საბჭოთა რუსეთმა საქართველოს დემოკრატიული რესპუბლიკის დემოკრატიულად არჩეული მთავრობის შეიარაღებული გზით დამხობა და საბჭოთა ხელისუფლების გამოცხადება 1919 წლის 7 ნოემბერს დაგეგმა. თუმცა, საქართველოს უშიშროების სამსახურმა - შინაგან საქმეთა სამინისტროს განსაკუთრებულმა რაზმმა, რომელსაც მელქისედეკ კედია ხელმძღვანელობდა, შეიარაღებული გამოსვლის გეგმა გამოავლინა და მისი ყველა ლიდერი დააპატიმრა.
არალეგალურ ბოლშევიკურ სამხედრო-რევოლუციურ შტაბში (ე.წ. გარნიზონის სამხედრო საბჭოში) განსაკუთრებულ რაზმს აგენტი ჰყავდა ჩანერგილი. შეიარაღებულ გამოსვლამდე ორი დღით ადრე, ბოლო შეკრების დროს, როცა აჯანყებულთა შტაბს აჯანყების დირექტივები უნდა გაეცა, განსაკუთრებულმა რაზმმა მთელი ბოლშევიკური შტაბი ერთიანად დააპატიმრა ვორონცოვის მოედანზე მდებარე სასტუმრო „ავრორაში“, სადაც საიდუმლო კრებები იმართებოდა.
დაპატიმრებულებს შორის იყო საბჭოთა რუსეთიდან არალეგალურად, სპეციალური დავალებით ჩამოსული ე.წ გარნიზონის სამხედრო საბჭოს მეთაური, ილია მგელაძე. ქართველი ბოლშევიკების ლიდერი, ფილიპე მახარაძე ამ ჩავარდნის შემდეგ მიიმალა. იგი მოგვიანებით, 30 ნოემბერს კოჯრის ქუჩაზე დააპატიმრეს სახალხო გვარდიის მთავარი შტაბის კონტრდაზვერვის თანამშრომლებმა და მისგან საიდუმლო დოკუმენტები ამოიღეს. სწორედ ამ დოკუმენტებით გახდა ცნობილი ბოლშევიკური გადატრიალების გეგმები.
ბოლშევიკური გამოსვლების დამარცხების შემდეგ შს მინისტრმა, ნოე რამიშვილმა ვრცელი მოხსენება გამოაქვეყნა, სადაც დაწვრილებით აღწერდა საბჭოთა რუსეთის გეგმებს. ბრიტანელი კორესპონდენტისთვის მიცემულ ინტერვუში რამიშვილმა ახსენა საბჭოთა რუსეთიდან არალეგალურად შემოტანილი 87 მილიონი მანეთი. ეს ინფორმაცია მისთვის წინასწარ იყო ცნობილი და გადამწყვეტი გამოდგა ბოლშევიკური გამოსვლების დასამარცხებლად.
ბოლშევიკურ არალეგალურ შტაბში ჩანერგილი აგენტი, რომელიც შსს განსაკუთრებული რაზმის უფროსის, მექი კედიას დავალებებს ასრულებდა, თბილისის საგუბერნიო ბატალიონის ეფრეიტორი, ესტატე ფიჩხაია იყო. შემდგომ იგი ქუთაისის საქალაქო მილიციაში მსახურობდა. 1921 წლის საბჭოთა რუსული ოკუპაციის შემდგომ ემიგრაციაში არ წასულა. რუსულმა საოკუპაციო რეჟიმმა ესტატე ფიჩხაია 1921 წელსვე დააპატიმრა და დახვრიტა.
ფოტო: საქართველოს დემოკრატიული რესპუბლიკის შინაგან საქმეთა სამინისტროს განსაკუთრებული რაზმის უფროსი მელქისედეკ კედია
