდება. ამჟამად სასწორზე დევს ევროპული სტაბილურობის ბედი ათწლეულების განმავლობაში.
ნატოს სამიტზე საფრანგეთი და გერმანია დაადასტურებენ თავიანთ მხარდაჭერას იმ ძალისხმევისადმი, რასაც აშშ მიმართავს კონფლიქტების შეწყვეტისათვის და მტკიცე მშვიდობის მისაღწევად. საფრანგეთი და გერმანია მხარს დაუჭერენ უკრაინის სუვერენიტეტს, ცეცხლის შეწყვეტის წინადადებას და გააძლიერებენ რუსეთზე ზეწოლას, მათ შორის სანქციების მეშვეობით“, - აღნიშნავენ სტატიის ავტორები, - „ჩვენ ვუზრუნველყოფთ, რომ უკრაინა კონფლიქტიდან გამოსვლის შემდეგ აყვავებული, ძლიერი და უსაფრთხო ქვეყანა გახდეს“.
როგორც სტატიაშია ნათქვამი, ამ მხრივ უკვე ბევრი რამ არის გაკეთებული - ევროკავშირი უკრაინას 130 მილიარდი ევროთი დაეხმარა. გარდა ამისა, ევროკავშირმა დაგმო კრემლის აგრესიული პოლიტიკა, რისთვისაც რუსეთს მკაცრი სანქციები აქვს დაწესებული. „მაგრამ ეს კიდევ ცოტაა. ამიტომ ჩვენ, დიდ ბრიტანეთთან ერთად, ხელს შევუწყობთ უკრაინის არმიის გაძლიერებას, განვაახლებთ უკრაინის თავდაცვით მრეწველობას იმ მიზნით, რომ სამომავლოდ მას რუსეთის სავარაუდო აგრესიის წარმატებით მოგერიება შეძლოს.
„რა თქმა უნდა, ჩვენი გეგმები მხოლოდ უკრაინას არ ეხება. როგორც ჩანს, ახლო მომავალში კონფლიქტურ გარემოში ცხოვრება მოგვიწევს - იმ მსოფლიოში, სადაც ჩვენი მოკავშირეების წინაშე ახალი დილემები და პრიორიტეტები დადგება. რუსეთის გარდა, ჩვენ, ალბათ, კიდევ ბევრი გამოწვევის მოწმენი გავხდებით. ამისათვის ახლავე უნდა ვიზრუნოთ“, - აღნიშნავენ ავტორები და იქვე მიუთითებენ: აუცილებელია ნატოს გაძლიერება - თავდაცვის სფეროს ალიანსის წევრების საერთო ბიუჯეტის 3,5% უნდა მოხმარდეს, 2%-ის ნაცვლად. დამატებითი ხარჯები აუცილებელია. მათი მეშვეობით ჩვენ იმ ბზარს ამოვავსებთ, რომელიც ნატოს სამხედრო პოტენციალს გაუჩნდა რევანშისტული რუსეთის პირისპირ“, - ხაზს უსვამენ ავტორები.
„ალიანსის უსაფრთხოების ქვაკუთხედად ბირთვული შეკავება რჩება: საფრანგეთს აქვს თავისი დამოუკიდებელი სტრატეგიული ბირთვული ძალები, რომლებსაც მნიშვნელოვანი წვლილი შეაქვთ ნატოს საერთო უსაფრთხოების დაცვაში. გერმანიას უფლება აქვს მონაწილეობა მიიღოს ნატოს ბირთვული იარაღის ერთობლივ გამოყენებაში. გარდა ამისა, ერთობლივად ვიმუშავებთ შესყიდვების სისტემის რეფორმირებაში, რომელიც გამოიხატება უნიფიკაციაში, გამარტივებასა და გაზრდაში“, - ნათქვამია სტატიაში.
პუბლიკაციის დასასრულს, ავტორები აღნიშნავენ, რომ ნატო გააგრძელებს მჭიდრო თანამშრომლობას ევროკავშირთან, რათა უკეთ იქნას გამოყენებული ევროპის ტექნოლოგიური უპირატესობა [რუსეთის წინააღმდეგ]. „ჩვენ ვადასტურებთ სამოკავშირეო ერთიანობას, სოლიდარობას და ერთგულებას ჩვენი კონტინენტის თავისუფლების, მშვიდობისა და უსაფრთხოებისათვის“.
