2023 წელს საქართველოს რკინიგზის მეშვეობით გადატანილი სატრანზიტო ტვირთების 47% რუსული იყო - ამის შესახებ საქსტატის მიერ გამოქვეყნებული ანგარიშიდან ხდება ცნობილი.

2023 წლის განმავლობაში საქართველოს რკინიგზით გადაზიდული ტვირთების მოცულობა 13.6 მილიონი ტონა იყო, რაც 2022 წელთან შედარებით 8.2%-ით ნაკლები იყო. გადაზიდვების კლება აისახა საქართველოს რკინიგზის შემოსავალზეც, რაც გასულ წელს შემცირდა. 2023 წლის 9 თვეში რკინიგზამ 481 მილიონი ლარის შემოსავალი მიიღო, რაც 2022 წელთან შედარებით 2%-ით ნაკლები იყო. თუმცა, 2023 წლის სრული ფინანსური შედეგები რკინიგზას ჯერჯერობით გამოქვეყნებული არ აქვს.

2023 წელს საერთაშორისო გადაზიდვის რეჟიმში რკინიგზით გადატანილი ტვირთის ჯამური მოცულობის 27.4% მოდის ქვეყნიდან გატანილ ტვირთზე, 72.6% კი - ქვეყანაში შემოტანილზე.

"2023 წელს რკინიგზით შემოტანილი ტვირთის მთლიანი მოცულობის 47.4 პროცენტის გამომგზავნ ქვეყანას რუსეთის ფედერაცია წარმოადგენდა, 26.5 პროცენტის გამომგზავნს - აზერბაიჯანი, 3.4 პროცენტისას - თურქმენეთი, 3.2 პროცენტისას - რუმინეთი, 2.8 პროცენტისას - ბულგარეთი, 2.3 პროცენტისას - თურქეთი, 1.3 პროცენტისას - ბელარუსი, 1.2 პროცენტი კი გამოგზავნილი იყო ჩინეთის მიერ,"- ნათქვამია საქსტატის ანგარიშში.

აღსანიშნია, რომ საანგარიშო პერიოდში, რკინიგზით გადატანილი ტვირთის მთლიანი მოცულობის 28.9 პროცენტი მოდიოდა ლითონის მადანსა და სამთო-მოპოვებითი მრეწველობის სხვა ნედლეულზე, 28.5 პროცენტი - ქვანახშირის, ნედლი ნავთობისა და ბუნებრივი აირის სასაქონლო ჯგუფზე, ხოლო 12.7 პროცენტი - საკვებ პროდუქტებსა და სასმელებზე.

წყარო:https://bm.ge