სამშენებლო ამნისტიის ფარგლებში, თბილისის მუნიციპალური ინსპექციის მიერ, 600-მდე ობიექტი იქნა მიღებული ექსპლუატაციაში. ორწლიანი ამნისტია 2023 წელს დასრულდა.

 სამშენებლო ამნისტიის ფარგლებში, 2 წლის განმავლობაში საერთო ჯამში შემოვიდა 1858 განცხადება, ამჟამად დამატებით შესწავლის პროცესშია 1000-ზე მეტი სამშენებლო ობიექტი. პროექტის დასრულების შემდეგ 50 000-ზე მეტი მესაკუთრე მიიღებს უფლებრივად უნაკლო ქონებას.

 აღნიშნული ამნისტია თბილისის მერიის ინიციატივით განხორციელდა, რადგან წლების განმავლობაში პრობლემას წარმოადგენდა გარკვეული სამშენებლო ობიექტების ექსპლუატაციაში მიღების საკითხი, სხვადასხვა ტიპის არქიტექტურული დარღვევების და დარჩენილი მცირე სამშენებლო სამუშაოების გამო. ყოველივე აღნიშნულით ზარალდებოდა მოქალაქეების ინტერესები, რომლებმაც შეიძინეს უძრავი ქონება ამ ობიექტებში, ვინაიდან ექსპლუატაციის მიღების გარეშე ქონება უფლებრივად სრულყოფილი არ არის, ასევე ექსპლუატაციის მიღების გარეშე მრავალბინიან საცხოვრებელში ვერ იქმნებოდა ბინათმესაკუთრეთა ამხანაგობები, რაც აფერხებდა მათ მუნიციპალურ პროგრამებში ჩართვას.